ജയ്പൂരിലെ ആക്രമണത്തിന് പിന്നിൽ ആർ.എസ്.എസ് ഗുണ്ടകളാണെന്ന് സി.ജെ.പി സ്ഥാപകൻ അഭിജീത് ദീപ്കെ
നാഗ്പൂർ: ജയ്പൂരിൽ വെച്ച് തനിക്ക് നേരെ നടന്ന പരസ്യമായ മർദ്ദനത്തിന് പിന്നിൽ ആർ.എസ്.എസ് ബന്ധമുള്ള ഗുണ്ടകളാണെന്ന ആരോപണവുമായി കോക്രോച്ച് ജനതാ പാർട്ടി (സി.ജെ.പി) സ്ഥാപകൻ അഭിജീത് ദീപ്കെ രംഗത്തെത്തി. നാഗ്പൂരിലെ സംവിധാൻ സ്ക്വയറിൽ നടക്കുന്ന വൻ പ്രതിഷേധ പരിപാടിയിൽ പങ്കെടുക്കാൻ വിമാനത്താവളത്തിൽ എത്തിയപ്പോഴാണ് അദ്ദേഹം ഇക്കാര്യം വ്യക്തമാക്കിയത്. വിദ്യാർത്ഥികളുടെ യഥാർത്ഥ പ്രശ്നങ്ങളിൽ നിന്ന് ജനങ്ങളുടെ ശ്രദ്ധ തിരിക്കാനും, സർക്കാരിനെതിരെയുള്ള വിയോജിപ്പുകളെ അടിച്ചമർത്താനുമാണ് ഈ അക്രമത്തിലൂടെ ശ്രമിച്ചതെന്നും അദ്ദേഹം കൂട്ടിച്ചേർത്തു.
കഴിഞ്ഞ ദിവസമാണ് ജയ്പൂരിൽ നടന്ന പ്രതിഷേധ പ്രകടനത്തിനിടെ അനുഭാവികളുടെ തോളിലിരിക്കുകയായിരുന്ന അഭിജീത് ദീപ്കെയെ രണ്ട് യുവാക്കൾ ചേർന്ന് പരസ്യമായി മുഖത്തടിച്ചത്. സംഭവവുമായി ബന്ധപ്പെട്ട് രണ്ട് പേരെ പോലീസ് ഇതിനോടകം കസ്റ്റഡിയിലെടുത്തിട്ടുണ്ട്. എന്നാൽ, ദീപ്കെയെ മർദ്ദിച്ച രാജേഷ് ഗുർജാർ എന്നയാൾ തന്റെ അക്രമത്തെ പരസ്യമായി ന്യായീകരിച്ച് രംഗത്തെത്തിയതാണ് വിവാദം കൊഴുപ്പിച്ചത്. സി.ജെ.പി പ്രവർത്തകരെ ‘ജിഹാദി മാനസികാവസ്ഥയുള്ള കൊതുകുകൾ’ എന്ന് വിശേഷിപ്പിച്ച ഇയാൾ, സാമൂഹിക പ്രവർത്തനമെന്ന വ്യാജേന ഇന്ത്യയെ തകർക്കാനാണ് ഡിപ്കെ ശ്രമിക്കുന്നതെന്നും താനൊരു രാജ്യസ്നേഹിയായതിനാലാണ് പ്രതികരിച്ചതെന്നും അവകാശപ്പെട്ടു.
തനിക്ക് യാതൊരു രാഷ്ട്രീയ ബന്ധവുമില്ലെന്ന് അക്രമി അവകാശപ്പെടുമ്പോഴും, ഇതിന് പിന്നിൽ കൃത്യമായ രാഷ്ട്രീയ അജണ്ടയുണ്ടെന്നാണ് സി.ജെ.പി നേതാക്കൾ പറയുന്നത്. സർക്കാരിനോടോ അവരുടെ പ്രത്യയശാസ്ത്രത്തോടോ ആരെങ്കിലും എതിർത്ത് സംസാരിക്കുമ്പോഴെല്ലാം അവർ ഇത്തരം അക്രമങ്ങൾ അഴിച്ചുവിടാറുണ്ടെന്നും, ഇതിൽ തനിക്ക് യാതൊരു ഭയവുമില്ലെന്നും ഡിപ്കെ പ്രതികരിച്ചു. ഗാന്ധിജിയുടെയും അംബേദ്കറുടെയും പാത പിന്തുടർന്നുള്ള ഈ സത്യാഗ്രഹത്തിൽ നിന്നും ഒരു കോടിയിലധികം വരുന്ന വിദ്യാർത്ഥികൾക്ക് വേണ്ടി സമാധാനപരമായി മുന്നോട്ട് പോകുമെന്നും അദ്ദേഹം വ്യക്തമാക്കി.
ഭീരുത്വം നിറഞ്ഞ ഈ ആക്രമണത്തിന് പിന്നിൽ ബി.ജെ.പി-ആർ.എസ്.എസ് ബന്ധമുള്ളവരാണെന്നും, ഇത്തരം ഭീഷണികളിലൂടെ വിയോജിക്കാനുള്ള പൗരന്മാരുടെ ഭരണഘടനാപരമായ അവകാശത്തെ നിശബ്ദമാക്കാൻ കഴിയില്ലെന്നും സി.ജെ.പി വക്താവ് സൗരവ് ദാസ് പറഞ്ഞു. തകർന്ന ഒരു വിദ്യാഭ്യാസ സമ്പ്രദായം കാരണം ദുരിതമനുഭവിക്കുന്ന വിദ്യാർത്ഥികൾക്ക് നീതി ലഭിക്കാൻ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ അടിയന്തരമായി രാജിവെക്കണമെന്നും അദ്ദേഹം ആവശ്യപ്പെട്ടു.
മുൻ ഡൽഹി മുഖ്യമന്ത്രി അരവിന്ദ് കെജ്രിവാളും ദീപ്കെയ്ക്ക് നേരെയുണ്ടായ ആക്രമണത്തെ ശക്തമായ ഭാഷയിൽ അപലപിച്ചു. ആശയപരമായി വിയോജിപ്പുകൾ ഉണ്ടെങ്കിൽ പോലും ഒരാളെ ശാരീരികമായി ആക്രമിക്കാൻ ആർക്കും അവകാശമില്ലെന്നും, അക്രമികൾ ഏത് പാർട്ടിക്കാരാണെന്ന് എല്ലാവർക്കും അറിയാവുന്നതുകൊണ്ട് അവർക്കെതിരെ യാതൊരു നടപടിയുമുണ്ടാകില്ലെന്നും കെജ്രിവാൾ കുറ്റപ്പെടുത്തി. ഇന്ത്യയിലുടനീളം സമാധാനപരമായി പ്രതിഷേധിക്കുന്ന ഡിപ്കെയ്ക്ക് നേരെയുണ്ടായ ഈ ആക്രമണം തികച്ചും ലജ്ജാകരമാണെന്നും, ഫാസിസ്റ്റുകൾ എന്തിനാണ് അഹിംസാത്മകമായ പ്രതിഷേധങ്ങളെ എപ്പോഴും ഭയപ്പെടുന്നതെന്നും മുതിർന്ന അഭിഭാഷകൻ ആശിഷ് ഗെലോട്ടും ചോദിച്ചു.
അതേസമയം, നീറ്റ് പരീക്ഷാ വിവാദത്തിൽ വിദ്യാഭ്യാസ മന്ത്രിയുടെ രാജി ആവശ്യപ്പെട്ട് നാഗ്പൂരിലെ സംവിധാൻ സ്ക്വയറിൽ നടക്കുന്ന വൻ പ്രതിഷേധത്തിൽ അണിനിരക്കാൻ വിദ്യാർത്ഥികളോടും യുവാക്കളോടും ദീപ്കെ അഭ്യർത്ഥിച്ചു. രണ്ടായിരത്തിലധികം ആളുകൾ പങ്കെടുക്കുമെന്ന് പ്രതീക്ഷിക്കുന്ന ഈ പ്രതിഷേധത്തിന്റെ പശ്ചാത്തലത്തിൽ നാഗ്പൂരിലെ പ്രധാന കേന്ദ്രങ്ങളിലെല്ലാം സുരക്ഷാ ക്രമീകരണങ്ങൾ പോലീസ് കർശനമാക്കിയിട്ടുണ്ട്.
