ഉറങ്ങിക്കിടന്ന യുവതിയുടെ മേൽ ചുരുണ്ടുകൂടി പെരുമ്പാമ്പ്; മനോധൈര്യത്തിന് കൈയടിച്ച് ലോകം
കാൻബെറ: ഉറക്കത്തിനിടയിൽ നെഞ്ചിൽ അസാധാരണമായ ഭാരം തോന്നി കണ്ണുതുറന്ന റേച്ചൽ ബ്ലൂർ കണ്ടത് ഞെട്ടിക്കുന്ന കാഴ്ച. തന്റെ നായയാണെന്ന് കരുതി കൈനീട്ടി തലോടിയത് രണ്ടര മീറ്ററോളം നീളമുള്ള കൂറ്റൻ പെരുമ്പാമ്പിനെയായിരുന്നു. ഓസ്ട്രേലിയയിലെ ബ്രിസ്ബേനിലാണ് സിനിമാക്കഥയെ വെല്ലുന്ന സംഭവം നടന്നത്.
തിങ്കളാഴ്ച അർദ്ധരാത്രിയോടെയാണ് സംഭവം. ഉറക്കത്തിനിടയിൽ എന്തോ ഇഴയുന്നതായി തോന്നി റേച്ചൽ പുതപ്പിനുള്ളിലൂടെ കൈ നീട്ടിയപ്പോൾ മിനുസമുള്ള ഒന്നിലാണ് തട്ടിയത്. ഉടൻതന്നെ ഭർത്താവ് ലൈറ്റ് തെളിച്ചതോടെയാണ് ഇവരുടെ നെഞ്ചിൽ ചുരുണ്ടുകൂടി കിടക്കുന്ന പെരുമ്പാമ്പിനെ കണ്ടത്. ‘അയ്യോ കുഞ്ഞേ, അനങ്ങരുത്! നിന്റെ മേൽ വലിയൊരു പാമ്പുണ്ട്’ എന്ന ഭർത്താവിന്റെ വാക്കുകൾ കേട്ട് ഭയന്നുപോയെങ്കിലും റേച്ചൽ മനസ്സാന്നിധ്യം കൈവിട്ടില്ല.
വീട്ടിലെ വളർത്തുനായ്ക്കൾ പാമ്പിനെ കണ്ട് പ്രകോപിതരായാൽ സ്ഥിതി വഷളാകുമെന്ന് കരുതിയ റേച്ചൽ, ഉടൻതന്നെ അവയെ മുറിക്ക് പുറത്താക്കി. തുടർന്ന് വളരെ സാവധാനം പുതപ്പിനടിയിൽ നിന്ന് സ്വയം മോചിതയായി. ജനൽ ഷട്ടറിലൂടെയാകാം പാമ്പ് അകത്തുകയറിയതെന്നാണ് വിലയിരുത്തൽ.
