അസമിൽ പശു മോഷണം ആരോപിച്ച് രണ്ട് മുസ്ലിം യുവാക്കളെ ജനക്കൂട്ടം തല്ലിക്കൊന്നു

ഗുവാഹത്തി: അസമിൽ പശു മോഷണം ആരോപിച്ച് രണ്ട് മുസ്ലിം യുവാക്കളെ ആൾക്കൂട്ടം ക്രൂരമായി തല്ലിക്കൊന്നു. അരുണാചൽ പ്രദേശ് അതിർത്തിയോട് ചേർന്നുള്ള സോനിത്പൂർ ജില്ലയിലെ വിദൂര ഗ്രാമമായ ഭാലുക്പോംഗിൽ വെള്ളിയാഴ്ച പുലർച്ചെയാണ് നാടിനെ നടുക്കിയ സംഭവമുണ്ടായത്. ആക്രമണത്തിൽ മറ്റൊരാൾക്ക് ഗുരുതരമായി പരിക്കേറ്റിട്ടുണ്ട്. കൊല്ലപ്പെട്ടവർ മൊറിഗാവ് ജില്ലയിൽ നിന്നുള്ള ന്യൂനപക്ഷ സമുദായത്തിൽപ്പെട്ടവരാണെന്ന് പോലീസ് സ്ഥിരീകരിച്ചു.

വെള്ളിയാഴ്ച പുലർച്ചെ 3:30 ഓടെ ഗ്രാമത്തിൽ എത്തിയ സംഘം മൂന്ന് പശുക്കളെ മോഷ്ടിക്കാൻ ശ്രമിച്ചെന്നാണ് സോനിത്പൂർ എസ്.എസ്.പി ബരുൺ പുർകായസ്ത പറയുന്നത്. മോഷണശ്രമം ശ്രദ്ധയിൽപ്പെട്ട നാട്ടുകാർ ഇവരെ പിന്തുടർന്ന് പിടികൂടി ക്രൂരമായി മർദ്ദിക്കുകയായിരുന്നു. മർദ്ദനത്തിനിടെ പരിക്കേറ്റ ഒരാൾ അത്ഭുതകരമായി രക്ഷപ്പെട്ടു. കടത്താൻ ശ്രമിച്ചെന്ന് പറയപ്പെടുന്ന പശുക്കളെയും ഇവർ സഞ്ചരിച്ച വാഹനവും പോലീസ് കസ്റ്റഡിയിലെടുത്തിട്ടുണ്ട്.

സംഭവത്തിൽ പശു മോഷണത്തിനും ആൾക്കൂട്ട കൊലപാതകത്തിനും പോലീസ് വെവ്വേറെ കേസുകൾ രജിസ്റ്റർ ചെയ്തിട്ടുണ്ട്. എന്നാൽ കൊലപാതകവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ല. വലിയൊരു ജനക്കൂട്ടമാണ് ആക്രമണത്തിൽ പങ്കെടുത്തതെന്നും, സംഭവം നടന്നത് സിസിടിവി ക്യാമറകളോ മറ്റ് നിരീക്ഷണ സംവിധാനങ്ങളോ ഇല്ലാത്ത ഉൾപ്രദേശമായതിനാലുമാണ് പ്രതികളെ തിരിച്ചറിയാൻ വൈകുന്നതെന്നാണ് പോലീസ് നൽകുന്ന വിശദീകരണം.

കന്നുകാലി കടത്തിനെതിരെ സംസ്ഥാനത്ത് വിട്ടുവീഴ്ചയില്ലാത്ത നടപടികൾ സ്വീകരിക്കുമെന്ന് അസം മുഖ്യമന്ത്രി ഹിമന്ത ബിശ്വ ശർമ്മ കഴിഞ്ഞ ദിവസം വ്യക്തമാക്കിയിരുന്നു. ഇതിന് തൊട്ടുപിന്നാലെയാണ് ഈ കൊലപാതകം നടന്നിരിക്കുന്നത്. ജനുവരി മുതൽ ഇതുവരെ 850 ലധികം പേരെ അറസ്റ്റ് ചെയ്തിട്ടുണ്ടെന്നും 2,980 കിലോയിലധികം ബീഫ് പിടിച്ചെടുത്തതായും അദ്ദേഹം വ്യാഴാഴ്ച സമൂഹമാധ്യമങ്ങളിലൂടെ അറിയിച്ചിരുന്നു. വരാനിരിക്കുന്ന ബക്രീദ് പ്രമാണിച്ച് സംസ്ഥാനത്ത് കൂടുതൽ ജാഗ്രതാ നിർദ്ദേശങ്ങളും അദ്ദേഹം നൽകിയിരുന്നു.

പശു സംരക്ഷണത്തിന്റെ പേരിൽ അസമിൽ ന്യൂനപക്ഷങ്ങൾക്കെതിരെ നടക്കുന്ന ആൾക്കൂട്ട ആക്രമണങ്ങൾ വീണ്ടും വർദ്ധിക്കുന്നതിന്റെ സൂചനയായാണ് ഈ സംഭവത്തെ വിലയിരുത്തപ്പെടുന്നത്. ഇത് വെറുമൊരു ക്രമസമാധാന പ്രശ്നമല്ലെന്നും, തീവ്ര ഹിന്ദുത്വ രാഷ്ട്രീയത്തിന്റെ ഭാഗമായി ആസൂത്രണം ചെയ്യപ്പെടുന്നതാണെന്നും രാഷ്ട്രീയ നിരീക്ഷകർ ചൂണ്ടിക്കാട്ടുന്നു. കന്നുകാലി വ്യാപാരത്തിന്റെയും ബീഫ് ഉപയോഗത്തിന്റെയും പേരിൽ മുസ്ലീങ്ങൾ നിരന്തരം വേട്ടയാടപ്പെടുകയാണെന്നും, ഇത്തരം കേസുകളിൽ പോലീസിന്റെ ഭാഗത്തുനിന്നുണ്ടാകുന്ന മെല്ലെപ്പോക്കും പ്രതികൾക്ക് വേഗത്തിൽ ജാമ്യം ലഭിക്കുന്നതും വലിയ ആശങ്കയാണ് സൃഷ്ടിക്കുന്നതെന്നും മനുഷ്യാവകാശ പ്രവർത്തകരും പ്രതിപക്ഷവും വിമർശിക്കുന്നു.