പുതിയ കാർ വാങ്ങാൻ പ്ലാനുണ്ടോ? 10 വർഷം വിശ്വസ്തതയോടെ കൂടെക്കൂട്ടാം: 15 ലക്ഷത്തിൽ താഴെ വിലയുള്ള 5 മികച്ച ഓപ്ഷനുകൾ ഇതാ
പുതിയ കാർ വാങ്ങുമ്പോൾ മിക്കവരും ശ്രദ്ധിക്കുന്നത് അതിന്റെ ലുക്കിലും ഏറ്റവും പുതിയ ഫീച്ചറുകളിലുമായിരിക്കും. എന്നാൽ ഒരു പതിറ്റാണ്ട് കാലമെങ്കിലും ആ കാർ കൈവശം വെക്കാൻ ആഗ്രഹിക്കുന്നവർ നോക്കേണ്ടത് കാറിന്റെ എൻജിൻ കരുത്തും, നിർമാണ നിലവാരവും, മെക്കാനിക്കൽ വിശ്വാസ്യതയുമാണ്. കുറഞ്ഞ മെയിന്റനൻസിൽ ദീർഘകാലം ഉപയോഗിക്കാൻ കഴിയുന്ന, 15 ലക്ഷം രൂപയിൽ താഴെ വിലയുള്ള അഞ്ച് കാറുകളെ പരിചയപ്പെടാം.
1. ഹോണ്ട എലിവേറ്റ്
ദീർഘകാല ഉപയോഗത്തിന് ഏറ്റവും അനുയോജ്യമായ വാഹനങ്ങളിലൊന്നാണ് ഹോണ്ട എലിവേറ്റ്. ഇതിലെ 1.5 ലിറ്റർ i-VTEC പെട്രോൾ എൻജിൻ അതിന്റെ വിശ്വാസ്യത തെളിയിച്ചതാണ്. ടർബോ എൻജിനുകളെ അപേക്ഷിച്ച് സങ്കീർണത കുറഞ്ഞ നാച്ചുറലി ആസ്പിറേറ്റഡ് എൻജിൻ ആയതിനാൽ ദീർഘകാലം കാര്യമായ തകരാറുകൾ ഇല്ലാതെ ഇത് പ്രവർത്തിക്കും. ഹോണ്ട സിറ്റിയിലൂടെ പ്രശസ്തമായ ഇതേ പവർട്രെയിൻ തന്നെയാണ് എലിവേറ്റിലും വരുന്നത്.
2. മഹീന്ദ്ര താർ
ഓഫ്-റോഡ് യാത്രകൾ ഇഷ്ടപ്പെടുന്നവർക്ക് വിശ്വസിച്ചു വാങ്ങാവുന്ന കരുത്തനാണ് താർ. 2.0 ലിറ്റർ ടർബോ പെട്രോൾ, 1.5 ലിറ്റർ ഡീസൽ എൻജിൻ ഓപ്ഷനുകളിൽ ഇത് ലഭ്യമാണ്. പരുക്കൻ റോഡുകളെ നേരിടാൻ ശേഷിയുള്ള ശക്തമായ നിർമാണവും മികച്ച എൻജിനീയറിങ്ങും താറിനെ ദീർഘകാല നിക്ഷേപമാക്കി മാറ്റുന്നു.
3. ഫോക്സ്വാഗൺ ടിഗ്വാൻ
സുരക്ഷയ്ക്കും മികച്ച ഡ്രൈവിങ് അനുഭവത്തിനും മുൻഗണന നൽകുന്നവർക്ക് ടിഗ്വാൻ തെരഞ്ഞെടുക്കാം. ഗ്ലോബൽ NCAP-ൽ 5 സ്റ്റാർ റേറ്റിങ് ഉള്ള ഈ വാഹനം മികച്ച ഘടനാപരമായ കരുത്ത് വാഗ്ദാനം ചെയ്യുന്നു. കൃത്യമായ പരിപാലനം നൽകിയാൽ ഫോക്സ്വാഗൺ കാറുകൾ വർഷങ്ങളോളം പുതുമയോടെ നിലനിൽക്കുമെന്ന് ഇതിനകം തെളിയിക്കപ്പെട്ടതാണ്.
4. കിയ സെൽറ്റോസ്
ഇന്ത്യൻ വിപണിയിൽ ഇതിനകം തന്നെ വിശ്വാസ്യത നേടിയ മോഡലാണ് സെൽറ്റോസ്. ഇതിലെ 1.5 ലിറ്റർ പെട്രോൾ എൻജിൻ വളരെ സ്മൂത്തായ പ്രകടനം കാഴ്ചവെക്കുന്നു. അത്യാധുനിക ഫീച്ചറുകൾക്കൊപ്പം തന്നെ മികച്ച സർവീസ് ശൃംഖലയും സെൽറ്റോസിനെ ദീർഘകാലത്തേക്ക് മികച്ചൊരു ഓപ്ഷനാക്കുന്നു.
5. മാരുതി സുസുക്കി ജിംനി
ആഗോളതലത്തിൽ തന്നെ ഓഫ്-റോഡ് പൈത്യകമുള്ള വാഹനമാണ് ജിംനി. ലാഡർ-ഫ്രെയിം ഷാസിയും ഫോർ-വീൽ ഡ്രൈവ് സംവിധാനവും ഇതിനെ ഏത് സാഹചര്യത്തിലും വിശ്വസിക്കാവുന്ന വാഹനമാക്കുന്നു. കുറഞ്ഞ മെയിന്റനൻസ് ചെലവും മാരുതിയുടെ വ്യാപകമായ സർവീസ് പിന്തുണയും 10 വർഷത്തിലധികം കാർ ഉപയോഗിക്കാൻ ആഗ്രഹിക്കുന്നവർക്ക് വലിയ ആശ്വാസമാണ്.
