നീറ്റ് പുനഃപരീക്ഷയ്ക്ക് കനത്ത സുരക്ഷ:ചോദ്യപ്പേപ്പർ തയ്യാറാക്കുന്നവർ പ്രത്യേക കേന്ദ്രത്തിൽ, ഇന്റർനെറ്റും ഫോണുമില്ലാതെ പൂർണ്ണ ‘ലോക്ക്ഡൗണിൽ’

ന്യൂഡൽഹി: മെയ് മാസം നടന്ന നീറ്റ് യു.ജി പരീക്ഷയുടെ ചോദ്യപ്പേപ്പർ ചോർന്നതിനെത്തുടർന്ന് പരീക്ഷ റദ്ദാക്കേണ്ടി വന്ന സാഹചര്യത്തിൽ, വരാനിരിക്കുന്ന പുനഃപരീക്ഷയ്ക്കായി രാജ്യത്തെ പ്രവേശന പരീക്ഷാ ചരിത്രത്തിലെ തന്നെ ഏറ്റവും വലിയ സുരക്ഷാ ക്രമീകരണങ്ങൾ ഒരുക്കി കേന്ദ്ര സർക്കാരും നാഷണൽ ടെസ്റ്റിംഗ് ഏജൻസിയും. പരീക്ഷാ നടത്തിപ്പിൽ വിദ്യാർത്ഥികളുടെയും രക്ഷിതാക്കളുടെയും നഷ്ടപ്പെട്ട വിശ്വാസം വീണ്ടെടുക്കുന്നതിനായി ലോക്ക്ഡൗണിന് സമാനമായ അതീവ കർശന നിയന്ത്രണങ്ങളാണ് അധികൃതർ രാജ്യത്ത് ഏർപ്പെടുത്തിയിരിക്കുന്നത്.

പുനഃപരീക്ഷയുടെ ചോദ്യപ്പേപ്പർ തയ്യാറാക്കൽ, മോഡറേഷൻ, വിവിധ ഭാഷകളിലേക്കുള്ള വിവർത്തനം എന്നിവ ഉൾപ്പെടെയുള്ള സുപ്രധാന കാര്യങ്ങൾ കൈകാര്യം ചെയ്യുന്ന മുഴുവൻ വിദഗ്ധരെയും അതീവ രഹസ്യ സ്വഭാവമുള്ള ഒരു പ്രത്യേക കേന്ദ്രത്തിലേക്ക് മാറ്റിയിരിക്കുകയാണ്. ജൂൺ 21-ന് പരീക്ഷ അവസാനിക്കുന്നത് വരെ ഇവർ പൂർണ്ണമായും പുറംലോകവുമായി യാതൊരു ബന്ധവുമില്ലാതെ ലോക്ക്ഡൗണിലായിരിക്കുമെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. ചോദ്യപ്പേപ്പർ നിർമ്മാണത്തിന്റെ പ്രാഥമിക ഘട്ടം മുതൽ തന്നെ അതിശക്തമായ സുരക്ഷാ വലയമാണ് ഒരുക്കിയിട്ടുള്ളത്. പരീക്ഷാ ചുമതലയുള്ള ഈ വിദഗ്ധർക്ക് മൊബൈൽ ഫോണുകൾ, ലാപ്ടോപ്പുകൾ, സ്മാർട്ട് വാച്ചുകൾ എന്നിവ ഉപയോഗിക്കുന്നതിന് കർശന വിലക്കുണ്ട്. കൂടാതെ, ഇവർ താമസിക്കുന്ന കേന്ദ്രത്തിൽ ഇൻ്റർനെറ്റ് സേവനങ്ങൾ പൂർണ്ണമായും റദ്ദാക്കുകയോ കർശനമായി പരിമിതപ്പെടുത്തുകയോ ചെയ്തിട്ടുണ്ട്. മുൻകൂട്ടി അനുമതി ലഭിച്ച ഉദ്യോഗസ്ഥർക്ക് മാത്രമാണ് ഈ കനത്ത സുരക്ഷാ കേന്ദ്രത്തിലേക്ക് പ്രവേശനമുള്ളത്. അകത്തേക്കും പുറത്തേക്കുമുള്ള ആളുകളുടെ നീക്കങ്ങൾ കൃത്യമായി രേഖപ്പെടുത്തുകയും, കേന്ദ്രത്തിന് ചുറ്റും ഇരുപത്തിനാല് മണിക്കൂറും കർശന നിരീക്ഷണം ഏർപ്പെടുത്തുകയും ചെയ്തിട്ടുണ്ട്.

മെയ് മൂന്നിന് നടന്ന പരീക്ഷയുടെ ചോദ്യപ്പേപ്പർ ചോർന്നത് 22 ലക്ഷത്തിലധികം വിദ്യാർഥികളെയാണ് വലിയ പ്രതിസന്ധിയിലാക്കിയത്. അതിനാൽ ഇത്തവണ ചോദ്യപ്പേപ്പർ ചോരാനുള്ള എല്ലാ പഴുതുകളും അടയ്ക്കുന്നതിന്റെ ഭാഗമായി പരീക്ഷാ സാമഗ്രികൾ രാജ്യത്തുടനീളം സുരക്ഷിതമായി എത്തിക്കാൻ ഇന്ത്യൻ വ്യോമസേനയുടെ സഹായം തേടുന്ന കാര്യവും കേന്ദ്ര സർക്കാരിന്റെ പരിഗണനയിലുണ്ട്. ഇതിനുപുറമെ, രാജ്യത്തെ 551 നഗരങ്ങളിലായി ജൂൺ 21-ന് നടക്കുന്ന പുനഃപരീക്ഷയ്ക്ക് പരീക്ഷാ ക്രമക്കേടുകൾ തടയുന്നതിനായി എല്ലാ കേന്ദ്രങ്ങളിലും ബയോമെട്രിക് പരിശോധനയും ആർട്ടിഫിഷ്യൽ ഇന്റലിജൻസ് (എ.ഐ) അധിഷ്‌ഠിത സി.സി.ടി.വി നിരീക്ഷണവും ഇത്തവണ നിർബന്ധമാക്കിയിട്ടുണ്ട്.