ഐഫോൺ സ്ക്രീനിലെ ‘ഗ്രേ ഡോട്ട്’ എങ്ങനെ ഒഴിവാക്കാം? ഇതാ ചില എളുപ്പവഴികൾ

ഐഫോണുകൾ ഉപയോഗിക്കുന്നവർക്ക് ഏറെ പ്രയോജനപ്രദമായ നിരവധി ഫീച്ചറുകൾ ലഭ്യമാണ്. ഒളിഞ്ഞിരിക്കുന്ന ബാക്ക് ടാപ്പ് ഫീച്ചർ മുതൽ കണ്ണിന്റെ ആയാസം കുറയ്ക്കുന്നതിനുള്ള പ്രത്യേക ഐ.ഒ.എസ് ഫീച്ചറുകൾ വരെ ഇതിൽ ഉൾപ്പെടുന്നു. സ്മാർട്ട്‌ഫോൺ കൂടുതൽ എളുപ്പത്തിൽ ഉപയോഗിക്കാൻ ഉപയോക്താക്കളെ സഹായിക്കുന്ന നിരവധി ആക്സസിബിലിറ്റി ഫീച്ചറുകളും ഇതിലുണ്ട്. ഇത്തരം ഫീച്ചറുകൾ ആവശ്യമുള്ളവർക്ക് വലിയൊരു സഹായമാണെങ്കിലും, ചിലപ്പോഴെങ്കിലും ഇവ കാരണം സ്ക്രീനിൽ നിങ്ങൾക്ക് ആവശ്യമില്ലാത്ത ഒരു ഗ്രേ ഡോട്ട് അഥവാ ചാരനിറത്തിലുള്ള കുത്ത് പ്രത്യക്ഷപ്പെടാൻ സാധ്യതയുണ്ട്.

ഐഒഎസ് 5 മുതൽ ആപ്പിൾ ഉൾപ്പെടുത്തിയിട്ടുള്ള ‘അസിസ്റ്റീവ് ടച്ച്’ എന്ന ഫീച്ചറാണിത്. ഫോണിലെ ഫിസിക്കൽ ബട്ടണുകൾക്ക് പകരം സ്ക്രീനിലെ ഈ ഡോട്ട് ഉപയോഗിച്ച് ഫോൺ പ്രവർത്തിപ്പിക്കാം എന്നതാണ് ഇതിന്റെ ഗുണം. വോളിയം ക്രമീകരിക്കാനും സ്ക്രീൻ ലോക്ക് ചെയ്യാനും മാത്രമല്ല, കൺട്രോൾ സെന്റർ, നോട്ടിഫിക്കേഷൻ സെന്റർ എന്നിവ തുറക്കുന്നതിനും സ്ക്രീനിലെ ഈ ഗ്രേ ഡോട്ട് വഴിയുള്ള മെനുവിലൂടെ വളരെ എളുപ്പത്തിൽ സാധിക്കും.

എത്ര ഉപകാരപ്രദമാണെങ്കിലും പലർക്കും സ്ക്രീനിൽ എപ്പോഴും നിൽക്കുന്ന ഈ ഡോട്ട് ഒരു ശല്യമായി മാറാറുണ്ട്. നിങ്ങൾക്ക് ഈ ഫീച്ചർ ആവശ്യമില്ലെങ്കിൽ ഐഫോണിലെ സെറ്റിങ്സ് വഴിയോ വോയ്‌സ് അസിസ്റ്റൻ്റ് വഴിയോ ഇത് വളരെ എളുപ്പത്തിൽ ഒഴിവാക്കാനാകും. ഇതിനുള്ള ഏറ്റവും എളുപ്പമുള്ള മാർഗ്ഗം ആപ്പിളിന്റെ വോയ്‌സ് അസിസ്റ്റന്റായ സിരിയോട് നേരിട്ട് ആവശ്യപ്പെടുക എന്നതാണ്. “ഹേയ് സിരി, ഡിസേബിൾ അസിസ്റ്റീവ് ടച്ച്” എന്ന് പറയുകയാണെങ്കിൽ സിരി തനിയെ ഈ ഫീച്ചർ ഓഫ് ചെയ്തുകൊള്ളും.

ഇനി ഫോണിലെ സെറ്റിങ്സ് ഉപയോഗിച്ചാണ് ഇത് മാറ്റുന്നതെങ്കിൽ, ആദ്യം ഐഫോണിലെ ‘സെറ്റിങ്സ്’ ആപ്പ് തുറന്ന് അതിൽ നിന്നും ‘ആക്സസിബിലിറ്റി’ എന്ന ഓപ്ഷൻ തിരഞ്ഞെടുക്കുക. ഇതിൽ നൽകിയിരിക്കുന്ന ‘ടച്ച്’ എന്ന ഓപ്ഷനിൽ ക്ലിക്ക് ചെയ്യുമ്പോൾ അസിസ്റ്റീവ് ടച്ച് കാണാൻ സാധിക്കും. ഇത് തിരഞ്ഞെടുത്ത് ടോഗിൾ ഓഫ് ചെയ്യുന്നതോടെ സ്ക്രീനിലെ ഗ്രേ ഡോട്ട് പൂർണ്ണമായും അപ്രത്യക്ഷമാകും. വീണ്ടും ഈ ഫീച്ചർ ഓൺ ചെയ്യണമെങ്കിൽ ഇതേ രീതി തന്നെ പിന്തുടരുകയോ സിരിയുടെ സഹായം തേടുകയോ ചെയ്യാം.

ഇനി നിങ്ങൾക്ക് അസിസ്റ്റീവ് ടച്ച് ഫീച്ചർ ഉപയോഗിക്കാൻ താല്പര്യമുണ്ടെങ്കിലും, സ്ക്രീനിൽ ഈ കുത്ത് എപ്പോഴും തെളിഞ്ഞുനിൽക്കുന്നത് ഇഷ്ടമല്ലെങ്കിൽ അതിനും പരിഹാരമുണ്ട്. സ്ക്രീനിൽ അധികം ശ്രദ്ധിക്കപ്പെടാത്ത രീതിയിൽ ഈ ഡോട്ടിന്റെ നിറം മങ്ങാനായി ക്രമീകരിക്കാൻ സാധിക്കും. മുകളിൽ പറഞ്ഞ അതേ രീതിയിൽ സെറ്റിങ്സിൽ പോയി അസിസ്റ്റീവ് ടച്ച് മെനുവിൽ നിന്നും ‘ഐഡിൽ ഒപ്പാസിറ്റി’ എന്ന സ്ലൈഡർ ഓപ്ഷൻ കണ്ടെത്തി ആവശ്യത്തിനനുസരിച്ച് അതിൽ മാറ്റങ്ങൾ വരുത്തിയാൽ മതിയാകും. ഇതിന് പുറമെ അസിസ്റ്റീവ് ടച്ച് മെനുവിൽ തന്നെയുള്ള മറ്റ് നിരവധി മികച്ച ഓപ്ഷനുകളും ഉപയോക്താക്കൾക്ക് അവരുടെ ആവശ്യാനുസരണം പരീക്ഷിക്കാവുന്നതാണ്.