‘ജയിലർ 2’ കാണാൻ തിയേറ്റർ മുഴുവനായി ബുക്ക് ചെയ്ത് സഞ്ജു സാംസൺ; ഒപ്പം ഇന്ത്യൻ താരങ്ങളുമെത്തും

കൊച്ചി: രജനീകാന്തിനെ നായകനാക്കി നെൽസൺ ദിലീപ്‌കുമാർ സംവിധാനം ചെയ്ത ‘ജയിലർ 2’ തിയേറ്ററുകളിൽ ആവേശമായി മാറുമ്പോൾ, ചിത്രം കാണാൻ തിയേറ്റർ ഒന്നടങ്കം ബുക്ക് ചെയ്ത് മലയാളി താരം സഞ്ജു സാംസണും. ആഗോളതലത്തിൽ വൻ സ്വീകാര്യത നേടിയ ചിത്രം കേരളത്തിൽ ആദ്യദിനം തന്നെ നാലായിരത്തോളം ഷോകളാണ് കളിച്ചത്. ഇതിൽ 1600-ഓളം ഷോകളും ഹൗസ്ഫുള്ളായിരുന്നു. കേരളത്തിൽ നിന്ന് ഏറ്റവും ഉയർന്ന ആദ്യദിന കളക്ഷൻ നേടുന്ന അന്യഭാഷാ ചിത്രമെന്ന റെക്കോർഡും ജയിലർ 2 സ്വന്തമാക്കിയിരിക്കുകയാണ്. ഈ ആവേശത്തിനിടയിലാണ് കുടുംബാംഗങ്ങൾക്കും സുഹൃത്തുക്കൾക്കും സഹതാരങ്ങൾക്കുമൊപ്പം സിനിമ ആസ്വദിക്കാൻ സഞ്ജു തിയേറ്ററിലെ മുഴുവൻ സീറ്റുകളും ബുക്ക് ചെയ്തത്.

രജനീകാന്ത് ചിത്രങ്ങളോടുള്ള തന്റെ കടുത്ത ആരാധന സഞ്ജു തുറന്നുപറഞ്ഞു. “രജനി സാറിന്റെ സിനിമകൾ കാണാൻ എനിക്ക് വലിയ ഇഷ്ടമാണ്. അദ്ദേഹത്തിന്റെ പുതിയ ചിത്രങ്ങൾക്കായി ഞാൻ എപ്പോഴും കാത്തിരിക്കാറുണ്ട്. ഇത്തവണ സിനിമ കാണാൻ ഞാൻ ഒരു ദിവസം വൈകി. ഇന്നലെ ഡൽഹിയിൽ ഒരു പരിപാടി ഉണ്ടായിരുന്നതുകൊണ്ടാണ് ആദ്യദിനം തന്നെ സിനിമ കാണാൻ കഴിയാതെ പോയത്. എന്നാൽ ഇന്ന് ഭാഗ്യവശാൽ തിയേറ്റർ മുഴുവനായും ബുക്ക് ചെയ്യാൻ എനിക്ക് കഴിഞ്ഞു. സുഹൃത്തുക്കളെ ക്ഷണിച്ചിട്ടുണ്ട്, എന്റെ ഭാര്യയും ഒപ്പമുണ്ട്. ബിഗ് സ്ക്രീനിൽ രജനി സാറിനെ കാണുന്നതിന്റെ അതിയായ ആവേശത്തിലാണ് ഞാൻ,” സഞ്ജു വ്യക്തമാക്കി. തമിഴ് അറിയാവുന്ന ഇന്ത്യൻ ക്രിക്കറ്റ് ടീമിലെ മറ്റ് ചില അംഗങ്ങളും തനിക്കൊപ്പം സിനിമ കാണാൻ എത്തുന്നുണ്ടെന്നും അദ്ദേഹം കൂട്ടിച്ചേർത്തു.

കേരളത്തിൽ ചിത്രത്തിന് ലഭിക്കുന്ന അഭൂതപൂർവമായ സ്വീകരണത്തിൽ മോഹൻലാലിൻ്റെ സാന്നിധ്യം വലിയ പങ്കുവഹിച്ചിട്ടുണ്ട്. സൂപ്പർസ്റ്റാർ രജനികാന്തും മോഹൻലാലും വീണ്ടും ബിഗ് സ്ക്രീനിൽ ഒന്നിക്കുന്ന രംഗങ്ങൾ കാണാനുള്ള ആകാംക്ഷയാണ് മലയാളികളെ കൂട്ടത്തോടെ തിയേറ്ററുകളിലേക്ക് ആകർഷിക്കുന്നത്. ബ്ലോക്ക്ബസ്റ്റർ വിജയമായ ആദ്യ ഭാഗത്തിന് ശേഷം ‘മുത്തുവേൽ പാണ്ഡ്യനായി’ രജനികാന്ത് മടങ്ങിയെത്തുന്ന ചിത്രത്തിൽ ശിവ രാജ്‌കുമാറിനൊപ്പം ബോളിവുഡ് താരം ഹൃതിക് റോഷനും അതിഥി വേഷത്തിലെത്തുന്നുണ്ട്. സുരാജ് വെഞ്ഞാറമൂട്, എസ്.ജെ. സൂര്യ, വിദ്യാ ബാലൻ, മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ, ജാക്കി ഷെറോഫ്, നമോ നാരായണൻ, കോട്ടയം നസീർ തുടങ്ങിയ വമ്പൻ താരനിര തന്നെ ചിത്രത്തിൽ അണിനിരക്കുന്നുണ്ട്. നെൽസൺ ദിലീപ്‌കുമാറിൻ്റെ മാസ്സ് ആക്ഷൻ അവതരണവും ഡാർക്ക് ഹ്യൂമറും അനിരുദ്ധ് രവിചന്ദറിൻ്റെ തകർപ്പൻ സംഗീതവും പശ്ചാത്തല സംഗീതവും ചിത്രത്തിന് കൂടുതൽ മിഴിവേകുന്നു.