44 വർഷത്തെ കാത്തിരിപ്പിന് വിരാമം; ;ചൈനയെ തകർത്ത് ഏഷ്യൻ ഗെയിംസ് വനിതാ ഹോക്കിയിൽ ഇന്ത്യയ്ക്ക് സ്വർണം
നഗോയ: ഏഷ്യൻ ഗെയിംസ് വനിതാ ഹോക്കിയിൽ ഇന്ത്യയ്ക്ക് ചരിത്ര നേട്ടം. 44 വർഷം നീണ്ട കാത്തിരിപ്പിനൊടുവിൽ ഇന്ത്യൻ വനിതാ ഹോക്കി ടീം സ്വർണ്ണ മെഡൽ സ്വന്തമാക്കി. വാശിയേറിയ കലാശപ്പോരാട്ടത്തിൽ നിലവിലെ ചാമ്പ്യന്മാരായ ചൈനയെ എതിരില്ലാത്ത ഒരു ഗോളിന് (1-0) പരാജയപ്പെടുത്തിയാണ് ഇന്ത്യ സുവർണ്ണനേട്ടം കൈവരിച്ചത്. ഈ ചരിത്ര വിജയത്തോടെ 2028-ൽ നടക്കുന്ന ലോസ് ഏഞ്ചലസ് ഒളിമ്പിക്‌സിലേക്കുള്ള നേരിട്ടുള്ള യോഗ്യതയും ഇന്ത്യ ഉറപ്പാക്കി.
മത്സരത്തിന്റെ പത്താം മിനിറ്റിൽ ലാൽറെംസിയാമി തൊടുത്ത കിടിലൻ റിവേഴ്സ് ഹിറ്റ് ആണ് ഇന്ത്യയ്ക്ക് വിജയഗോൾ സമ്മാനിച്ചത്. ഗോൾ വഴങ്ങിയതോടെ സമനില പിടിക്കാൻ ഗോൾകീപ്പറെ വരെ പിൻവലിച്ച് ചൈന അവസാന നിമിഷങ്ങളിൽ കടുത്ത ആക്രമണം അഴിച്ചുവിട്ടു. എന്നാൽ ഇന്ത്യൻ പ്രതിരോധം പാറപോലെ ഉറച്ചുനിന്നു. രണ്ടാം ക്വാർട്ടറിൽ ചൈനയ്ക്ക് ലഭിച്ച പെനാൽറ്റി സ്ട്രോക്ക് തടഞ്ഞുകൊണ്ട് ഗോൾകീപ്പർ സവിത പുനിയ നടത്തിയ തകർപ്പൻ സേവും ഇന്ത്യയുടെ വിജയത്തിൽ നിർണായകമായി.
1982-ൽ ഡൽഹിയിൽ നടന്ന ഏഷ്യൻ ഗെയിംസിലാണ് ഇന്ത്യ ഇതിന് മുൻപ് വനിതാ ഹോക്കിയിൽ സ്വർണം നേടിയിട്ടുള്ളത്. പിന്നീട് 1998-ലും 2018-ലും ഫൈനലിൽ എത്തിയെങ്കിലും യഥാക്രമം ദക്ഷിണ കൊറിയയോടും ജപ്പാനോടും പരാജയപ്പെട്ട് വെള്ളിമെഡലിൽ ഒതുങ്ങേണ്ടി വന്നിരുന്നു. ഇത്തവണ സെമിഫൈനലിൽ ദക്ഷിണ കൊറിയയെ എതിരില്ലാത്ത രണ്ട് ഗോളുകൾക്ക് (2-0) തകർത്താണ് ഇന്ത്യൻ പട ഫൈനലിലെത്തിയത്. വനിതാ ഹോക്കിയിലെ ചരിത്രനേട്ടത്തിന് പുറമെ ബോക്സിങ്, ആർച്ചറി, ഗുസ്‌തി എന്നീ ഇനങ്ങളിലായി മറ്റ് നാല് സ്വർണം കൂടി ലഭിച്ചതോടെ നഗോയ ഏഷ്യൻ ഗെയിംസിൽ ഇന്ത്യയുടെ ആകെ സ്വർണ്ണനേട്ടം പതിനാറായി ഉയർന്നു.
