നെല്ലിക്ക ചിലപ്പോള് വിഷമാകും; ഈ 6 കൂട്ടര് സൂക്ഷിക്കണം
വിറ്റാമിൻ സിയുടെ കലവറയായ നെല്ലിക്ക പ്രതിരോധശേഷി വർധിപ്പിക്കുന്നതിനും ചർമ സംരക്ഷണത്തിനും ഉത്തമ ഔഷധമായാണ് കണക്കാക്കപ്പെടുന്നത്. ‘നെല്ലിക്ക അമൃതാണ്’ എന്നാണ് പഴമക്കാർ പറയുന്നത്. എന്നാൽ, എല്ലാവർക്കും ഇത് ഒരുപോലെ ഗുണം ചെയ്യണമെന്നില്ല. ചില ആരോഗ്യപ്രശ്നങ്ങളുള്ളവർ നെല്ലിക്ക കഴിക്കുമ്പോൾ വിപരീത ഫലങ്ങൾ ഉണ്ടാകാൻ സാധ്യതയുണ്ടെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.
നെല്ലിക്കയിലടങ്ങിയിരിക്കുന്ന ചില ശക്തമായ സംയുക്തങ്ങൾ ചില മരുന്നുകളുമായി ചേർന്ന് പ്രവർത്തിക്കുകയോ നിലവിലുള്ള രോഗാവസ്ഥയെ വഷളാക്കുകയോ ചെയ്തേക്കാം. താഴെ പറയുന്ന വിഭാഗക്കാർ നെല്ലിക്കയുടെ ഉപയോഗത്തിൽ അതീവ ജാഗ്രത പുലർത്തേണ്ടതുണ്ട്:
- അസിഡിറ്റിയും അൾസറും ഉള്ളവർ
നെല്ലിക്കയിൽ വിറ്റാമിൻ സി ധാരാളമുള്ളതിനാൽ ഇതിന് അസിഡിക് സ്വഭാവമുണ്ട്. അസിഡിറ്റി, ഗ്യാസ്ട്രബിൾ, നെഞ്ചെരിച്ചിൽ എന്നിവയുള്ളവർ വെറുംവയറ്റിൽ നെല്ലിക്ക കഴിക്കുന്നത് ഒഴിവാക്കണം. ഇത് ആമാശയത്തിലെ അസ്വസ്ഥതകൾ വർദ്ധിപ്പിക്കാൻ സാധ്യതയുണ്ട്. - ഹൈപ്പോഗ്ലൈസീമിയ (കുറഞ്ഞ പഞ്ചസാര) ഉള്ളവർ
പ്രമേഹരോഗികൾക്ക് നെല്ലിക്ക നല്ലതാണ്. എന്നാൽ, രക്തത്തിലെ പഞ്ചസാരയുടെ അളവ് പെട്ടെന്ന് കുറയ്ക്കാൻ ഇതിന് കഴിവുള്ളതിനാൽ, ഷുഗർ കുറഞ്ഞ അവസ്ഥയിലുള്ളവർ (Hypoglycemia) നെല്ലിക്ക കഴിക്കുന്നത് തലകറക്കം പോലുള്ള പ്രശ്നങ്ങൾക്കും ആരോഗ്യനില വഷളാകാനും കാരണമാകും. - രക്തം നേർപ്പിക്കുന്ന മരുന്ന് കഴിക്കുന്നവർ
രക്തം കട്ടപിടിക്കുന്നത് തടയാനുള്ള മരുന്നുകൾ (Blood thinners) കഴിക്കുന്നവർ നെല്ലിക്ക ഒഴിവാക്കുന്നതാണ് നല്ലത്. നെല്ലിക്കയ്ക്ക് രക്തം നേർപ്പിക്കാനുള്ള സ്വാഭാവിക കഴിവുള്ളതിനാൽ, മരുന്നിനൊപ്പം ഇത് കഴിക്കുന്നത് രക്തസ്രാവത്തിനുള്ള സാധ്യത വർദ്ധിപ്പിക്കും. അതുപോലെ ശസ്ത്രക്രിയ നിശ്ചയിച്ചിട്ടുള്ളവരും രണ്ടാഴ്ച മുൻപ് തന്നെ നെല്ലിക്ക ഒഴിവാക്കണം. - വൃക്കരോഗികൾ
നെല്ലിക്കയിൽ ഓക്സലേറ്റുകൾ അടങ്ങിയിട്ടുണ്ട്. ഇത് വൃക്കയിൽ കല്ലുകൾ രൂപപ്പെടാൻ (Kidney Stones) കാരണമായേക്കാം. അതിനാൽ വൃക്കസംബന്ധമായ അസുഖമുള്ളവർ ഡോക്ടറുടെ നിർദ്ദേശപ്രകാരം മാത്രമേ നെല്ലിക്ക കഴിക്കാവൂ. - ഗർഭിണികളും മുലയൂട്ടുന്ന അമ്മമാരും
ഗർഭകാലത്ത് അമിതമായി നെല്ലിക്ക കഴിക്കുന്നത് ദഹനപ്രശ്നങ്ങൾക്കും വയറിളക്കത്തിനും കാരണമായേക്കാം. ഇത് നിർജ്ജലീകരണത്തിലേക്ക് നയിക്കാം എന്നതിനാൽ ഡോക്ടറുടെ ഉപദേശം തേടുന്നത് നല്ലതാണ്. - അലർജിയുള്ളവർ
ചിലരിലെങ്കിലും നെല്ലിക്ക അലർജിക്ക് കാരണമാകാറുണ്ട്. ചർമ്മത്തിൽ ചൊറിച്ചിൽ, വീക്കം, ശ്വാസതടസ്സം എന്നിവ അനുഭവപ്പെടുകയാണെങ്കിൽ ഉടൻ തന്നെ ഉപയോഗം നിർത്തണം.
ശ്രദ്ധിക്കുക: ഭക്ഷണക്രമത്തിൽ മാറ്റം വരുത്തുന്നതിന് മുൻപ് എപ്പോഴും ഒരു വിദഗ്ധ ഡോക്ടറുടെ ഉപദേശം തേടുക.
