ഹോർമുസിൽ ഇറാന്റെ മുന്നറിയിപ്പ് അവഗണിച്ച് കടന്നു: മിസൈൽ ആക്രമണത്തിൽ കത്തിയമർന്ന് തായ് കപ്പൽ

തെഹ്റാൻ: ഹോർമുസ് കടലിടുക്കിൽ ഇറാന്റെ കർശനമായ സൈനിക മുന്നറിയിപ്പുകൾ അവഗണിച്ച് മുന്നോട്ട് നീങ്ങിയ തായ്‌ലൻഡ് ചരക്ക് കപ്പൽ മിസൈൽ ആക്രമണത്തിൽ തകർന്നു. മയൂരി നാരീ എന്ന കപ്പലിനാണ് അപകടം സംഭവിച്ചത്. മേഖലയിൽ സുരക്ഷാ ഭീഷണി നിലനിൽക്കുന്നതിനാൽ കപ്പലുകൾക്ക് ഇറാൻ നൽകിയ നിർദ്ദേശങ്ങൾ പാലിക്കാതെ കടന്നുപോയതിനെത്തുടർന്നാണ് ആക്രമണം ഉണ്ടായതെന്നാണ് റിപ്പോർട്ടുകൾ സൂചിപ്പിക്കുന്നത്. ഇറാന്റെ ഔദ്യോഗിക വാർത്താ ഏജൻസിയായ തസ്നീം നൽകുന്ന വിവരങ്ങൾ പ്രകാരം, മിസൈൽ ഏറ്റ കപ്പലിൽ അതിശക്തമായ തീപിടുത്തം ഉണ്ടാവുകയും കപ്പൽ നിയന്ത്രണം വിട്ട് ഖെഷ്ം ദ്വീപിന് സമീപം മണൽതിട്ടയിൽ തറയുകയും ചെയ്തു. പശ്ചിമേഷ്യയിലെ ഏറ്റവും തന്ത്രപ്രധാനമായ കപ്പൽ പാതയായ ഹോർമുസ് കടലിടുക്കിൽ വെച്ചുണ്ടായ ഈ സംഭവം രാജ്യാന്തര തലത്തിൽ വലിയ ചർച്ചയായിരിക്കുകയാണ്. കപ്പലിലെ 20 ജീവനക്കാരെ ഒമാൻ നാവികസേന സാഹസികമായി രക്ഷപ്പെടുത്തിയതായി തായ്‌ലൻഡ് അധികൃതർ സ്ഥിരീകരിച്ചു. എന്നാൽ സ്ഫോടനത്തെത്തുടർന്ന് മൂന്ന് ജീവനക്കാരെ കാണാതായതായും ഇവർക്കായി തിരച്ചിൽ തുടരുകയാണെന്നും റിപ്പോർട്ടുകൾ വ്യക്തമാക്കുന്നു.

മിസൈൽ ആക്രമണത്തിൽ കപ്പലിന് ഗുരുതരമായ കേടുപാടുകൾ സംഭവിക്കുകയും കപ്പലിന്റെ പല ഭാഗങ്ങളും കത്തിയമരുകയും ചെയ്തു. കപ്പലിലെ ജീവനക്കാരെക്കുറിച്ചുള്ള കൂടുതൽ വിവരങ്ങൾക്കായി തായ്‌ലൻഡ് വിദേശകാര്യ മന്ത്രാലയം ഇറാൻ അധികൃതരുമായി ബന്ധപ്പെട്ടുവരികയാണ്. മേഖലയിൽ അമേരിക്കൻ സൈനിക സാന്നിധ്യവും യുദ്ധസമാനമായ സാഹചര്യവും നിലനിൽക്കുന്നതിനാൽ കപ്പൽ ഗതാഗതത്തിന് ഇറാൻ കർശന നിയന്ത്രണങ്ങൾ ഏർപ്പെടുത്തിയിരുന്നു. ഇത് ലംഘിക്കുന്ന കപ്പലുകൾക്ക് നേരെ കടുത്ത നടപടിയുണ്ടാകുമെന്ന് ഇറാൻ നേരത്തെ മുന്നറിയിപ്പ് നൽകിയിരുന്നു. സംഭവസ്ഥലത്ത് ഇറാൻ നാവികസേനയുടെ നേതൃത്വത്തിൽ പരിശോധനകൾ തുടരുകയാണ്. അന്താരാഷ്ട്ര വ്യാപാര പാതയിലെ ഈ ആക്രമണം ആഗോള ചരക്ക് നീക്കത്തെയും എണ്ണ വിപണിയെയും ബാധിക്കുമെന്ന ആശങ്കയിലാണ് വാണിജ്യ ലോകം.