പ്രതിയെ പിടികൂടാൻ ഒപ്പം കൂട്ടിയത് റൗഡി ലിസ്റ്റിലുള്ള ഡിവൈഎഫ്ഐ നേതാവിനെ; എസ്‌ഐയ്ക്ക് സസ്പെൻഷൻ
അടൂർ: പ്രതിയെ പിടികൂടാൻ പോയ പോലീസ് സംഘത്തിനൊപ്പം റൗഡി ലിസ്റ്റിലുള്ള ഡിവൈഎഫ്ഐ നേതാവിനെയും കൂട്ടിയ സംഭവത്തിൽ അടൂർ എസ്.ഐക്ക് സസ്പെൻഷൻ. അടൂർ എസ്.ഐ ജെ.യു. ജിനുവിനെയാണ് തിരുവനന്തപുരം റേഞ്ച് ഡി.ഐ.ജി സസ്പെൻഡ് ചെയ്തത്. ഗുണ്ടാ ബന്ധം ആരോപിച്ചാണ് നടപടി.
അടൂർ എൻജിനീയറിങ് കോളേജിലുണ്ടായ സംഘർഷവുമായി ബന്ധപ്പെട്ട കേസിലെ പ്രതിയെ പിടികൂടാനായി കരുനാഗപ്പള്ളിയിൽ എത്തിയപ്പോഴാണ് സംഭവം. എസ്.ഐ ജിനുവിനൊപ്പം വധശ്രമക്കേസ് പ്രതി കൂടിയായ ഡിവൈഎഫ്ഐ നേതാവ് ശരത്തും ഉണ്ടായിരുന്നു. മഫ്തിയിൽ പ്രതിയെ പിടികൂടാൻ എത്തിയ പോലീസ് സംഘത്തെ നാട്ടുകാർ തടയുകയും ആക്രമിക്കുകയും ചെയ്തിരുന്നു. ഇതിനിടെയാണ് കൂടെയുള്ളത് ഗുണ്ടയാണെന്ന വിവരം പുറത്തുവന്നത്. സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയും ചെയ്തിരുന്നു.
പോലീസ് സേനയ്ക്ക് തന്നെ വലിയ നാണക്കേടുണ്ടാക്കിയ ഈ സംഭവത്തിൽ കർശന നടപടി സ്വീകരിക്കാൻ ആഭ്യന്തര മന്ത്രി രമേശ് ചെന്നിത്തല നേരത്തെ തന്നെ നിർദ്ദേശം നൽകിയിരുന്നു എന്നാണ് സൂചനകൾ. ശക്തമായ വകുപ്പുതല അന്വേഷണവും ഇതിന് പിന്നാലെ ഉണ്ടായേക്കും.
എസ്.ഐ ജിനു സസ്പെൻഷൻ നടപടി നേരിടുന്നത് ഇത് ആദ്യമല്ല. നേരത്തെ പത്തനംതിട്ടയിൽ വെച്ച് ഒരു വിവാഹസംഘത്തെ അകാരണമായി മർദ്ദിച്ച സംഭവത്തിലും ഇദ്ദേഹത്തെ സസ്പെൻഡ് ചെയ്തിരുന്നു.
