താഡ് ഇൻ്റർസെപ്റ്റർ ശേഖരത്തിൽ വൻ കുറവ്; ഇറാൻ യുദ്ധം യുഎസ് പ്രതിരോധത്തിന് വെല്ലുവിളിയാകുന്നു

വാഷിങ്ടൺ: ഇറാനുമായി തുടരുന്ന സൈനിക നീക്കങ്ങൾ അമേരിക്കയുടെ അത്യാധുനിക മിസൈൽ പ്രതിരോധ സംവിധാനങ്ങളെ സാരമായി ബാധിക്കുന്നതായും പ്രതിരോധ മിസൈലുകളുടെ ശേഖരം അപകടകരമാംവിധം കുറയുന്നതായും യുഎസ് കോൺഗ്രസിന്റെ പുതിയ പഠനം വെളിപ്പെടുത്തുന്നു. ‘ഓപ്പറേഷൻ എപ്പിക് ഫ്യൂറി’ എന്ന് പേരിട്ടിരിക്കുന്ന ഈ സൈനിക നടപടിക്കിടെ ശത്രു മിസൈലുകളെ തകർക്കാൻ ഉപയോഗിക്കുന്ന ‘താഡ്’ ഇൻ്റർസെപ്റ്റർ മിസൈലുകളുടെ ശേഖരത്തിൽ മൂന്നിലൊന്നും ഇതിനോടകം ഉപയോഗിച്ചു കഴിഞ്ഞു എന്നാണ് കണക്കാക്കുന്നത്. പ്രതിവർഷം നൂറിൽ താഴെ മിസൈലുകൾ മാത്രം നിർമ്മിക്കാൻ ശേഷിയുള്ള അമേരിക്കയ്ക്ക്, ഇപ്പോൾ തീർന്നുകൊണ്ടിരിക്കുന്ന ഈ ശേഖരം പഴയപടിയാക്കാൻ മൂന്ന് മുതൽ എട്ട് വർഷം വരെ സമയം വേണ്ടിവരുമെന്നാണ് വിലയിരുത്തൽ. ഏകദേശം 106 കോടി രൂപയോളം വിലവരുന്ന ഓരോ താഡ് മിസൈലും യുദ്ധത്തിന്റെ ആദ്യ ദിവസങ്ങളിൽ തന്നെ വൻതോതിൽ പ്രയോഗിക്കേണ്ടി വന്നത് അമേരിക്കൻ പ്രതിരോധ വകുപ്പിനെ ആശങ്കയിലാക്കുന്നുണ്ട്. ജൂൺ മാസത്തിൽ ഇസ്രയേലിന് നേരെ നടന്ന ഇറാൻ്റെ മിസൈൽ ആക്രമണങ്ങളെ പ്രതിരോധിച്ചതിൽ പകുതിയോളം പങ്കുവഹിച്ചത് ഈ താഡ് സംവിധാനമായിരുന്നു. ഇസ്രയേലിന്റെയും അമേരിക്കയുടെയും സംയുക്ത കൺട്രോൾ റൂമിലിരുന്നാണ് ഏത് മിസൈൽ എപ്പോൾ പ്രയോഗിക്കണം എന്ന കാര്യത്തിൽ തീരുമാനമെടുക്കുന്നത്.

ഇറാൻ്റെ പക്കൽ ഇസ്രയേലിനെ ലക്ഷ്യം വെക്കാൻ ശേഷിയുള്ള ആയിരത്തിലധികം ബാലിസ്റ്റിക് മിസൈലുകൾ ഇനിയും ബാക്കിയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. ഇതുവരെ ഇസ്രയേലിനും അമേരിക്കയ്ക്കും ചേർന്ന് ഇറാൻ്റെ 200 മിസൈൽ ലോഞ്ചറുകൾ തകർക്കാൻ സാധിച്ചിട്ടുണ്ടെങ്കിലും ബാക്കിയുള്ളവ നശിപ്പിക്കാൻ ഇനിയും ആഴ്ചകൾ വേണ്ടിവരും. ഗൾഫ് രാജ്യങ്ങളെ സംരക്ഷിക്കുന്ന പാട്രിയറ്റ് മിസൈൽ ബാറ്ററികൾ വെറും നാല് ദിവസത്തിനുള്ളിൽ തൊടുത്തത് അമേരിക്കൻ ഫാക്ടറികളിലെ ഒന്നര വർഷത്തെ ആകെ ഉൽപ്പാദനത്തിന് തുല്യമായ മിസൈലുകളാണ്. ബോംബുകൾക്കും മറ്റ് വെടിക്കോപ്പുകൾക്കും നിലവിൽ കുറവില്ലെങ്കിലും ശത്രു മിസൈലുകളെ ആകാശത്തുവെച്ച് തന്നെ തകർക്കുന്ന ഇൻ്റർസെപ്റ്റർ മിസൈലുകളുടെ കുറവ് ഭാവിയിൽ മറ്റ് രാജ്യങ്ങളിൽ നിന്ന് ഭീഷണി ഉണ്ടായാൽ അമേരിക്കയെ പ്രതിരോധത്തിലാക്കിയേക്കാം. ഇറാൻ്റെ ആയുധ നിർമ്മാണ ശേഷി കുറവായതിനാൽ ഈ ആയുധപ്പന്തയത്തിൽ ഇസ്രയേലും അമേരിക്കയും മുന്നിലാണെങ്കിലും, ഇത്ര വലിയൊരു യുദ്ധത്തിനാവശ്യമായ മിസൈൽ ശേഖരം മുൻകൂട്ടി കരുതിയില്ല എന്ന വിമർശനം അമേരിക്കൻ ഭരണകൂടത്തിന് നേരെ ഉയരുന്നുണ്ട്. വരും ദിവസങ്ങളിൽ മിസൈൽ ഉൽപ്പാദനം വർദ്ധിപ്പിക്കുന്നതിനുള്ള നടപടികൾ അമേരിക്ക ഊർജ്ജിതമാക്കുമെന്നാണ് റിപ്പോർട്ടുകൾ.