‘ഇസ്രയേലിൻ്റെ ക്രൂരതകളെ സ്പോർട്സിലൂടെ കഴുകിക്കളയാനാവില്ല‘; കാനഡയിലെ ലോകകപ്പ് വേദിക്കു മുന്നിൽ ഫിഫക്കെതിരെ പ്രതിഷേധവുമായി ആരാധകർ

ടൊറൻ്റോ: 2026 ഫിഫ ലോകകപ്പിലെ കാനഡയുടെ ആദ്യ മത്സരത്തിന് മണിക്കൂറുകൾക്ക് മുൻപ് ടൊറൻ്റോയിൽ ഫിഫക്കെതിരെ വൻ പ്രതിഷേധം. ഫിഫയിൽ നിന്ന് ഇസ്രയേലിനെ പൂർണ്ണമായും പുറത്താക്കണം എന്നാവശ്യപ്പെട്ടുകൊണ്ട് ടൊറൻ്റോയിലെ തിരക്കേറിയ ഗാർഡിനർ എക്സ്പ്രസ്സ് വേയ്ക്ക് സമീപമുള്ള ലോകകപ്പ് ലോഗോയ്ക്ക് മുകളിൽ ആക്ടിവിസ്റ്റുകൾ വലിയ ചുവന്ന ബാനർ ഉയർത്തി. കാനഡയും ബോസ്നിയയും തമ്മിലുള്ള മത്സരത്തിനായി ടൊറൻ്റോ സ്റ്റേഡിയത്തിലേക്ക് പോകുന്ന യാത്രക്കാരുടെ ശ്രദ്ധ പെട്ടെന്ന് പിടിച്ചുപറ്റുന്ന രീതിയിലായിരുന്നു ‘ഇസ്രയേലിനെ ഫിഫയിൽ നിന്ന് പുറത്താക്കുക’ എന്നെഴുതിയ ഈ കൂറ്റൻ ബാനർ സ്ഥാപിച്ചത്. ഇസ്രയേൽ ദേശീയ ടീം ഈ ലോകകപ്പിന് യോഗ്യത നേടിയിട്ടില്ലെങ്കിലും ഫിഫയിലെ അവരുടെ അംഗത്വത്തിനെതിരെയാണ് ഈ പ്രതിഷേധം നടന്നത്.

‘സ്വതന്ത്ര ഫലസ്തീന് വേണ്ടി ജൂതന്മാർ’ എന്ന് രേഖപ്പെടുത്തിയ ഷർട്ടുകൾ ധരിച്ചാണ് ഒരു കൂട്ടം ആളുകൾ ഈ പ്രതിഷേധത്തിൽ പങ്കെടുത്തത്. ഫലസ്തീനികൾക്കെതിരെയുള്ള ഇസ്രയേലിൻ്റെ നിരന്തരമായ ആക്രമണങ്ങളിൽ ഫിഫയ്ക്കും പങ്കുണ്ടെന്ന് പ്രതിഷേധക്കാരുടെ വക്താവായ ഫൈസൽ ഇബ്രാഹിം ആരോപിച്ചു. നിയമവിരുദ്ധമായി കയ്യേറിയ വെസ്റ്റ് ബാങ്ക്, സിറിയൻ പ്രദേശങ്ങളിൽ ഇസ്രയേൽ ഫുട്ബോൾ അസോസിയേഷൻ നടത്തുന്ന മത്സരങ്ങൾക്ക് നേരെ ഫിഫ ബോധപൂർവ്വം കണ്ണടയ്ക്കുകയാണെന്നും, ആ മത്സരങ്ങൾ ഔദ്യോഗികമായി സംപ്രേക്ഷണം ചെയ്യുന്നതിലൂടെ ഇത്തരം അധിനിവേശങ്ങളെ ഫിഫ പിന്തുണയ്ക്കുകയാണെന്നും അദ്ദേഹം കുറ്റപ്പെടുത്തി. ഇതിനുപുറമെ, 2024 അവസാനത്തോടെ ഗാസയിൽ വെച്ച് ഇസ്രയേൽ സൈന്യം തടവിലാക്കിയ പ്രമുഖ ഫലസ്തീൻ ഡോക്ടറും വടക്കൻ ഗാസയിലെ കമാൽ അദ്വാൻ ആശുപത്രി ഡയറക്ടറുമായ ഹുസാം അബു സഫിയയെ ഉടൻ മോചിപ്പിക്കണമെന്നും പ്രതിഷേധക്കാർ ശക്തമായി ആവശ്യപ്പെട്ടു. അന്താരാഷ്ട്ര നിയമപ്രകാരം വെസ്റ്റ് ബാങ്കിൻ്റെ നിയമപരമായ പദവി വ്യക്തമല്ലാത്തതിനാൽ ഇസ്രയേൽ ക്ലബ്ബുകൾക്കെതിരെ നടപടിയെടുക്കില്ലെന്ന് കഴിഞ്ഞ മാർച്ചിൽ ഫിഫ വ്യക്തമാക്കിയിരുന്നു. ഗാസയിലെ യുദ്ധത്തിൻ്റെ പശ്ചാത്തലത്തിൽ ഇസ്രയേലിനെ അന്താരാഷ്ട്ര ഫുട്ബോളിൽ നിന്ന് വിലക്കണമെന്ന് യുഎൻ വിദഗ്ധർ ഫിഫയോടും യൂറോപ്യൻ ഫുട്ബോൾ അസോസിയേഷനോടും (യുവേഫ) നേരത്തെ ആവശ്യപ്പെട്ടിട്ടുണ്ട്.