‘പ്രിയദർശിനി ഉദ്ഘാടനത്തിന് തന്നെ ക്ഷണിച്ചില്ല’; മുഖ്യമന്ത്രിക്കും ഗതാഗത മന്ത്രിക്കും പരാതി നൽകി കണ്ണൂർ മേയർ
കണ്ണൂർ: സംസ്ഥാന സർക്കാരിന്റെ പ്രിയദർശിനി സൗജന്യ യാത്രാ പദ്ധതിയുടെ ഉദ്ഘാടനച്ചടങ്ങിലേക്ക് തന്നെ ക്ഷണിച്ചില്ലെന്നാരോപിച്ച് കണ്ണൂർ മേയർ പി. ഇന്ദിര മുഖ്യമന്ത്രിക്കും ഗതാഗത മന്ത്രിക്കും പരാതി നൽകി. സ്ത്രീകൾക്കായുള്ള സർക്കാർ പരിപാടിയിൽ നിന്ന് തന്നെ ഒഴിവാക്കിയത് നിർഭാഗ്യകരമാണെന്നും, ആരും ക്ഷണിക്കാത്തതിനാലാണ് ചടങ്ങിൽ പങ്കെടുക്കാതിരുന്നതെന്നും മേയർ വ്യക്തമാക്കി. യുഡിഎഫ് ഈ പദ്ധതി സംസ്ഥാനത്തുടനീളം ആഘോഷമാക്കുമ്പോൾ കണ്ണൂരിൽ കോൺഗ്രസ് വനിതാ മേയറെ ക്ഷണിച്ചില്ലെന്ന വിവാദം കല്ലുകടിയായിരിക്കുകയാണ്.
എന്നാൽ, മേയർക്ക് ഔദ്യോഗികമായി കത്ത് നൽകിയിരുന്നതായി കണ്ണൂർ കെഎസ്ആർടിസി ഡിടിഒ മുഹമ്മദ് ബഷീർ അറിയിച്ചു. പരിപാടിയിലേക്ക് ക്ഷണിക്കാൻ മേയറെ നേരിൽ കാണുകയോ ഫോണിൽ വിളിക്കുകയോ ചെയ്യേണ്ടതില്ലെന്നും, ഇതുസംബന്ധിച്ച് സർക്കാർ നിർദേശമുണ്ടെന്നും അദ്ദേഹം കൂട്ടിച്ചേർത്തു.
