അമേരിക്കയുടെ കണക്കുകൂട്ടലുകൾ തെറ്റുന്നു, ഇറാന്റെ പക്കൽ ഇനിയുമുണ്ട് ആയിരക്കണക്കിന് മിസൈലുകൾ: തകർക്കാനായത് 30 ശതമാനം മാത്രം, പെന്റഗൺ റിപ്പോർട്ട്

വാഷിങ്ടൺ: പശ്ചിമേഷ്യയിൽ ഇറാനുമായി നിലനിൽക്കുന്ന സൈനിക സംഘർഷത്തിനിടയിൽ അമേരിക്കൻ ഇന്റലിജൻസ് വിഭാഗം പുറത്തുവിട്ട പുതിയ റിപ്പോർട്ടുകൾ പ്രതിരോധ ലോകത്തെ ഞെട്ടിച്ചിരിക്കുകയാണ്. കഴിഞ്ഞ നാലാഴ്ചയായി ഇറാനിലെ വിവിധ സൈനിക കേന്ദ്രങ്ങൾക്ക് നേരെ അമേരിക്ക അതിശക്തമായ മിസൈൽ ആക്രമണങ്ങൾ നടത്തിയിരുന്നെങ്കിലും ഇറാന്റെ ആകെ മിസൈൽ ശേഖരത്തിന്റെ മൂന്നിലൊന്ന് ഭാഗം (ഏകദേശം 30 ശതമാനം) മാത്രമേ നശിപ്പിക്കാൻ സാധിച്ചിട്ടുള്ളൂ എന്ന് പെന്റഗൺ വൃത്തങ്ങൾ വെളിപ്പെടുത്തി. റോയിട്ടേഴ്സ് പുറത്തുവിട്ട ഈ റിപ്പോർട്ട് പ്രകാരം ഇറാന്റെ പക്കൽ ഇപ്പോഴും വലിയൊരു വിഭാഗം ബാലിസ്റ്റിക്, ക്രൂയിസ് മിസൈലുകൾ സുരക്ഷിതമായി ഇരിപ്പുണ്ട്. ഭൂമിക്കടിയിലെ രഹസ്യ താവളങ്ങളിലും മലനിരകളിലും ഒളിപ്പിച്ചിരിക്കുന്ന ഈ മിസൈലുകൾ കണ്ടെത്തുന്നത് അമേരിക്കൻ സൈന്യത്തിന് വലിയ വെല്ലുവിളിയായി തുടരുകയാണ്.

അമേരിക്ക എണ്ണൂറിലധികം ടോമാഹോക്ക് മിസൈലുകൾ ഉപയോഗിച്ച് നടത്തിയ ‘ഓപ്പറേഷൻ എപ്പിക് ഫ്യൂറി’ എന്ന സൈനിക നീക്കത്തിന് ശേഷവും ഇറാന്റെ പ്രത്യാക്രമണ ശേഷി കാര്യമായി കുറയ്ക്കാൻ സാധിച്ചിട്ടില്ലെന്നാണ് ഈ വിലയിരുത്തൽ സൂചിപ്പിക്കുന്നത്. ഇറാന്റെ മിസൈൽ സംവിധാനങ്ങൾ പൂർണ്ണമായും തകർക്കാൻ ഇനിയും മാസങ്ങളോളം നീണ്ടുനിൽക്കുന്ന ശക്തമായ ആക്രമണങ്ങൾ ആവശ്യമായി വരുമെന്ന് സൈനിക വിദഗ്ധർ ചൂണ്ടിക്കാട്ടുന്നു. തങ്ങളുടെ ആയുധപ്പുരയുടെ വലിയൊരു ഭാഗം ഇപ്പോഴും സജ്ജമാണെന്ന ഇറാന്റെ അവകാശവാദങ്ങൾ ശരിയാണെന്ന് ഇതോടെ തെളിഞ്ഞിരിക്കുകയാണ്. അമേരിക്കയുടെ മിസൈൽ ശേഖരത്തിൽ കുറവ് അനുഭവപ്പെടുന്ന സാഹചര്യത്തിൽ ഇറാന്റെ പക്കൽ ഇത്രയധികം ആയുധങ്ങൾ ബാക്കിയുള്ളത് യുദ്ധത്തിന്റെ ഗതി മാറ്റിയേക്കാം. വരും ദിവസങ്ങളിൽ ഇറാൻ കൂടുതൽ ശക്തമായ രീതിയിൽ തിരിച്ചടിക്കാനുള്ള സാധ്യതയുണ്ടെന്ന് മുന്നറിയിപ്പ് നൽകുന്ന റിപ്പോർട്ട് പശ്ചിമേഷ്യയിലെ സമാധാന ശ്രമങ്ങൾക്ക് വലിയ തിരിച്ചടിയാണ് നൽകുന്നത്. അമേരിക്കൻ സൈനിക നീക്കങ്ങളുടെ ഫലപ്രാപ്തിയെക്കുറിച്ച് ഇതോടെ അന്താരാഷ്ട്ര തലത്തിൽ വലിയ ചർച്ചകൾക്ക് തുടക്കമായിട്ടുണ്ട്.