വനിതാ സംവരണ നിയമം പ്രാബല്യത്തിൽ; ചർച്ചകൾക്കിടെ വിജ്ഞാപനം ഇറക്കിയത് വിചിത്രമെന്ന് കോൺഗ്രസ്

ന്യൂഡൽഹി: വനിതാ സംവരണ നിയമം (2023) രാജ്യത്ത് ഔദ്യോഗികമായി പ്രാബല്യത്തിൽ വരുത്തി കേന്ദ്ര നിയമ മന്ത്രാലയം വിജ്ഞാപനം പുറത്തിറക്കി. വനിതാ സംവരണവുമായി ബന്ധപ്പെട്ട ഭരണഘടനാ ഭേദഗതി ബില്ലിന്മേൽ പാർലമെന്റിൽ ചർച്ചകൾ തുടരുന്നതിനിടെയാണ് സർക്കാർ അപ്രതീക്ഷിതമായി ഉത്തരവ് പുറപ്പെടുവിച്ചത്. ബില്ലിന്മേലുള്ള നിർണ്ണായക വോട്ടെടുപ്പ് ഇന്ന് പാർലമെന്റിൽ നടക്കാനിരിക്കെയാണ് ഈ നീക്കം.

മണ്ഡല പുനർനിർണ്ണയ ബില്ലും വനിതാ സംവരണ ഭേദഗതി ബില്ലും സംബന്ധിച്ച് പാർലമെന്റിൽ ഇന്നലെ ദീർഘമായ ചർച്ചകളാണ് നടന്നത്. പുലർച്ചെ ഒന്നര വരെ നീണ്ടുനിന്ന ഗൗരവകരമായ ചർച്ചകൾക്കിടയിൽ ഇത്തരമൊരു വിജ്ഞാപനം ഇറക്കിയത് തികച്ചും വിചിത്രമായ നടപടിയാണെന്ന് കോൺഗ്രസ് നേതാവ് ജയ്റാം രമേശ് പ്രതികരിച്ചു. സർക്കാരിന്റെ ഈ നീക്കം വലിയ ആശയക്കുഴപ്പമുണ്ടാക്കുന്നതാണെന്നും അദ്ദേഹം കുറ്റപ്പെടുത്തി.

വനിതാ സംവരണത്തിന്റെ മറവിൽ മണ്ഡല പുനർനിർണ്ണയം നടത്തി രാജ്യത്തെ നിലവിലെ പാർലമെന്ററി സംവിധാനത്തെ തകർക്കാനാണ് സർക്കാർ ശ്രമിക്കുന്നതെന്നാണ് പ്രതിപക്ഷത്തിന്റെ പ്രധാന ആരോപണം. മണ്ഡലങ്ങളുടെ പുനർക്രമീകരണത്തിലൂടെ സീറ്റുകൾ വർദ്ധിപ്പിക്കുമ്പോൾ, ജനസംഖ്യാ നിയന്ത്രണം കൃത്യമായി നടപ്പിലാക്കിയ ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം ലോക്സഭയിൽ വലിയ തോതിൽ കുറയുമെന്നും പ്രതിപക്ഷം ഭയപ്പെടുന്നു. എന്നാൽ രാജ്യത്തെ വടക്കൻ സംസ്ഥാനങ്ങളെന്നും തെക്കൻ സംസ്ഥാനങ്ങളെന്നും രണ്ട് തട്ടിലാക്കുന്ന ഒരു നീക്കവും സർക്കാരിന്റെ ഭാഗത്തുനിന്നുണ്ടാകില്ലെന്ന് പ്രധാനമന്ത്രി നരേന്ദ്ര മോദി സഭയിൽ ഉറപ്പുനൽകി.