പിടി ഉഷയുടെ 42 വർഷം പഴക്കമുള്ള റെക്കോർഡ് തിരുത്തി വിദ്യ രാംരാജ്; ഏഷ്യൻ ഗെയിംസിൽ ചരിത്ര വെങ്കലം

നഗോയ: ജപ്പാനിലെ ഐച്ചി-നഗോയയിൽ നടക്കുന്ന ഏഷ്യൻ ഗെയിംസിൽ ഇന്ത്യൻ അത്‌ലറ്റിക്സിന് അഭിമാനകരമായ ചരിത്ര നേട്ടം. വനിതകളുടെ 400 മീറ്റർ ഹർഡിൽസിൽ ഇന്ത്യയുടെ വിദ്യ രാംരാജ് വെങ്കല മെഡൽ സ്വന്തമാക്കി.

ഇന്ത്യൻ ട്രാക്ക് ആൻഡ് ഫീൽഡിലെ ഇതിഹാസ താരം പിടി ഉഷയുടെ 42 വർഷം പഴക്കമുള്ള ദേശീയ റെക്കോർഡ് തിരുത്തിക്കൊണ്ടാണ് വിദ്യ ഈ മെഡൽ നേട്ടം കൈവരിച്ചത്. ഫൈനലിൽ 54.75 സെക്കൻഡിലാണ് വിദ്യ ഫിനിഷിങ് ലൈൻ തൊട്ടത്. 1984-ലെ ലോസ് ആഞ്ചലസ് ഒളിമ്പിക്സിൽ പിടി ഉഷ കുറിച്ച 55.42 സെക്കൻഡ് എന്ന റെക്കോർഡാണ് ഇതോടെ പഴങ്കഥയായത്. 0.67 സെക്കൻഡിന്റെ വ്യത്യാസത്തിലാണ് നാലര പതിറ്റാണ്ടോളം ആർക്കും തകർക്കാൻ കഴിയാതിരുന്ന ഉഷയുടെ റെക്കോർഡ് വിദ്യ മറികടന്നത്.

ഈ മത്സരത്തിൽ യു.എ.ഇയുടെ കരീം മറിയം സ്വർണ്ണവും, കസാഖ്സ്ഥാന്റെ സെംസ് അഡെലീന വെള്ളിയും നേടി. ഇവർക്ക് തൊട്ടുപിന്നാലെ മൂന്നാമതായാണ് വിദ്യ മത്സരം പൂർത്തിയാക്കിയത്. മുൻപ് നടന്ന 2022-ലെ ഹാംങ്ചൗ ഏഷ്യൻ ഗെയിംസിലും വിദ്യ ഇതേ ഇനത്തിൽ വെങ്കലം നേടിയിരുന്നു. അന്ന് പി.ടി ഉഷയുടെ റെക്കോർഡിനൊപ്പമെത്താൻ താരത്തിന് കഴിഞ്ഞിരുന്നു.

ഇന്ത്യൻ അത്‌ലറ്റിക്സ് ചരിത്രത്തിലെ ഏറ്റവും ശ്രദ്ധേയമായ നാഴികക്കല്ലുകളിലൊന്നായ ഈ റെക്കോർഡ് തിരുത്താൻ കഴിഞ്ഞത് വിദ്യയുടെ കരിയറിലെ ഏറ്റവും വലിയ നേട്ടങ്ങളിലൊന്നായാണ് വിലയിരുത്തപ്പെടുന്നത്. ഏഷ്യൻ ഗെയിംസിൽ ട്രാക്ക് ആൻഡ് ഫീൽഡിൽ ഉൾപ്പെടെ ഇന്ത്യയുടെ മികച്ച പ്രകടനം തുടരുന്നതിനിടയിലാണ് രാജ്യത്തിന് ഈ സുപ്രധാന മെഡൽ നേട്ടം സ്വന്തമായിരിക്കുന്നത്.