മുളകുപൊടിയിൽ 30 ശതമാനവും ചാണകം! ഞെട്ടിക്കുന്ന മായം കലർത്തൽ; ഹൈദരാബാദിലെ മസാല നിർമ്മാണ യൂണിറ്റിൽ വൻ റെയ്ഡ്;25 ലക്ഷം രൂപയുടെ സാധനങ്ങൾ പിടിച്ചെടുത്തു
ഹൈദരാബാദ്: ഹൈദരാബാദിലെ മൽക്കാജ്ഗിരി പോലീസ് സ്റ്റേഷൻ പരിധിയിൽ വരുന്ന ശ്രീനിവാസ് നഗർ കോളനിയിൽ പ്രവർത്തിച്ചിരുന്ന ‘സായി തിരുമല എന്റർപ്രൈസസ്’ എന്ന മസാല നിർമ്മാണ യൂണിറ്റിൽ പോലീസ് മിന്നൽ പരിശോധന നടത്തി. സ്പെഷ്യൽ ഓപ്പറേഷൻ ടീമും ഫുഡ് അഡൾട്ടറേഷൻ സർവൈലൻസ് ടീമും സംയുക്തമായാണ് ഈ പരിശോധന നടത്തിയത്. ഇവിടെ നിർമ്മിച്ചിരുന്ന മുളകുപൊടിയിൽ 30 ശതമാനത്തോളം ചാണകപ്പൊടി കലർത്തിയിരുന്നതായി പോലീസ് കണ്ടെത്തി.
യാതൊരുവിധ ആരോഗ്യ സുരക്ഷാ മാനദണ്ഡങ്ങളും പാലിക്കാതെ, തികച്ചും വൃത്തിഹീനമായ സാഹചര്യത്തിലാണ് ഇവിടെ മഞ്ഞൾപ്പൊടി, മുളകുപൊടി, മല്ലിപ്പൊടി, ഗരം മസാല എന്നിവ തയ്യാറാക്കിയിരുന്നത്. മാത്രമല്ല, പ്രമുഖ ബ്രാൻഡുകളുടേതിന് സമാനമായ വ്യാജ പാക്കറ്റുകളിലും ലേബലുകളിലുമാണ് ഈ മായം കലർന്ന ഉൽപ്പന്നങ്ങൾ വിപണിയിലെത്തിച്ചിരുന്നത്.
റെയ്ഡിൽ ഏകദേശം 25 ലക്ഷം രൂപ വിലമതിക്കുന്ന 10.89 ടൺ സുഗന്ധവ്യഞ്ജനങ്ങളാണ് പോലീസ് പിടിച്ചെടുത്തത്. ഇതിൽ 3,350 കിലോ മുളകുപൊടി, 2,300 കിലോ മഞ്ഞൾപ്പൊടി, 5,140 കിലോ മല്ലിപ്പൊടി, 100 കിലോ ഗരം മസാല എന്നിവ ഉൾപ്പെടുന്നു. നിർമ്മാണത്തിനും പാക്കിംഗിനുമായി ഉപയോഗിച്ചിരുന്ന അസംസ്കൃത വസ്തുക്കളും യന്ത്രങ്ങളും പോലീസ് പരിശോധിച്ചു.
ഉപഭോക്താക്കളുടെ വിശ്വാസം മുതലെടുത്ത് ഇത്തരം ആരോഗ്യത്തിന് ഹാനികരമായ ഉൽപ്പന്നങ്ങൾ വിപണിയിലെത്തിക്കുന്നവർക്കെതിരെ കർശന നടപടി സ്വീകരിക്കുമെന്ന് മൽക്കാജ്ഗിരി പോലീസ് കമ്മീഷണർ ബി. സുമതി മുന്നറിയിപ്പ് നൽകി. സംഭവവുമായി ബന്ധപ്പെട്ട് സത്യനാരായണ, രുദ്രശേഖർ എന്നീ രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്. പിടിച്ചെടുത്ത സാധനങ്ങൾ തുടർനടപടികൾക്കായി മേഡിപ്പള്ളി പോലീസ് സ്റ്റേഷന് കൈമാറി.
ഭക്ഷ്യ ഉൽപ്പന്നങ്ങൾ വാങ്ങുമ്പോൾ ബ്രാൻഡിന്റെ പേര്, നിർമ്മിച്ച തീയതി, കാലാവധി അവസാനിക്കുന്ന തീയതി , ബാച്ച് നമ്പർ, FSSAI വിവരങ്ങൾ എന്നിവ കൃത്യമായി പരിശോധിച്ചുറപ്പുവരുത്തണമെന്ന് പോലീസ് പൊതുജനങ്ങളോട് അഭ്യർത്ഥിച്ചു. മായം കലർത്തുന്നതുമായി ബന്ധപ്പെട്ട സംശയകരമായ പ്രവർത്തനങ്ങൾ ശ്രദ്ധയിൽപ്പെട്ടാൽ 8712662111 എന്ന നമ്പറിൽ പോലീസിനെ വിവരമറിയിക്കാവുന്നതാണ്.
