ബ്ലൂംബെർഗ് മുതൽ എയർ ബി.എൻ.ബി വരെ ; മാംദാനി തോൽപ്പിച്ചത് ശതകോടീശ്വരന്മാർ ഒഴുക്കിയ മില്യൺ ഡോളറുകളെ

ന്യൂയോര്‍ക്ക്‌: യുഎസ്സിലെ ഏറ്റവും വലിയ നഗരമായ ന്യൂയോർക്കിന്റെ മേയറായി തെരഞ്ഞെടുക്കപ്പെട്ട സൊഹ്‌റാൻ മംദാനിയുടെ വിജയം അമേരിക്കൻ രാഷ്ട്രീയത്തിലെ ഒരു സുപ്രധാന നാഴികക്കല്ലാണ്. ചെറുപ്പക്കാരുടെയും കുടിയേറ്റക്കാരുടെയും പിന്തുണയിൽ വിജയം നേടിയ മംദാനി, തന്നെ പരാജയപ്പെടുത്താൻ ദശലക്ഷക്കണക്കിന് ഡോളർ ഒഴുക്കിയ 20-ൽ അധികം ശതകോടീശ്വരന്മാരുടെ ശ്രമങ്ങളെക്കൂടിയാണ് നിഷ്പ്രഭമാക്കിയത്.

ജനുവരി ഒന്നിന് സ്ഥാനമേൽക്കുമ്പോൾ, യുണൈറ്റഡ് സ്റ്റേറ്റ്സിൽ തെരഞ്ഞെടുക്കപ്പെട്ട മുസ്‌ലിം ഉദ്യോഗസ്ഥരിൽ ഏറ്റവും ഉയർന്ന പദവിയിലുള്ള വ്യക്തിയായി മംദാനി മാറും.

പുരോഗമനപരമായ നിലപാടുകളുള്ള മംദാനിയുടെ വിജയം തടയാൻ വൻകിട കോർപ്പറേറ്റുകളും ധനികരും ചേർന്ന് മുൻ ന്യൂയോർക്ക് ഗവർണർ ആൻഡ്രു കൂമോയെ പിന്തുണച്ച് ദശലക്ഷക്കണക്കിന് ഡോളറാണ് ഒഴുക്കിയത്. മംദാനിയുടെ ഡെമോക്രാറ്റിക് പ്രൈമറി പോരാട്ടം മുതലിതുവരെ കോടികൾ ചെലവഴിച്ച പ്രമുഖരുടെ പട്ടിക ശ്രദ്ധേയമാണ്:

മൈക്കിൾ ബ്ലൂംബെർഗ്: ന്യൂയോർക്ക് സിറ്റിയുടെ മുൻ മേയറും ബ്ലൂംബെർഗ് എൽ.പി. സഹസ്ഥാപകനുമായ മൈക്കിൾ ബ്ലൂംബെർഗ്, പ്രചാരണത്തിന്റെ അവസാന മാസത്തിൽ കൂമോയുടെ ‘ഫിക്സ് ദ സിറ്റി’ (Fix the City) കമ്മിറ്റിക്ക് $5 ദശലക്ഷം സംഭാവന നൽകി. പ്രൈമറിയിൽ ഇതിന് മുമ്പും അദ്ദേഹം $8 ദശലക്ഷത്തിലധികം നൽകിയിരുന്നു. ബ്ലൂംബെർഗിന്റെ ആസ്തി $100 ബില്യനാണ്.

ജോ ഗെബ്ബിയ: എയർ ബിഎൻബി (Airbnb) സഹസ്ഥാപകനായ ജോ ഗെബ്ബിയ ഫിക്സ് ദ സിറ്റി, ഡിഫെൻഡ് എൻ.വൈ.സി എന്നീ കമ്മിറ്റികൾക്കായി $2 ദശലക്ഷം (ഓരോന്നിലും $1 ദശലക്ഷം വീതം) ചെലവഴിച്ചു.

ലോഡർ കുടുംബം: കോസ്മെറ്റിക്സ് രംഗത്തെ പ്രമുഖരായ എസ്റ്റീ ലോഡറുടെ മകൻ റൊണാൾഡ് ലോഡർ ഫിക്സ് ദ സിറ്റിക്ക് $1 ദശലക്ഷം നൽകി. ഇസ്രായേലിന്റെ ശക്തമായ പിന്തുണക്കാരനാണ് റൊണാൾഡ് ലോഡർ.

ബാരി ഡില്ലർ: മീഡിയാ രംഗത്തെ അതികായനും എക്സ്പീഡിയ ഗ്രൂപ്പ് ചെയർമാനുമായ ബാരി ഡില്ലർ ഫിക്സ് ദ സിറ്റിക്ക് $5 ലക്ഷം സംഭാവന ചെയ്തു.

ബിൽ അക്മാൻ: മംദാനിയുടെ കടുത്ത വിമർശകനായ ഹെഡ്ജ് ഫണ്ട് നിക്ഷേപകൻ ബിൽ അക്മാൻ, ഡിഫെൻഡ് എൻ.വൈ.സിക്ക് $1 ദശലക്ഷവും ഫിക്സ് ദ സിറ്റിക്ക് $7,50,000-ഉം സംഭാവന നൽകി.