ലോകകപ്പ് ടീമിലേക്കുള്ള വിളി; ‘സന്തോഷം കൊണ്ട് ഉറങ്ങാൻ കഴിഞ്ഞില്ല, പഴയ വീഡിയോകൾ കണ്ട് രാത്രി മുഴുവൻ കരയുകയായിരുന്നു’;നെയ്മർ

സാന്റോസ്: ബ്രസീൽ ദേശീയ ടീമിലേക്കും ലോകകപ്പ് സ്ക്വാഡിലേക്കും തിരിച്ചെത്തിയതിന് പിന്നാലെ തനിക്കുണ്ടായ വൈകാരികമായ നിമിഷങ്ങളെക്കുറിച്ച് തുറന്നുപറഞ്ഞ് സൂപ്പർ താരം നെയ്മർ ജൂനിയർ. ടീമിലേക്ക് വിളി വന്നതിന് ശേഷം സന്തോഷം കൊണ്ട് തനിക്ക് രാത്രി മുഴുവൻ ഉറങ്ങാൻ കഴിഞ്ഞില്ലെന്നും, പഴയ വീഡിയോകൾ കണ്ട് പുലർച്ചെ വരെ കരയുകയായിരുന്നുവെന്നും താരം വെളിപ്പെടുത്തി. നെയ്മർ തന്റെ വൈകാരിക നിമിഷങ്ങളിലൂടെ കടന്നുപോയപ്പോൾ പങ്കാളി ബ്രൂണ ബിയാൻകാർഡി സമീപത്ത് ഉറങ്ങുകയായിരുന്നുവെന്ന വിവരവും റിപ്പോർട്ടുകൾ ചൂണ്ടിക്കാട്ടുന്നു.

“രാവിലെ 6.30 അല്ലെങ്കിൽ 7 മണിയോടെയാണ് ഞാൻ ഉറങ്ങാൻ പോയത്. എന്റെ പഴയ വീഡിയോകൾ എല്ലാം കണ്ടുകൊണ്ട് ഞാൻ രാത്രി മുഴുവൻ കരയുകയായിരുന്നു, എനിക്ക് ആ കണ്ണീർ അടക്കാൻ കഴിഞ്ഞില്ല,” നെയ്മർ പറഞ്ഞു. ജീവിതത്തിലെ ഏറ്റവും സുപ്രധാനമായ ഈ നിമിഷത്തിൽ പങ്കാളി ബ്രൂണ ഒപ്പമുണ്ടായിരുന്നുവെങ്കിലും അവർ ഉറങ്ങിപ്പോയിരുന്നതായി താരം വ്യക്തമാക്കി. ദേശീയ കുപ്പായത്തിലേക്കുള്ള തന്റെ തിരിച്ചുവരവ് താരത്തെ എത്രത്തോളം ആഴത്തിൽ സ്വാധീനിച്ചുവെന്നാണ് ഈ വാക്കുകൾ വ്യക്തമാക്കുന്നത്. നീണ്ട ഇടവേളയ്ക്കും കടുത്ത പ്രതിസന്ധികൾക്കും ശേഷം ബ്രസീൽ സ്ക്വാഡിലേക്ക് മടങ്ങിയെത്തിയതിന്റെ അളവറ്റ സന്തോഷമാണ് നെയ്മറിന്റെ ഈ കണ്ണീരിലൂടെ പ്രതിഫലിക്കുന്നത്.