ബ്രിട്ടീഷ് സാമ്രാജ്യത്തെ വിറപ്പിച്ച ‘The Most Dangerous Mappila’; 1921ന്റെ കനലുകളില് സമാധാനം വിതച്ച പണ്ഡിതസൂര്യന്- പാങ്ങില് അഹ്മദ് കുട്ടി മുസ്ലിയാര് എന്ന ഇതിഹാസം
അഹ്മദ് കുട്ടി മുസ്ലിയാര് വൈജ്ഞാനിക സേവനം ചെയ്ത പാങ്ങില് ജുമാ മസ്ജിദിന്റെ പഴയ ചിത്രം
കേരളീയ മുസ്ലിം നവോത്ഥാന ചരിത്രത്തിലെ ഉജ്ജ്വല അധ്യായമാണ് പാങ്ങില് എ.പി അഹ്മദ് കുട്ടി മുസ്ലിയാര്. പാണ്ഡിത്യത്തിന്റെ ഗരിമ കൊണ്ടും സംഘാടകശേഷിയുടെ മികവു കൊണ്ടും ഒരു കാലഘട്ടത്തെ മുന്നില്നിന്ന് നയിച്ച അദ്ദേഹം സമസ്ത കേരള ജംഇയ്യത്തുല് ഉലമ എന്ന മഹാപ്രസ്ഥാനത്തിന്റെ പ്രധാന ശില്പികളില് ഒരാളായിരുന്നു. സ്വാതന്ത്ര്യ സമര പോരാളിയായും ഗ്രന്ഥകര്ത്താവായും സമുദായ പരിഷ്കര്ത്താവായും തിളങ്ങിനിന്ന ആ ജീവിതം ചരിത്രത്തിലെ അപൂര്വ ഏടാണ്.
ജനനവും പഠനവും
ഇസ്ലാമിക പ്രബോധനത്തിനായി കേരളത്തിലെത്തിയ പ്രമുഖനായ ഹബീബ് ബ്നു മാലിക്(റ)വിന്റെ പരമ്പരയില്പ്പെട്ട ‘മുല്ലവി’ കുടുംബത്തിലാണ് പാങ്ങില് അഹ്മദ് കുട്ടി മുസ്ലിയാരുടെ ജനനം. 1888-ല് (ഹിജ്റ 1305) മലപ്പുറം ജില്ലയിലെ കുറുവ പാങ്ങില് അറുകോട്ട് പുത്തന്പീടികക്കല് നൂറുദ്ദീന് മുസ്ലിയാരുടെയും തിത്തിക്കുട്ടിയുടെയും മകനായാണ് അദ്ദേഹം ജനിച്ചത്. പ്രാഥമിക പഠനത്തിന് ശേഷം കാട്ടിലശ്ശേരി അലി മുസ്ലിയാര് ഉള്പ്പെടെയുള്ള പ്രമുഖരില് നിന്ന് ദര്സ് പഠനം നടത്തി. തുടര്ന്ന് വെല്ലൂര് ബാഖിയാത്തു സ്വാലിഹാത്ത്, ലത്വീഫിയ്യ എന്നിവിടങ്ങളില് നിന്ന് ഉപരിപഠനം പൂര്ത്തിയാക്കി.
സ്വാതന്ത്ര്യ സമര പോരാട്ടങ്ങള്
1921ലെ മലബാര് സമരത്തിന്റെ നേതൃനിരയില് സജീവ സാന്നിധ്യമായിരുന്നു പാങ്ങില്. ഖിലാഫത്ത് പ്രസ്ഥാനത്തെ അനുകൂലിച്ച് പ്രസംഗിച്ചതിന്റെ പേരില് മണ്ണാര്ക്കാട് മഅ്ദനുല് ഉലൂമിലെ അധ്യാപനവൃത്തി രാജിവെച്ച അദ്ദേഹം, 1921 ജൂലൈ 24-ന് പുതുപൊന്നാനിയില് നടന്ന ഉലമാ സമ്മേളനത്തിലും പങ്കെടുത്തു.
ബ്രിട്ടീഷ് കലക്ടര് ഇ.എഫ് തോമസ് 1921 ആഗസ്റ്റ് 16-ന് തയ്യാറാക്കിയ, നിര്ബന്ധമായും അറസ്റ്റ് ചെയ്യപ്പെടേണ്ട ‘മോസ്റ്റ് ഡെയ്ഞ്ചറസ് മാപ്പിളാസ്’ (ഏറ്റവും അപകടകാരികളായ മാപ്പിളമാര്) എന്ന പേരിലുള്ള 18 നേതാക്കളുടെ പട്ടികയില് പാങ്ങില് അഹ്മദ് കുട്ടി മുസ്ലിയാരും സഹോദരന് അലവിക്കുട്ടി മുസ്ലിയാരും ഉള്പ്പെട്ടിരുന്നു. കല്പ്പകഞ്ചേരിയിലെ വടക്കുമ്പ്രത്ത് സമരം പ്രചരിപ്പിച്ചു എന്നതായിരുന്നു അദ്ദേഹത്തിന് മേല് ചാര്ത്തപ്പെട്ട കുറ്റം.
അതേസമയം, സമരം അക്രമാസക്തമാവുകയും നിയന്ത്രണം വിടുകയും ചെയ്തപ്പോള് അതിനെതിരെ ശക്തമായി നിലകൊള്ളാനും അദ്ദേഹം മടിച്ചില്ല. ഗവണ്മെന്റ് ഓഫീസുകള് കൊള്ളയടിക്കാനും അക്രമം നടത്താനും തുനിഞ്ഞവരെ അദ്ദേഹം പിന്തിരിപ്പിച്ചു. ആലി മുസ്ലിയാര് കീഴടങ്ങുകയും കെ.എം മൗലവി നാടുവിടുകയും ചെയ്ത പ്രതിസന്ധി ഘട്ടത്തില്, വഴിതെറ്റുന്ന സമര ഭടന്മാരെ ധനമോഹത്തിനും തീവ്രവാദത്തിനുമെതിരെ പിടിച്ചുനിര്ത്താന് അദ്ദേഹം രാത്രികാലങ്ങളില് ഗ്രാമങ്ങള് തോറും സഞ്ചരിച്ചു. ഇതിനിടയില് സന്നിപാത ജ്വരം പിടിപെട്ട അദ്ദേഹത്തെ സ്വാതന്ത്ര്യസമര സേനാനിയായ മൊയ്തു സാഹിബ് രഹസ്യമായി ചികിത്സിച്ച് ഭേദമാക്കുകയും, പിന്നീട് സ്വാധീനം ഉപയോഗിച്ച് അറസ്റ്റ് വാറണ്ട് പിന്വലിപ്പിക്കുകയുമായിരുന്നു.
പാങ്ങില് അഹ്മദ് കുട്ടി മുസ്ലിയാര്ക്ക് ജനങ്ങള്ക്കിടയിലുണ്ടായിരുന്ന സ്വാധീനം തെളിയിക്കുന്നതാണ് തിരൂരങ്ങാടിയിലെ ഒരു സംഭവം. പാങ്ങിലിനെ കുടുക്കാനായി എതിരാളികള് ഡെപ്യൂട്ടി കളക്ടര്ക്ക് വ്യാജ പരാതി നല്കി. പാങ്ങില് വീണ്ടും ലഹളക്ക് ശ്രമിക്കുകയാണെന്നും, അദ്ദേഹത്തെ നാടുകടത്തണമെന്നും ആവശ്യപ്പെട്ടുള്ള ‘മാസ് പെറ്റീഷന്’ ആണെന്നായിരുന്നു കളക്ടറുടെ ധാരണ. അന്വേഷണത്തിനായി കളക്ടര് തിരൂരങ്ങാടിയിലെത്തിയപ്പോള്, തങ്ങളുടെ പ്രിയപ്പെട്ട നേതാവിനെ പോലീസ് വളഞ്ഞതറിഞ്ഞ് ജനം തടിച്ചുകൂടി.
കളക്ടര് പരാതിയെക്കുറിച്ച് ചോദിച്ചപ്പോള് ജനം നല്കിയ മറുപടി ചരിത്രപരമായിരുന്നു: ‘മമ്പുറം പുഴക്ക് പാലം പണിയാന് നല്കിയ നിവേദനത്തിലാണ് ഞങ്ങള് ഒപ്പിട്ടത്. ഞങ്ങളുടെ നേതാവായ അഹ്മദ് കുട്ടി മുസ്ലിയാരുടെ പേരില് എന്തെങ്കിലും നടപടി എടുത്താല് ജീവന് നല്കാനും ഞങ്ങള് തയ്യാറാണ്.’ ജനങ്ങളുടെ വികാരം മനസ്സിലാക്കിയ കളക്ടര് മാപ്പു പറയുകയും, അദ്ദേഹത്തിന് എല്ലാ സംരക്ഷണവും വാഗ്ദാനം ചെയ്യുകയും ചെയ്തു.
സമസ്തയുടെ രൂപീകരണം
കേരളത്തിലെ മുസ്ലിംകള്ക്കിടയില് നവീന വാദങ്ങള് പ്രചരിപ്പിക്കാന് ഐക്യസംഘം ശ്രമിച്ചപ്പോള് അതിനെതിരെ പ്രതിരോധം തീര്ത്തത് പാങ്ങില് അഹ്മദ് കുട്ടി മുസ്ലിയാരായിരുന്നു. പരമ്പരാഗത പണ്ഡിതന്മാര് സംഘടിക്കേണ്ടതിന്റെ ആവശ്യകത അദ്ദേഹം തിരിച്ചറിഞ്ഞു. വരക്കല് മുല്ലക്കോയ തങ്ങളുടെ ആശീര്വാദത്തോടെ 1926 ജൂണ് 26-ന് കോഴിക്കോട് ടൗണ് ഹാളില് വെച്ച് സമസ്ത കേരള ജംഇയ്യത്തുല് ഉലമ രൂപീകൃതമായി.
പുതിയ സംഘടനയുടെ പ്രസിഡന്റ് സ്ഥാനത്തേക്ക് അദ്ദേഹത്തിന്റെ പേര് നിര്ദേശിക്കപ്പെട്ടെങ്കിലും, വലിയ വിനയത്തോടെ അദ്ദേഹം ആ സ്ഥാനം വരക്കല് തങ്ങള് ഏറ്റെടുക്കണമെന്ന് ആവശ്യപ്പെട്ടു. പ്രഥമ വൈസ് പ്രസിഡന്റായി അദ്ദേഹം ചുമതലയേറ്റു. 1932-ല് വരക്കല് തങ്ങളുടെ വിയോഗത്തിന് ശേഷം പാങ്ങില് സമസ്തയുടെ പ്രസിഡന്റായി തിരഞ്ഞെടുക്കപ്പെട്ടു. സംഘടനയുടെ ഭരണഘടന രൂപീകരിക്കുന്നതിലും ജനകീയമാക്കുന്നതിലും മുഖ്യ പങ്കുവഹിച്ചത് അദ്ദേഹമായിരുന്നു.
വൈജ്ഞാനിക സേവനങ്ങള്
അറബി ഭാഷയില് 23-ലധികം ഗ്രന്ഥങ്ങള് അദ്ദേഹം രചിച്ചിട്ടുണ്ട്. ‘അന്നഹ്ജുല് ഖവീം’, ‘അല്ബയാനുശ്ശാഫി’ തുടങ്ങിയവ ഇതില് പ്രധാനമാണ്. സമസ്തയുടെ ആശയപ്രചരണത്തിനായി ‘അല്ബയാന്’ എന്ന പേരില് അറബി-മലയാളം മാസിക ആരംഭിക്കുകയും 1929-ല് അതിന്റെ ചീഫ് എഡിറ്ററായി പ്രവര്ത്തിക്കുകയും ചെയ്തു. താനൂര് ഇസ്ലാഹുല് ഉലൂം അറബിക് കോളേജ് ഉള്പ്പെടെയുള്ള നിരവധി മതപഠന കേന്ദ്രങ്ങള് സ്ഥാപിക്കുന്നതിനും അദ്ദേഹം നേതൃത്വം നല്കി.
മലബാര് ടെക്സ്റ്റ് ബുക്ക് കമ്മിറ്റി, മദ്രാസ് ഹജ്ജ് കമ്മിറ്റി എന്നിവയില് അംഗമായിരുന്ന അദ്ദേഹം മഊനത്തുല് ഇസ്ലാം സഭയുടെ മാനേജറായും പ്രവര്ത്തിച്ചു. കോണ്ഗ്രസിലൂടെ രാഷ്ട്രീയത്തില് പ്രവേശിച്ച അദ്ദേഹം പിന്നീട് മുസ്ലിം ലീഗില് സജീവമാവുകയും 1934-ലെ തെരഞ്ഞെടുപ്പില് ലീഗിന്റെ വിജയത്തിനായി മലപ്പുറം ഡിവിഷനില് നേതൃപരമായ പങ്കുവഹിക്കുകയും ചെയ്തു.
വിയോഗം
കര്മനിരതമായ ഒരു ജീവിതത്തിന് ശേഷം 1946 നവംബര് 20-ന് (1365 ദുല്ഹജ്ജ് 25) പാങ്ങില് അഹ്മദ് കുട്ടി മുസ്ലിയാര് ലോകത്തോട് വിടപറഞ്ഞു. പാങ്ങില് ജുമുഅത്ത് പള്ളിക്ക് മുന്വശത്താണ് അദ്ദേഹം അന്ത്യവിശ്രമം കൊള്ളുന്നത്. ആദര്ശങ്ങളില് വിട്ടുവീഴ്ചയില്ലാത്ത, എന്നാല് സമുദായ ഐക്യത്തിനായി വിനയത്തോടെ പ്രവര്ത്തിച്ച ആ മഹാപുരുഷന്റെ ജീവിതം വരുംതലമുറകള്ക്ക് എന്നും വഴികാട്ടിയായിരിക്കും.
