കോഹ്ലിയുടെ ഡ്രൈവറായി ധോണി! വീട്ടിലെ ഡിന്നറിനു ശേഷം ഹോട്ടലില് ‘ഡ്രോപ്’ ചെയ്ത് മുന് ഇന്ത്യന് നായകന്; ‘റീയൂണിയന് ഓഫ് ദി ഇയര്’ ദൃശ്യങ്ങള് വൈറല്
റാഞ്ചി: ഇന്ത്യൻ ക്രിക്കറ്റിലെ ഏറ്റവും ഹൃദയസ്പർശിയായ നിമിഷങ്ങളിലൊന്നിനാണ് ധോണിയുടെ സ്വന്തം നഗരമായ റാഞ്ചി സാക്ഷ്യം വഹിച്ചത്. മുൻ ഇന്ത്യൻ ക്യാപ്റ്റൻ എം.എസ്. ധോണി, സൂപ്പർ താരം വിരാട് കോഹ്ലിയെ തന്റെ എസ്യുവിയിൽ ഹോട്ടലിലേക്ക് നേരിട്ട് കൊണ്ടുപോകുന്ന ദൃശ്യങ്ങളാണ് ഇന്നലെ രാത്രി സോഷ്യൽ മീഡിയയിൽ തരംഗമായത്.
റാഞ്ചിയിലെ വസതിയിൽ കോഹ്ലിക്കും വിക്കറ്റ് കീപ്പറും ബാറ്റ്സ്മാനുമായ ഋഷഭ് പന്തിനും ധോണി ഒരു സ്വകാര്യ അത്താഴ വിരുന്ന് ഒരുക്കിയിരുന്നു. വിരുന്ന് അവസാനിച്ച ശേഷം, രാത്രി ഏറെ വൈകി, യാതൊരു സുരക്ഷാ അകമ്പടിയുമില്ലാതെ ധോണി തന്നെ ഡ്രൈവ് ചെയ്ത് കോഹ്ലിയെ ടീം ഹോട്ടലിൽ എത്തിക്കുന്ന കാഴ്ച ആരാധകർക്കിടയിൽ വലിയ വൈകാരിക പ്രതികരണമുണ്ടാക്കി. ‘റീയൂണിയൻ ഓഫ് ദി ഇയർ’ എന്ന അടിക്കുറിപ്പോടെ സ്റ്റാർ സ്പോർട്സാണ് ഈ വീഡിയോ പങ്കുവെച്ചത്.
ദക്ഷിണാഫ്രിക്കയ്ക്കെതിരായ ഏകദിന പരമ്പരയിൽ പങ്കെടുക്കാനായാണ് കോഹ്ലി റാഞ്ചിയിലെത്തിയത്. മകൻ അകായിയുടെ ജനനത്തെത്തുടർന്ന് ക്രിക്കറ്റിൽ നിന്ന് വിട്ടുനിന്ന ശേഷം കോഹ്ലി തിരിച്ചെത്തുന്ന ആദ്യ പരമ്പരയാണിത്. പരിക്കേറ്റ ശുഭ്മാൻ ഗില്ലിനും ശ്രേയസ് അയ്യർക്കും പകരം കെ.എൽ രാഹുൽ നയിക്കുന്ന മൂന്ന് മത്സരങ്ങളുള്ള ഈ പരമ്പരയിൽ, കോഹ്ലി മൂന്നാം സ്ഥാനത്ത് ബാറ്റിംഗിന് തിരിച്ചെത്തും.
ഒരു വർഷത്തിലേറെത്തെ ഇടവേളയ്ക്ക് ശേഷം ഋഷഭ് പന്തും ഏകദിന ടീമിലേക്ക് മടങ്ങിയെത്തുന്നത് ആരാധകർക്ക് ആവേശം നൽകുന്നുണ്ട്. കോഹ്ലി അവസാനമായി ഇന്ത്യക്കായി കളിച്ചത് ഒക്ടോബർ 25ന് സിഡ്നിയിൽ ഓസ്ട്രേലിയയ്ക്കെതിരെയായിരുന്നു.
