‘അമേരിക്കൻ വിധേയത്വം കാരണം ജപ്പാൻ സ്വന്തം ചരിത്രം മറക്കുന്നു’; ഹിരോഷിമ അനുസ്മരണത്തിൽ അമേരിക്കയുടെ പേര് ഒഴിവാക്കിയതിൽ രൂക്ഷവിമർശനവുമായി റഷ്യ
മോസ്ക്കോ: ഹിരോഷിമ അണുബോംബ് ആക്രമണത്തിന്റെ 81-ാം വാർഷിക അനുസ്മരണത്തിൽ ദുരന്തത്തിന് കാരണക്കാരായ അമേരിക്കയുടെ പേര് ബോധപൂർവം ഒഴിവാക്കിയ ജപ്പാൻ സർക്കാരിന്റെ നടപടിക്കെതിരെ രൂക്ഷവിമർശനവുമായി റഷ്യ. അമേരിക്കയോടുള്ള അമിതമായ രാഷ്ട്രീയ വിധേയത്വം കാരണം ജപ്പാൻ സ്വന്തം ചരിത്രവും ദുരന്തത്തിൽ കൊല്ലപ്പെട്ട പതിനായിരക്കണക്കിന് നിരപരാധികളുടെ ഓർമ്മകളും അവഗണിക്കുകയാണെന്ന് റഷ്യൻ സുരക്ഷാ കൗൺസിൽ ഡെപ്യൂട്ടി ചെയർമാൻ ദിമിത്രി മെദ്വദേവ് കുറ്റപ്പെടുത്തി.
ഓഗസ്റ്റ് 6-ന് ഹിരോഷിമയിൽ നടന്ന അനുസ്മരണച്ചടങ്ങിൽ സംസാരിച്ച ജാപ്പനീസ് പ്രധാനമന്ത്രി സനേ തകായിച്ചിയോ മറ്റ് പ്രാദേശിക ഭരണാധികാരികളോ ലോകചരിത്രത്തിലെ ഏറ്റവും വലിയ ഈ ദുരന്തത്തിന് പിന്നിൽ അമേരിക്കയാണെന്ന യാഥാർത്ഥ്യം പരാമർശിക്കാൻ തയ്യാറായിരുന്നില്ല. പകരം, ഉക്രൈൻ യുദ്ധത്തിന്റെ പശ്ചാത്തലത്തിൽ ഹിരോഷിമ മേയർ കസുമി മാറ്റ്സുമി റഷ്യയെ വിമർശിക്കുകയാണ് ചെയ്തത്. ഈ സാഹചര്യത്തിലാണ് റഷ്യയുടെ ശക്തമായ പ്രതികരണം. ജപ്പാൻ അമേരിക്കയുടെ വെറുമൊരു ആശ്രിത രാജ്യമായി അധഃപതിച്ചിരിക്കുകയാണെന്നും നിലവിലെ ഭൗമരാഷ്ട്രീയ സഖ്യങ്ങളുടെ പേരിൽ ചരിത്രസത്യങ്ങളെ അവർ വളച്ചൊടിക്കുകയാണെന്നും മെദ്വദേവ് തുറന്നടിച്ചു.
ലോകചരിത്രത്തിലെ ഏറ്റവും ദാരുണമായ ഈ കൂട്ടക്കുരുതി നടത്തിയത് ആരാണെന്ന് മറച്ചുവെക്കാനുള്ള ജാപ്പനീസ് ഭരണകൂടത്തിന്റെ ശ്രമം തികച്ചും അപലപനീയമാണെന്ന് റഷ്യൻ നേതാവ് വ്യക്തമാക്കി. 1945 ഓഗസ്റ്റിലാണ് ജപ്പാനിലെ ഹിരോഷിമയിലും നാഗസാക്കിയിലും അമേരിക്ക അണുബോംബ് വർഷിച്ചത്. ആദ്യത്തെ ആക്രമണത്തിൽ ഹിരോഷിമയിൽ 1,40,000 പേരും, മൂന്ന് ദിവസങ്ങൾക്ക് ശേഷം നാഗസാക്കിയിലുണ്ടായ രണ്ടാമത്തെ ആക്രമണത്തിൽ 70,000-ത്തോളം ജാപ്പനീസ് പൗരന്മാരുമാണ് ദാരുണമായി കൊല്ലപ്പെട്ടത്. നഗരത്തിന്റെ വലിയൊരു ഭാഗം തന്നെ അന്ന് തകർന്നടിഞ്ഞിരുന്നു. ഈ യാഥാർത്ഥ്യങ്ങളാണ് ജപ്പാൻ ഇപ്പോൾ സൗകര്യപൂർവം മറക്കുന്നതെന്ന് റഷ്യ ചൂണ്ടിക്കാട്ടുന്നു.
