‘സഞ്ചാർ സാഥി ആപ്പ് നിർബന്ധമല്ല, ഉപയോക്താക്കൾക്ക് ഡിലീറ്റ് ചെയ്യാം’; വിവാദങ്ങൾക്കു പിന്നാലെ വിശദീകരണവുമായി കേന്ദ്രം

ന്യൂഡൽഹി: സഞ്ചാർ സാഥി ആപ്പ് നിർബന്ധമല്ലെന്ന് കേന്ദ്രം. സ്വകാര്യതാ ആശങ്കകൾ ഉയർന്നതിനെ തുടർന്നാണ് കേന്ദ്ര ടെലികോം മന്ത്രി ജ്യോതിരാദിത്യ സിന്ധ്യ വിശദീകരണവുമായി രംഗത്തെത്തിയത്. ഉപയോക്താക്കൾക്ക് എപ്പോൾ വേണമെങ്കിലും ആപ്പ് സജീവമാക്കാതിരിക്കുകയോ ഇല്ലാതാക്കുകയോ ചെയ്യാമെന്ന് അദ്ദേഹം വ്യക്തമാക്കി.

സർക്കാർ വികസിപ്പിച്ചെടുത്ത സൈബർ സുരക്ഷാ ആപ്പിൽ ചാരവൃത്തിയോ കോൾ നിരീക്ഷണങ്ങളോ ഉൾപ്പെടുന്നില്ലെന്ന് കേന്ദ്രമന്ത്രി അടിവരയിട്ടു. ആപ്പ് എപ്പോൾ വേണമെങ്കിലും ഡിലീറ്റ് ചെയ്യാമെന്നും ഉപയോക്താവ് സജീവമാക്കിയാൽ മാത്രമേ അത് പ്രവർത്തിക്കൂ എന്നും അദ്ദേഹം കൂട്ടിച്ചേർത്തു. ‘നിങ്ങൾക്ക് വേണമെങ്കിൽ, സജീവമാക്കാം; താൽപ്പര്യമില്ലെങ്കിൽ സജീവമാക്കരുത്… സഞ്ചാർ സാഥി വേണ്ടെങ്കിൽ, നിങ്ങൾക്ക് അത് ഇല്ലാതാക്കാം. അത് നിർബന്ധമല്ല. ഇത് ഓപ്ഷണലാണ്,’ ഇന്നലെ സിന്ധ്യ മാധ്യമങ്ങളോട് പറഞ്ഞു.

പുതിയ സ്മാർട്ട്‌ഫോണുകളിൽ ആപ്പ് മുൻകൂട്ടി ഇൻസ്റ്റാൾ ചെയ്യണമെന്ന ടെലികമ്മ്യൂണിക്കേഷൻ വകുപ്പിന്റെ (DoT) ഉത്തരവിനെതിരെ വൻ പ്രതിഷേധം ഉയർന്ന സാഹചര്യത്തിലാണ് മന്ത്രിയുടെ വിശദീകരണം. മുൻപ് നൽകിയ നിർദ്ദേശത്തിൽ, ആപ്പിന്റെ പ്രവർത്തനങ്ങൾ നിർമ്മാതാക്കൾ പ്രവർത്തനരഹിതമാക്കുകയോ നിയന്ത്രിക്കുകയോ ചെയ്യരുതെന്നും ഡിഒടി ആവശ്യപ്പെട്ടിരുന്നു.

മോഷ്ടിച്ച ഫോൺ ബ്ലോക്ക് ചെയ്യുക, മൊബൈൽ കണക്ഷനുകൾ പരിശോധിക്കുക തുടങ്ങിയ സൗകര്യങ്ങൾക്കായി 2025 ജനുവരിയിൽ ആരംഭിച്ച ആപ്പിനെതിരെ, പ്രതിപക്ഷം രൂക്ഷ വിമർശനമാണ് ഉയർത്തിയത്. കോൺഗ്രസ് എംപി പ്രിയങ്ക ഗാന്ധി അടക്കമുള്ളവർ ഇതിനെ ചാരവൃത്തി ആപ്പ് എന്ന് വിശേഷിപ്പിക്കുകയും പെഗാസസ് സ്‌പൈവെയറുമായി താരതമ്യം ചെയ്യുകയും ചെയ്തിരുന്നു. സൈബർ തട്ടിപ്പുകൾ തടയുകയാണ് നിർദ്ദേശത്തിന് പിന്നിലെ ലക്ഷ്യമെന്നും വിശാലമായ പ്രവേശനത്തിനായിട്ടാണ് ഇത് കൊണ്ടുവന്നതെന്നും മന്ത്രി സിന്ധ്യ വ്യക്തമാക്കി.