തെക്കൻ സൗദിയിൽ വൻ ഹൂതി ആക്രമണം; 73 പേർക്ക് പരിക്ക്; കനത്ത തിരിച്ചടി നൽകുമെന്ന് സഖ്യസേന

റിയാദ്: സൗദി അറേബ്യയുടെ തെക്കൻ പ്രവിശ്യകളായ അബഹ, ഖമീസ് മുശൈത്, ജിസാൻ, നജ്റാൻ എന്നിവിടങ്ങളെ ലക്ഷ്യമിട്ട് ഹൂതി ഭീകര സംഘടന നടത്തിയ ആക്രമണത്തിൽ സ്ത്രീകൾക്കും കുട്ടികൾക്കും ഉൾപ്പെടെ 73 സാധാരണക്കാർക്ക് പരിക്കേറ്റു. ജനവാസ കേന്ദ്രങ്ങളെയും സാമ്പത്തിക സ്ഥാപനങ്ങളെയും ലക്ഷ്യമിട്ടുള്ള ഈ വ്യോമാക്രമണങ്ങൾ രാജ്യത്തിന്റെ പരമാധികാരത്തിന്മേലുള്ള നഗ്നമായ ലംഘനമാണെന്ന് സഖ്യസേന വക്താവ് മേജർ ജനറൽ തുർക്കി അൽ-മാലിക്കി ഔദ്യോഗികമായി അറിയിച്ചു.

രാജ്യത്തെ പൗരന്മാരുടെയും വിദേശികളായ താമസക്കാരുടെയും സുരക്ഷയ്ക്ക് ഹൂതികൾ നേരിട്ടുള്ള ഭീഷണിയുയർത്തുകയാണെന്ന് അദ്ദേഹം വ്യക്തമാക്കി. സൗദിയുടെ ദേശീയ സമ്പത്തിനും സിവിലിയൻ സ്ഥാപനങ്ങൾക്കും ബോധപൂർവ്വം നാശനഷ്ടങ്ങൾ വരുത്താനാണ് ഈ അന്യായമായ ആക്രമണങ്ങളിലൂടെ അവർ ലക്ഷ്യമിടുന്നത്. യെമനിലും വിശാലമായ അറബ്-ഇസ്ലാമിക മേഖലയിലും സമാധാനവും സ്ഥിരതയും കൈവരിക്കുന്നതിനെ പൂർണ്ണമായും എതിർക്കുന്ന ഹൂതികളുടെ തീവ്രവാദ സ്വഭാവമാണ് ഇതിലൂടെ ഒരിക്കൽ കൂടി പുറത്തുവന്നിരിക്കുന്നതെന്നും മേജർ ജനറൽ തുർക്കി അൽ-മാലിക്കി കുറ്റപ്പെടുത്തി.

പൗരന്മാരെയും ദേശീയ സമ്പത്തിനെയും നിരന്തരം ലക്ഷ്യമിടുന്ന ഹൂതികളുടെ ശ്രമങ്ങൾ, ഈ ഭീകര സംഘടനയുടെ ശത്രുതാപരമായ സമീപനം എത്രത്തോളം ഗൗരവമേറിയതാണെന്ന് വ്യക്തമാക്കുന്നുണ്ട്. സൗദി അറേബ്യയുടെ പരമാധികാരവും ദേശീയ സമ്പത്തും സംരക്ഷിക്കുന്നതിനും, ജനങ്ങളുടെ സുരക്ഷ ഉറപ്പാക്കുന്നതിനുമായി ഹൂതികളുടെ ഈ നീക്കങ്ങളെ എല്ലാവിധ ദൃഢതയോടും കൂടി തന്നെ നേരിടുമെന്ന് സഖ്യസേന പ്രഖ്യാപിച്ചു. ഇതിനായി സൈനിക തലത്തിൽ ആവശ്യമായ എല്ലാ നടപടികളും സേനാ ആസ്ഥാനം ഇതിനകം സ്വീകരിച്ചിട്ടുണ്ട്. ഭീഷണിയുടെ ഉറവിടങ്ങളെ പ്രതിരോധിക്കാനും അവയുടെ അപകടസാധ്യത പൂർണ്ണമായി ഇല്ലാതാക്കാനും ആവശ്യമായ കർശന നടപടികളും മുൻകരുതലുകളും സഖ്യസേന സ്വീകരിക്കുമെന്നും അദ്ദേഹം കൂട്ടിച്ചേർത്തു.