ബിഹാറിൽ പ്രതിഷേധിച്ച വിദ്യാർത്ഥികൾക്ക് നേരെ എ.കെ 47 ഉപയോഗിച്ച് വെടിവെപ്പ്; മൂന്ന് പേർക്ക് പരിക്കേറ്റു; പോലീസുകാരന് സസ്പെൻഷൻ

പട്ന: നീറ്റ് ചോദ്യപ്പേപ്പർ ചോർച്ചയുമായി ബന്ധപ്പെട്ട് ബിഹാറിലെ സീവാനിൽ പ്രതിഷേധിച്ച വിദ്യാർത്ഥികൾക്ക് നേരെ എ.കെ 47 തോക്ക് ഉപയോഗിച്ച് വെടിയുതിർത്ത പോലീസുകാരനെതിരെ നടപടി. പ്രതിഷേധക്കാർക്ക് നേരെ പോലീസുകാരൻ വെടിയുതിർക്കുന്നതിന്റെ ദൃശ്യങ്ങൾ ക്യാമറയിൽ പതിഞ്ഞതിന് പിന്നാലെയാണ് ഇയാളെ സസ്പെൻഡ് ചെയ്തത്.

പോലീസ് വെടിവെപ്പിൽ മൂന്ന് വിദ്യാർത്ഥികൾക്ക് വെടിയേൽക്കുകയും ഇവരെ ആശുപത്രിയിൽ പ്രവേശിപ്പിക്കുകയും ചെയ്തിട്ടുണ്ട്. പോലീസുകാരനെതിരെ നടപടിയെടുത്ത വിവരം സീവാൻ എസ്.പി പൂരൺ കുമാർ ഝാ ആണ് ഔദ്യോഗികമായി സ്ഥിരീകരിച്ചത്. നീറ്റ് ചോദ്യപ്പേപ്പർ ചോർച്ചാ വിവാദത്തിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന് ആവശ്യപ്പെട്ടും വിദ്യാർത്ഥികൾക്ക് നേരെ പട്നയിൽ നടന്ന ലാത്തിച്ചാർജിനെതിരെയും കോക്രോച്ച് ജനതാ പാർട്ടി (സി.ജെ.പി), ഇടതുപക്ഷ സംഘടനകൾ എന്നിവയുടെ നേതൃത്വത്തിൽ ബിഹാറിൽ ആഹ്വാനം ചെയ്ത ബന്ദിനിടെയാണ് വ്യാപക സംഘർഷമുണ്ടായത്.

സീവാനിലെ പ്രതിഷേധം അക്രമാസക്തമാകുകയും പോലീസിന് നേരെ കല്ലേറുണ്ടാകുകയും ചെയ്തതോടെ ജനക്കൂട്ടത്തെ പിരിച്ചുവിടാൻ പൊലീസ് കണ്ണീർ വാതകം പ്രയോഗിക്കുകയും ലാത്തിച്ചാർജ് നടത്തുകയും ചെയ്തു. ഇതിനിടെയാണ് യാതൊരു പ്രകോപനവുമില്ലാതെ വിദ്യാർത്ഥികൾക്ക് നേരെ പൊലീസ് ഉദ്യോഗസ്ഥൻ എ.കെ 47 ഉപയോഗിച്ച് വെടിവെച്ചത്. സംഭവത്തിൽ സർക്കാരിനെതിരെ രൂക്ഷവിമർശനവുമായി പ്രതിപക്ഷ നേതാക്കൾ രംഗത്തെത്തി.

ലോക്‌സഭാ പ്രതിപക്ഷ നേതാവ് രാഹുൽ ഗാന്ധി വിദ്യാർത്ഥികൾക്ക് നേരെയുള്ള പോലീസ് അതിക്രമത്തെ ശക്തമായി അപലപിച്ചു. ഡൽഹിയിൽ പെല്ലറ്റ് ഗണ്ണുകളും ബിഹാറിൽ എ.കെ 47-ഉം ഉപയോഗിച്ച് വിദ്യാർത്ഥികളുടെ ശബ്ദം അടിച്ചമർത്തുകയാണെന്നും അദ്ദേഹം കുറ്റപ്പെടുത്തി. വിദ്യാർത്ഥികൾക്കെതിരെ എടുത്ത കേസുകൾ പിൻവലിക്കുമെന്ന് വാഗ്ദാനം നൽകിയ പ്രധാനമന്ത്രി നരേന്ദ്ര മോദി അവർക്ക് നേരെ നടക്കുന്ന ഈ ക്രൂരമായ ആക്രമണങ്ങൾക്ക് രാജ്യത്തോട് മാപ്പ് പറയണമെന്നും രാഹുൽ ഗാന്ധി ആവശ്യപ്പെട്ടു.

ഇതിന് പുറമെ ബിഹാർ പ്രതിപക്ഷ നേതാവ് തേജസ്വി യാദവ് വെടിയേറ്റ് ചികിത്സയിൽ കഴിയുന്ന വിദ്യാർത്ഥികളെ ആശുപത്രിയിൽ സന്ദർശിച്ചു. നിരപരാധികളായ വിദ്യാർത്ഥികൾക്ക് നേരെ എ.കെ 47 ഉപയോഗിച്ച് വെടിയുതിർത്ത സർക്കാരിന്റെയും പൊലീസിന്റെയും നടപടിയെ അദ്ദേഹം ശക്തമായി അപലപിക്കുകയും ചെയ്തു. പട്നയിലും മറ്റ് നഗരങ്ങളിലും സമാനമായ രീതിയിൽ വലിയ പ്രതിഷേധങ്ങളും സംഘർഷങ്ങളും അരങ്ങേറി. പ്രതിഷേധക്കാരെ നേരിടാൻ വൻ പൊലീസ് സന്നാഹത്തെയാണ് വിവിധയിടങ്ങളിൽ വിന്യസിച്ചിരിക്കുന്നത്.