‘പ്രധാന തീരുമാനങ്ങൾ അറിയുന്നത് മാധ്യമങ്ങളിലൂടെ; മുഖ്യമന്ത്രി മുന്നണി യോഗം വിളിക്കുന്നില്ല’: അതൃപ്തി പരസ്യമാക്കി അടൂർ പ്രകാശ്
തിരുവനന്തപുരം: മുഖ്യമന്ത്രി മുന്നണി യോഗങ്ങൾ വിളിക്കാൻ തയ്യാറാകുന്നില്ലെന്നും, കാബിനറ്റ് പദവികൾ നൽകുന്നതുൾപ്പെടെയുള്ള സുപ്രധാന തീരുമാനങ്ങൾ താൻ മാധ്യമങ്ങളിലൂടെയാണ് അറിയുന്നതെന്നും തുറന്നടിച്ച് യുഡിഎഫ് കൺവീനർ അടൂർ പ്രകാശ്. മുന്നണിയിൽ യാതൊരുവിധ കൂടിയാലോചനകളും നടക്കുന്നില്ലെന്ന കടുത്ത അതൃപ്തി ഉടൻ തന്നെ ഹൈക്കമാൻഡിനെ അറിയിക്കുമെന്നും അദ്ദേഹം തിരുവനന്തപുരത്ത് മാധ്യമങ്ങളോട് പ്രതികരിച്ചു.
മാണി സി. കാപ്പന് ഉൾപ്പെടെ കാബിനറ്റ് പദവി നൽകിയ തീരുമാനം താൻ മുൻകൂട്ടി അറിഞ്ഞിരുന്നില്ല. പദവി ലഭിച്ചവർ അതിന് അർഹരല്ലെന്നോ, അവരെ തള്ളിപ്പറയുകയോ അല്ല ചെയ്യുന്നത്. എന്നാൽ മുന്നണിയുടെ കൺവീനർ എന്ന നിലയിൽ ഇത്തരം കാര്യങ്ങളിൽ ഒരു മുൻകൂർ കൂടിയാലോചന നടക്കേണ്ടതായിരുന്നു. പലരും വിവരങ്ങൾ ചോദിച്ച് വിളിച്ചപ്പോൾ മറുപടി നൽകാൻ പോലുമാകാത്ത അവസ്ഥയുണ്ടായി. മുഖ്യമന്ത്രിയുടെ തിരക്കുകൾ മനസ്സിലാക്കുന്നുണ്ടെങ്കിലും, ഇത്തരം പ്രധാന വിവരങ്ങൾ മുന്നണി കൺവീനർ മാധ്യമങ്ങളിലൂടെ മാത്രം അറിയേണ്ടി വരുന്നത് അങ്ങേയറ്റം ദുഃഖകരമാണെന്നും തന്റെ പ്രതിഷേധം എഐസിസിയെ അറിയിക്കുമെന്നും അടൂർ പ്രകാശ് വ്യക്തമാക്കി.
യുഡിഎഫ് ചെയർമാൻ കൂടിയായ മുഖ്യമന്ത്രിയുടെ നിർദ്ദേശങ്ങൾക്കനുസരിച്ചാണ് കൺവീനർ പ്രവർത്തിക്കേണ്ടതെന്ന സാമാന്യമര്യാദ താൻ നാളിതുവരെ പാലിച്ചിട്ടുണ്ട്. എന്നാൽ സംസ്ഥാനത്തെ വൈദ്യുതി പ്രതിസന്ധിയിലും, വിമാനയാത്രയുമായി ബന്ധപ്പെട്ട വിവാദങ്ങളിലും മുഖ്യമന്ത്രി കാര്യങ്ങൾ പൊതുജനങ്ങളെ കൃത്യമായി ബോധ്യപ്പെടുത്തേണ്ടതുണ്ടായിരുന്നുവെന്ന് അദ്ദേഹം ചൂണ്ടിക്കാട്ടി. സംസ്ഥാനത്തെ ഉപതെരഞ്ഞെടുപ്പുകളിൽ മുന്നണിയിൽ വലിയ ഏകോപനക്കുറവുണ്ടായെന്നും, പലയിടത്തും മുഖ്യമന്ത്രി സ്വന്തം നിലയ്ക്കാണ് പ്രവർത്തിച്ചതെന്നും അടൂർ പ്രകാശ് കുറ്റപ്പെടുത്തി. ചിറയിൻകീഴിൽ രമ്യ ഹരിദാസുമായി ബന്ധപ്പെട്ടുണ്ടായ വിഷയം തിരഞ്ഞെടുപ്പിൽ മുന്നണിക്ക് തിരിച്ചടിയായെന്നും അദ്ദേഹം പറഞ്ഞു. മുഖ്യമന്ത്രി ബോധപൂർവ്വം അവഗണിക്കുകയാണോ എന്ന മാധ്യമപ്രവർത്തകരുടെ ചോദ്യത്തിന്, ‘അത് നിങ്ങൾ തന്നെ വിലയിരുത്തൂ’ എന്നായിരുന്നു അദ്ദേഹത്തിന്റെ മറുപടി.
