ഫോട്ടോകോപ്പി കടയിൽ നിന്ന് കണ്ടെത്തിയത് 3,400 എസ്ഐആർ ഫോമുകൾ; ബിജെപി നേതാവിനെതിരെ കേസ്, 5 ഉദ്യോഗസ്ഥർക്ക് സസ്പെൻഷൻ

മുംബൈ: നവി മുംബൈയിലെ കാർഘറിൽ ഒരു ഫോട്ടോകോപ്പി കടയിൽ നിന്ന് വോട്ടർ പട്ടിക പുതുക്കുന്നതുമായി ബന്ധപ്പെട്ട 3,400-ഓളം എസ്ഐആർ ഫോമുകൾ അനധികൃതമായി കണ്ടെത്തിയ സംഭവത്തിൽ പോലീസ് കേസെടുത്തു. രേഖകൾ കൈവശം വെക്കുകയും അത് വ്യക്തിപരമായ ആവശ്യങ്ങൾക്കായി ഫോട്ടോകോപ്പി എടുക്കുകയും ചെയ്ത ബിജെപി യുവമോർച്ചാ കമ്മിറ്റി അംഗം സൂരജ് പാട്ടീലിനെതിരെയാണ് എഫ്.ഐ.ആർ രജിസ്റ്റർ ചെയ്തിരിക്കുന്നത്.

സംഭവവുമായി ബന്ധപ്പെട്ട് 5 ബൂത്ത് ലെവൽ ഓഫീസർമാരെയും പൻവേൽ സിറ്റി മുൻസിപ്പൽ കോർപ്പറേഷൻ സസ്പെൻഡ് ചെയ്തു. വോട്ടെടുപ്പിന്റെ രഹസ്യസ്വഭാവം ലംഘിച്ചതിനും, നിയമവിരുദ്ധമായി സർക്കാർ രേഖകൾ സ്വന്തം ആവശ്യത്തിനായി മാറ്റിയതിനും ഭാരതീയ ന്യായ സംഹിതയിലെ സെക്ഷൻ 314 പ്രകാരമാണ് കേസെടുത്തിരിക്കുന്നത്. കുറഞ്ഞത് രണ്ട് വർഷം വരെ തടവുശിക്ഷ ലഭിക്കാവുന്ന കുറ്റമാണിത്.

വ്യാഴാഴ്ചയാണ് ഈ സംഭവം പുറത്തറിയുന്നത്. കാർഘറിലെ സെക്ടർ 19-ൽ പ്രവർത്തിക്കുന്ന റാംഷേത്ത് താക്കൂർ പബ്ലിക് സ്കൂളിനടുത്തുള്ള ഫോട്ടോകോപ്പി കടയിൽ ഒറിജിനൽ വോട്ടർ പട്ടികാ ഫോമുകൾ കൂട്ടത്തോടെ കിടക്കുന്നത് കണ്ട ശിവസേന (ഉദ്ധവ് പക്ഷം) പ്രവർത്തകനായ ഒരു അഭിഭാഷകൻ പോലീസിൽ വിവരമറിയിക്കുകയായിരുന്നു. തുടർന്ന് ശിവസേന (UBT) നേതാവ് ബാലേഷ് ഭോജനെയുടെ നേതൃത്വത്തിൽ 11 പോളിംഗ് സ്റ്റേഷനുകളിൽ നിന്നുള്ള 11 ബ്ലാങ്ക് ഫോമുകൾ ഉൾപ്പെടെ 3,404 ഫോമുകൾ ഇവിടെ നിന്നും പിടിച്ചെടുത്തു.

വിവരമറിഞ്ഞ് പോലീസ് സൂരജ് പാട്ടീലിനെ കാർഘർ പോലീസ് സ്റ്റേഷനിൽ എത്തിച്ചെങ്കിലും ഇയാൾ അവിടെ നിന്ന് കടന്നുകളഞ്ഞത് വലിയ നാടകീയ രംഗങ്ങൾക്ക് വഴിവെച്ചു. പിന്നീട് നൂറുകണക്കിന് ശിവസേന പ്രവർത്തകർ സ്റ്റേഷന് മുന്നിൽ തടിച്ചുകൂടി പ്രതിഷേധിച്ചതിന് ശേഷമാണ് പോലീസ് ഇയാൾക്കെതിരെ എഫ്.ഐ.ആർ രജിസ്റ്റർ ചെയ്തത്. പി.സി.എം.സി കമ്മീഷണർ മങ്കേഷ് ചിതാലെയാണ് അഞ്ച് ബൂത്ത് ലെവൽ ഉദ്യോഗസ്ഥർക്ക് കാരണം കാണിക്കൽ നോട്ടീസ് നൽകിയ ശേഷം സസ്പെൻഡ് ചെയ്തത്. സ്വകാര്യ കമ്പനിയിൽ നിന്ന് കരാറടിസ്ഥാനത്തിൽ ജോലി ചെയ്യുന്ന ഡാറ്റാ എൻട്രി ഓപ്പറേറ്റർമാരായ സുലോചന മാനെ, പ്രശാന്ത് മഹത്രെ, രാഹുൽ ഭഗത് എന്നിവരും ഇതിൽ ഉൾപ്പെടുന്നു.

തെരഞ്ഞെടുപ്പ് പ്രക്രിയയിലെ വീഴ്ചകൾ ചൂണ്ടിക്കാട്ടി ശിവസേന നേതാക്കൾ നേരത്തെ തന്നെ പൻവേൽ സബ് ഡിവിഷണൽ ഓഫീസർക്ക് പരാതി നൽകിയിരുന്നു. സംഭവത്തിൽ പൻവേൽ ഡെപ്യൂട്ടി മുനിസിപ്പൽ കമ്മീഷണർ നാനാസാഹേബ് കാമത്തെ, അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർ എന്നിവരടങ്ങുന്ന രണ്ടംഗ സമിതിയെ സമഗ്രമായ അന്വേഷണത്തിനായി നിയോഗിച്ചിട്ടുണ്ട്. ബിജെപി ഓഫീസുകളിൽ ഫോമുകൾ പൂരിപ്പിക്കുന്നതിനെക്കുറിച്ച് പരാതി നൽകിയിട്ടും പ്രതിരോധ നടപടികൾ സ്വീകരിക്കാത്ത പൻവേൽ എസ്.ഡി.ഒയ്‌ക്കെതിരെ നടപടി വേണമെന്ന് ബാലേഷ് ഭോജനെ ആവശ്യപ്പെട്ടു.

തെരഞ്ഞെടുപ്പിൽ വിജയം ഉറപ്പാക്കാൻ ബിജെപി ഇത്തരം മാർഗ്ഗങ്ങൾ ഉപയോഗിക്കുകയാണെന്നും, ബിഎൽഒമാരെ മാത്രം സസ്പെൻഡ് ചെയ്താൽ പോര, ഇതിന് നിർദ്ദേശം നൽകിയ ഉന്നതർക്കെതിരെയും ബിജെപി പ്രവർത്തകർക്കെതിരെയും കർശന നടപടി വേണമെന്നും എൻ.സി.പി (ശരദ് പവാർ വിഭാഗം) എം.എൽ.എ രോഹിത് പവാറും ആവശ്യപ്പെട്ടു. എന്നാൽ ആരോപണവിധേയരുമായി പാർട്ടിക്ക് യാതൊരു ബന്ധവുമില്ലെന്നാണ് ബിജെപി നേതൃത്വത്തിന്റെ വിശദീകരണം.