വീണ്ടും ആഫ്രിക്കൻ രാജാക്കന്മാരായി സെനഗൽ; മൊറോക്കോയെ തകർത്ത് രണ്ടാം കിരീടം
റബാത്ത്: ആഫ്രിക്കൻ ഫുട്ബോൾ ലോകത്തെ ആവേശത്തിലാഴ്ത്തിയ കലാശപ്പോരാട്ടത്തിൽ ആതിഥേയരായ മൊറോക്കോയെ കീഴടക്കി സെനഗൽ ആഫ്രിക്കൻ കപ്പ് ഓഫ് നേഷൻസ് കിരീടം ചൂടി. റബാത്തിലെ പ്രിൻസ് മൗലേ അബ്ദുള്ള സ്റ്റേഡിയത്തിൽ നടന്ന ആവേശകരമായ ഫൈനലിൽ, എക്സ്ട്രാ ടൈമിലേക്ക് നീണ്ട പോരാട്ടത്തിനൊടുവിൽ ഏകപക്ഷീയമായ ഒരു ഗോളിനാണ് സെനഗൽ വിജയം കൈവരിച്ച ത്.
നിശ്ചിത സമയത്ത് ഇരു ടീമുകൾക്കും ഗോൾ നേടാനാകാത്തതിനെ തുടർന്ന് കളി എക്സ്ട്രാ ടൈമിലേക്ക് നീങ്ങുകയായിരുന്നു. എക്സ്ട്രാ ടൈമിന്റെ നാലാം മിനിറ്റിൽ വില്ലാറയൽ താരം പാപെ ഗെയ് നേടിയ തകർപ്പൻ ഗോളാണ് സെനഗലിന് വിജയം സമ്മാനിച്ചത്. ബോക്സിന് പുറത്തുനിന്നുള്ള ഗെയുടെ ശക്തമായ ഷോട്ട് മൊറോക്കൻ പ്രതിരോധത്തെയും ഗോൾകീപ്പറെയും മറികടന്ന് വലയിൽ പതിച്ചു.
മത്സരത്തിന്റെ അവസാന നിമിഷങ്ങളിൽ നാടകീയമായ സംഭവവികാസങ്ങൾക്കും മൈതാനം സാക്ഷ്യം വഹിച്ചു. സാധാരണ സമയം അവസാനിക്കാൻ നിമിഷങ്ങൾ ബാക്കിനിൽക്കെ മൊറോക്കോയ്ക്ക് അനുകൂലമായി ലഭിച്ച പെനാൽറ്റി പാഴായതാണ് കളിയിൽ നിർണ്ണായകമായത്. പാനെങ്ക ശൈലിയിൽ പെനാൽറ്റി എടുത്ത ബ്രാഹിം ഡയാസിന്റെ ശ്രമം സെനഗൽ കീപ്പർ മെൻഡി അനായാസം പിടിച്ചെടുത്തു. പെനാൽറ്റി അനുവദിച്ച റഫറിയുടെ തീരുമാനത്തിൽ പ്രതിഷേധിച്ച് സെനഗൽ താരങ്ങൾ മൈതാനം വിട്ടുപോയത് മത്സരത്തിൽ വലിയ നാടകീയത സൃഷ്ടിച്ചെങ്കിലും പിന്നീട് കളി പുനരാരംഭിക്കുകയായിരുന്നു.
കഴിഞ്ഞ നാല് എഡിഷനുകളിൽ മൂന്ന് തവണ ഫൈനലിലെത്തിയ സെനഗൽ, ഈ വിജയത്തോടെ ആഫ്രിക്കൻ ഫുട്ബോളിലെ തങ്ങളുടെ കരുത്ത് ഒരിക്കൽ കൂടി തെളിയിച്ചു. ക്യാപ്റ്റൻ സാദിയോ മാനെയുടെ നേതൃത്വത്തിൽ കിരീടമുയർത്തിയ ടെറാങ്ക ലയൺസ് വലിയ ആഘോഷങ്ങളോടെയാണ് വിജയത്തെ വരവേറ്റത്.
അതേസമയം, 50 വർഷത്തെ കാത്തിരിപ്പിന് ശേഷം സ്വന്തം മണ്ണിൽ കിരീടം നേടാമെന്ന മൊറോക്കോയുടെ സ്വപ്നങ്ങൾ ഇതോടെ അവസാനിച്ചു. 1976-ന് ശേഷം ഒരു ആഫ്കോൺ കിരീടം എന്ന ലക്ഷ്യത്തോടെ ഇറങ്ങിയ മൊറോക്കോയ്ക്ക് റണ്ണേഴ്സ് അപ്പ് സ്ഥാനത്തുകൊണ്ട് തൃപ്തിപ്പെടേണ്ടി വന്നു.
