ഗർഭിണികൾ പാരസെറ്റമോൾ കഴിച്ചാൽ കുട്ടികൾക്ക് ഓട്ടിസം വരുമോ?

ഗർഭകാലത്ത് പാരസെറ്റമോൾ (അസറ്റാമിനോഫെൻ) ഉപയോഗിക്കുന്നത് കുട്ടികളിൽ ഓട്ടിസം, എ.ഡി.എച്ച്.ഡി എന്നിവയ്ക്ക് കാരണമാകുമെന്ന ആശങ്കകൾക്ക് അടിസ്ഥാനമില്ലെന്ന് പുതിയ പഠന റിപ്പോർട്ട്. കഴിഞ്ഞ സെപ്റ്റംബറിൽ അമേരിക്കൻ ഗവൺമെന്റ് പുറപ്പെടുവിച്ച മുന്നറിയിപ്പുകളെത്തുടർന്ന് ലോകമെമ്പാടുമുള്ള ഗർഭിണികൾക്കിടയിൽ നിലനിന്നിരുന്ന വലിയൊരു ഭീതിക്കാണ് പുതിയ റിപ്പോർട്ടോടെ വിരാമമാകുന്നത്. സാധാരണ വേദനസംഹാരിയായ മരുന്നിനെക്കുറിച്ച് യുഎസ് പ്രസിഡന്റ് ഡൊണാൾഡ് ട്രംപ് നടത്തിയ അവകാശവാദങ്ങളെയും പഠനം നിരാകരിക്കുന്നു.

ശാസ്ത്രീയമായ തെളിവുകൾ

യു.കെയിലെയും യൂറോപ്പിലെയും ഗവേഷകർ നടത്തിയ വിപുലമായ പഠനം ‘ദ ലാൻസെറ്റ്’ (The Lancet) ജേണലിലാണ് പ്രസിദ്ധീകരിച്ചത്. ഉയർന്ന നിലവാരമുള്ള നിരവധി പഠനങ്ങളെ ക്രോഡീകരിച്ച് നടത്തിയ വിശകലനത്തിൽ, ഗർഭകാലത്ത് നിർദ്ദേശിക്കപ്പെട്ട അളവിൽ പാരസെറ്റമോൾ കഴിക്കുന്നത് കുട്ടികളുടെ ബുദ്ധിവികാസത്തെയോ നാഡീവ്യൂഹത്തെയോ ബാധിക്കുന്നതായി യാതൊരു തെളിവും ലഭിച്ചിട്ടില്ല.

പഴയ നിഗമനങ്ങൾ തെറ്റുന്നത് എന്തുകൊണ്ട്?

നേരത്തെ ഓട്ടിസവും പാരസെറ്റമോളും തമ്മിൽ ബന്ധമുണ്ടെന്ന് സൂചിപ്പിച്ച പഠനങ്ങൾ ജനിതക ഘടകങ്ങളോ കുടുംബ പശ്ചാത്തലമോ കണക്കിലെടുത്തിരുന്നില്ലെന്ന് ഗവേഷകർ ചൂണ്ടിക്കാട്ടുന്നു. പുതിയ പഠനത്തിൽ ഒരേ കുടുംബത്തിലെ സഹോദരങ്ങളെ നിരീക്ഷിച്ചപ്പോൾ (Sibling Comparison), മരുന്ന് ഉപയോഗിച്ചവരുടെയും അല്ലാത്തവരുടെയും കുട്ടികൾക്കിടയിൽ രോഗസാധ്യതയിൽ മാറ്റമൊന്നുമില്ലെന്ന് കണ്ടെത്തി.

വിദഗ്ധരുടെ അഭിപ്രായം

പാരസെറ്റമോൾ ഭയന്ന് ഗർഭകാലത്തെ പനിയും വേദനയും ചികിത്സിക്കാതിരിക്കുന്നത് അമ്മയ്ക്കും കുഞ്ഞിനും വലിയ ആരോഗ്യപ്രശ്‌നങ്ങൾ ഉണ്ടാക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഓട്ടിസം എന്നത് ജനിതകമായ പല കാരണങ്ങൾ കൊണ്ട് സംഭവിക്കുന്ന സങ്കീർണ്ണമായ അവസ്ഥയാണെന്നും മരുന്നുകൾക്ക് ഇതിൽ പങ്കില്ലെന്നും റിപ്പോർട്ട് അടിവരയിടുന്നു. ഗർഭിണികൾക്ക് വളരെ വലിയ ആത്മവിശ്വാസം നൽകുന്നതാണ് പുതിയ കണ്ടെത്തൽ.