‘മെസി ബാലണ് ഡി ഓര് നേടിയാലും അതിൽ അത്ഭുതമില്ല, എനിക്ക് അവസരം കിട്ടിയാൽ 100 വോട്ടും ഞാൻ അദ്ദേഹത്തിന് നൽകും’; മെസിയെ പുകഴ്ത്തി സിനദിൻ സിദാൻ
പാരീസ്: ഫുട്ബോൾ ലോകത്തെ ഏറ്റവും വലിയ വ്യക്തിഗത പുരസ്കാരമായ 2026-ലെ ബാലൺ ഡി ഓർ സാധ്യതാപ്പട്ടികയിൽ ഇടംപിടിച്ച ഇതിഹാസ താരം ലയണൽ മെസിക്ക് പൂർണ്ണ പിന്തുണയുമായി ഫ്രഞ്ച് ഇതിഹാസവും മുഖ്യ പരിശീലകനുമായ സിനദിൻ സിദാൻ. അടുത്തിടെ അന്താരാഷ്ട്ര ഫുട്ബോളിൽ നിന്ന് വിരമിച്ചതിന് ശേഷവും മെസി ബാലൺ ഡി ഓർ നാമനിർദ്ദേശ പട്ടികയിൽ ഇടംപിടിച്ചതിനെക്കുറിച്ചാണ് സിദാൻ സംസാരിച്ചത്. 39-ാം വയസ്സിലും ലോകത്തെ മികച്ച താരങ്ങൾക്കൊപ്പം മെസി മത്സരിക്കുന്നത് അവിശ്വസനീയമായ കാര്യമാണെന്നും, അദ്ദേഹം പുരസ്കാരം നേടിയാൽ തനിക്ക് ഒട്ടും അത്ഭുതം തോന്നില്ലെന്നും സിദാൻ വ്യക്തമാക്കി.
“എനിക്ക് 100 തവണ വോട്ട് ചെയ്യാൻ അവസരം ലഭിച്ചാൽ, അതെല്ലാം ഞാൻ മെസിക്ക് നൽകും. 39-ാം വയസ്സിലും അദ്ദേഹം ലോകത്തിലെ മികച്ച താരങ്ങൾക്കൊപ്പം മത്സരിക്കുന്നത് എത്രത്തോളം അവിശ്വസനീയമായ നേട്ടമാണെന്ന് പലരും മനസ്സിലാക്കുന്നില്ല. ഈ പ്രായമാകുമ്പോഴേക്കും മിക്ക ഫുട്ബോൾ താരങ്ങളുടെയും കരിയറിലെ ഏറ്റവും മികച്ച കാലഘട്ടം അവസാനിച്ചിട്ടുണ്ടാകും. സത്യസന്ധമായി പറഞ്ഞാൽ, 39-ാം വയസ്സിൽ എനിക്ക് ഒരു ഗോൾ പോലും നേടാൻ സാധിക്കുമായിരുന്നോ എന്ന് എനിക്കോർമ്മയില്ല. ഈ പ്രായത്തിലും ഇത്രയും ഉയർന്ന നിലവാരത്തിൽ കളിച്ച് മികച്ച താരങ്ങളിൽ ഒരാളായി പരിഗണിക്കപ്പെടുന്നത് അതിശയകരമാണ്,” സിദാൻ പറഞ്ഞു.
മെസിയാണ് എക്കാലത്തെയും മികച്ച താരം എന്നതിൽ ആർക്കെങ്കിലും ഇപ്പോഴും സംശയമുണ്ടെങ്കിൽ, അവർക്ക് ഫുട്ബോളിനെക്കുറിച്ച് സംസാരിക്കാൻ യാതൊരു അവകാശവുമില്ലെന്നും സിദാൻ തുറന്നടിച്ചു. ഫുട്ബോളിൽ ഇത്രയും മഹത്തായ പ്രകടനങ്ങൾ എങ്ങനെയാണ് ഒരാൾക്ക് കാണാതെ പോകാൻ കഴിയുകയെന്നും അദ്ദേഹം ചോദിച്ചു. ഈ വർഷത്തെ നാമനിർദ്ദേശ പട്ടികയിലുള്ള മറ്റേതെങ്കിലും താരത്തിന് മെസിയേക്കാൾ വലിയ സ്വാധീനം ചെലുത്താൻ കഴിഞ്ഞിട്ടുണ്ടെന്ന് ആർക്കെങ്കിലും സത്യസന്ധമായി പറയാൻ കഴിയുമോ എന്നും അദ്ദേഹം ചോദിച്ചു.
2028-ലെ കോപ്പ അമേരിക്കയിലും മെസി അർജന്റീനയ്ക്കായി കളത്തിലിറങ്ങുമെന്ന് ആരാധകർ പ്രതീക്ഷിച്ചിരിക്കെയാണ്, ഫുട്ബോൾ ലോകത്തെ ഒന്നടങ്കം കണ്ണീരിലാഴ്ത്തി അദ്ദേഹം അടുത്തിടെ തന്റെ വിരമിക്കൽ പ്രഖ്യാപിച്ചത്. സോഷ്യൽ മീഡിയയിലൂടെയായിരുന്നു അദ്ദേഹത്തിന്റെ ഔദ്യോഗിക പ്രഖ്യാപനം. അർജന്റീനക്കായി 207 മത്സരങ്ങളിൽ നിന്ന് 125 ഗോളുകളാണ് മെസി അടിച്ചുകൂട്ടിയത്. ആറ് ലോകകപ്പുകളിൽ നിന്നായി 21 ഗോളുകൾ നേടി, ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടുന്ന രണ്ടാമത്തെ താരമായും, അർജന്റീനയ്ക്ക് വേണ്ടി ഏറ്റവും കൂടുതൽ ലോകകപ്പ് ഗോളുകൾ നേടുന്ന താരമായും അദ്ദേഹം മാറി. 2026-ൽ തുടർച്ചയായി രണ്ടാം തവണയും അർജന്റീനയെ ലോകകപ്പ് ഫൈനലിൽ എത്തിക്കുന്നതിൽ അദ്ദേഹം നിർണ്ണായക പങ്കുവഹിച്ചു. ഫൈനലിൽ സ്പെയിനിനോട് പരാജയപ്പെട്ടെങ്കിലും, 2026 ലോകകപ്പിൽ എട്ട് ഗോളുകളും നാല് അസിസ്റ്റുകളുമാണ് മെസി സ്വന്തമാക്കിയത്.
