ഗ്രാസിയാസ് ലിയോ; കണ്ണീരണിഞ്ഞ് ഫുട്ബോൾ ലോകം; അർജൻ്റീനയിൽ മെസി യുഗത്തിന് വികാരനിർഭരമായ അന്ത്യം
ബ്യൂണസ് ഐറിസ്: ലോക ഫുട്ബോൾ ചരിത്രത്തിലെ സമാനതകളില്ലാത്ത രണ്ട് പതിറ്റാണ്ട് നീണ്ട യുഗത്തിന് വികാരനിർഭരമായ അന്ത്യം. അർജന്റീനയുടെ ഇതിഹാസ നായകൻ ലയണൽ മെസി അന്താരാഷ്ട്ര ഫുട്ബോളിൽ നിന്ന് പടിയിറങ്ങി. സ്വന്തം കാണികൾക്ക് മുന്നിൽ എസ്റ്റാഡിയോ മോണുമെന്റലിൽ ബെനിനെതിരെ നടന്ന സൗഹൃദ മത്സരത്തിൽ അർജന്റീന എതിരില്ലാത്ത മൂന്ന് ഗോളുകൾക്ക് വിജയിച്ചപ്പോൾ, ഒരു ഗോളും രണ്ട് അസിസ്റ്റുകളുമായി മെസി തന്റെ വിടവാങ്ങൽ മത്സരം അവിസ്മരണീയമാക്കി. അർജന്റീനയ്ക്കായി ഏറ്റവും കൂടുതൽ മത്സരങ്ങൾ കളിച്ച, ഏറ്റവും കൂടുതൽ ഗോളുകൾ നേടിയ താരമെന്ന റെക്കോർഡുകൾ സ്വന്തം പേരിലെഴുതിച്ചേർത്താണ് ലിയോ മടങ്ങുന്നത്.
‘ദി ലാസ്റ്റ് ടാംഗോ’ എന്ന് വിശേഷിപ്പിക്കപ്പെട്ട ചരിത്രമത്സരത്തിന് സാക്ഷ്യം വഹിക്കാൻ 85,000-ത്തോളം ആരാധകരാണ് ഗാലറിയിലുണ്ടായിരുന്നത്. അർജന്റീനൻ കുപ്പായത്തിലെ തന്റെ 208-ാം മത്സരത്തിനിറങ്ങിയ മെസി , 71-ാം മിനിറ്റിൽ ലഭിച്ച പെനാൽറ്റി വലയിലെത്തിച്ച് ദേശീയ ടീമിനായുള്ള 126-ാം ഗോളും സ്വന്തമാക്കി. നികോളാസ് ഒട്ടമെൻഡി, നിക്കോ പാസ് എന്നിവർ നേടിയ മറ്റ് രണ്ട് ഗോളുകൾക്ക് വഴിയൊരുക്കിയതും ഈ ഇതിഹാസ താരമായിരുന്നു.
ഫുട്ബോൾ ലോകത്തെയാകെ കണ്ണീരിലാഴ്ത്തിയ വൈകാരിക നിമിഷങ്ങൾക്കാണ് മോണുമെന്റൽ സ്റ്റേഡിയം സാക്ഷിയായത്. സ്റ്റേഡിയത്തിലേക്കുള്ള യാത്രാമധ്യേ ആരാധകരുടെ സ്നേഹപ്രകടനങ്ങൾ കണ്ട് ബസ്സിലിരുന്ന് കണ്ണീരണിഞ്ഞ മെസി, തന്റെ മൂന്ന് മക്കളുടെ കൈപിടിച്ചാണ് അവസാനമായി മൈതാനത്തേക്ക് എത്തിയത്. ഭാര്യ അന്റൊണെല്ല റൊക്കൂസോയും അമ്മ സെലിയ കുച്ചിറ്റിനിയും വിഐപി ബോക്സിലിരുന്ന് മത്സരം വീക്ഷിച്ചു. മെസ്സിയുടെ പത്താം നമ്പർ ജേഴ്സിയോടുള്ള ആദരസൂചകമായി കളിയുടെ പത്താം മിനിറ്റിൽ മത്സരം നിർത്തിവെച്ച് ഗാലറിയും ഇരു ടീമുകളും ഒരു മിനിറ്റ് നീണ്ട ആദരമർപ്പിച്ചു. ദേശീയഗാനം ആലപിക്കുന്ന സമയത്ത് മെസിയും പരിശീലകൻ ലയണൽ സ്‌കലോണിയും വിതുമ്പുന്നുണ്ടായിരുന്നു.
മത്സരത്തിന് മുന്നോടിയായി ബ്യൂണസ് ഐറിസ് സർവകലാശാല മെസിക്ക് ഹോണററി ഡോക്ടറേറ്റ് സമ്മാനിച്ചു. മത്സരം അവസാനിച്ചതോടെ ആകാശത്ത് മെസിയുടെ ചിത്രങ്ങളും കരിയറിലെ നേട്ടങ്ങളും തെളിയിച്ചുകൊണ്ടുള്ള അത്യാധുനിക ഡ്രോൺ ഷോയും സംഘടിപ്പിച്ചിരുന്നു. 2022-ൽ ഖത്തറിൽ ലോകകപ്പ് കിരീടമുയർത്തി സാക്ഷാൽ ഡീഗോ മറഡോണയുടെ യഥാർത്ഥ പിൻഗാമിയായി മാറിയ അദ്ദേഹം, രാജ്യത്തിന് രണ്ട് കോപ അമേരിക്ക കിരീടങ്ങളും സമ്മാനിച്ചാണ് അന്താരാഷ്ട്ര വേദിയിൽ നിന്ന് വിടവാങ്ങുന്നത്. ദേശീയ കുപ്പായം അഴിച്ചുവെച്ചെങ്കിലും 2028 വരെ അമേരിക്കൻ ക്ലബ്ബായ ഇന്റർ മയാമിക്ക് വേണ്ടി മെസി ബൂട്ടണിയും.
