ഇറാന്റെ ബാലിസ്റ്റിക് മിസൈൽ നിർമാണശാല തകർത്തെന്ന് ഇസ്രയേൽ
തെഹ്റാൻ: ഇറാന്റെ സൈനിക ശേഷിക്ക് കനത്ത ആഘാതമേൽപ്പിച്ചുകൊണ്ട് അവരുടെ പ്രധാനപ്പെട്ട ബാലിസ്റ്റിക് മിസൈൽ നിർമാണശാലകളിൽ ഒന്ന് തകർത്തതായി ഇസ്രയേൽ പ്രതിരോധ സേന അറിയിച്ചു. ഇറാനിൽ അവശേഷിക്കുന്ന ചുരുക്കം ചില മിസൈൽ നിർമാണ കേന്ദ്രങ്ങളിൽ ഒന്നാണിതെന്നും ബാലിസ്റ്റിക് മിസൈലുകൾക്ക് ആവശ്യമായ ഇന്ധനവും മറ്റ് സാമഗ്രികളും ഉത്പാദിപ്പിക്കുന്നതിൽ ഈ പ്ലാന്റിന് നിർണ്ണായക പങ്കുണ്ടെന്നും ഇസ്രയേൽ വ്യക്തമാക്കി.
ഇറാന്റെ മിസൈൽ പ്രഹരശേഷിയെ ദീർഘകാലത്തേക്ക് തളർത്തുക എന്ന ലക്ഷ്യത്തോടെയാണ് ഈ വ്യോമാക്രമണം നടത്തിയത്. ഇസ്രയേലിനെ ലക്ഷ്യം വെച്ച് ഇറാൻ നടത്തുന്ന നീക്കങ്ങൾക്കുള്ള മറുപടിയായാണ് ഈ നടപടിയെന്നും ഇറാന്റെ ആയുധ ശേഖരത്തിന്റെ നട്ടെല്ലൊടിക്കുന്ന നീക്കമാണ് ഇതെന്നും സൈനിക വക്താവ് കൂട്ടിച്ചേർത്തു. അതീവ സുരക്ഷയുള്ള മേഖലയിലായിരുന്നു ഈ പ്ലാന്റ് സ്ഥിതി ചെയ്തിരുന്നത്.
കൃത്യമായ പ്ലാനിംഗിലൂടെ ഇസ്രയേൽ യുദ്ധവിമാനങ്ങൾ ഈ കേന്ദ്രം ലക്ഷ്യം വെക്കുകയും വിജയകരമായി ദൗത്യം പൂർത്തിയാക്കുകയും ചെയ്തു. ഈ പ്ലാന്റ് തകർന്നതോടെ ഇറാന്റെ മിസൈൽ ഉത്പാദനത്തിൽ വലിയ കുറവുണ്ടാകുമെന്നും പുതിയ മിസൈലുകൾ നിർമ്മിക്കാൻ അവർക്ക് ഇനി വർഷങ്ങൾ വേണ്ടി വരുമെന്നുമാണ് ഇസ്രയേൽ സൈന്യത്തിന്റെ വിലയിരുത്തൽ. മേഖലയിൽ സംഘർഷം നിലനിൽക്കുന്ന സാഹചര്യത്തിൽ ഇറാന്റെ സൈനിക താവളങ്ങളെയും തന്ത്രപ്രധാനമായ കേന്ദ്രങ്ങളെയും ലക്ഷ്യം വെച്ചുള്ള ആക്രമണങ്ങൾ ഇസ്രായേൽ തുടരുകയാണ്.
ഇറാന്റെ ഭാഗത്തുനിന്ന് ഉണ്ടായേക്കാവുന്ന ഏതൊരു തിരിച്ചടിയെയും നേരിടാൻ സൈന്യം സജ്ജമാണെന്നും ഐഡിഎഫ് വൃത്തങ്ങൾ വ്യക്തമാക്കി. ടൈംസ് ഓഫ് ഇസ്രയേൽ ഉൾപ്പെടെയുള്ള പ്രമുഖ മാധ്യമങ്ങൾ ഈ സൈനിക നീക്കത്തെ ഇറാന്റെ മിസൈൽ പ്രോഗ്രാമിന് ഏറ്റ വലിയ തിരിച്ചടിയായാണ് റിപ്പോർട്ട് ചെയ്യുന്നത്. വരും ദിവസങ്ങളിൽ പശ്ചിമേഷ്യയിൽ ഈ ആക്രമണം വലിയ രാഷ്ട്രീയ-സൈനിക മാറ്റങ്ങൾക്ക് കാരണമായേക്കും.
