തെരുവുകാളയെ തട്ടി നിയന്ത്രണം വിട്ട് ഡിവൈഡറിലിടിച്ചു; റേഞ്ച് റോവർ തവിടുപൊടി; രണ്ട് യുവാക്കൾക്ക് തത്ക്ഷണം ദാരുണാന്ത്യം

അഹമ്മദാബാദ്: ഗുജറാത്തിലെ ഭാരത്മാല ഹൈവേയിൽ അതിവേഗത്തിൽ സഞ്ചരിക്കുകയായിരുന്ന ആഡംബര കാറായ റേഞ്ച് റോവർ ഡിസ്കവറി തെരുവുകാളയെ ഇടിച്ച് നിയന്ത്രണം വിട്ട് ഡിവൈഡറിലിടിച്ച് തകർന്നു. അപകടത്തിൽ കാറിലുണ്ടായിരുന്ന മൂന്ന് പേരിൽ രണ്ട് പേർ സംഭവസ്ഥലത്തുവെച്ചുതന്നെ മരിച്ചു. ഒരാൾക്ക് ഗുരുതരമായി പരിക്കേറ്റു.

ഞായറാഴ്ച പുലർച്ചെ താരാദ്-ദീസ ഹൈവേയിലെ മൽപൂരിന് സമീപമാണ് ദാരുണമായ സംഭവം നടന്നത്. രാജ്കോട്ടിൽ നിന്നും രാജസ്ഥാനിലേക്ക് പോവുകയായിരുന്ന വാഹനമാണ് അപകടത്തിൽപ്പെട്ടത്. അമ്രേലി സ്വദേശിയായ ദിവ്യജീത് ധൻധൽ (28), രാജ്കോട്ട് സ്വദേശി യുവരാജ് സിൻഹ് റാത്തോഡ് (27) എന്നിവരാണ് മരിച്ചത്. ഗുരുതരമായി പരിക്കേറ്റ ഇവരുടെ സുഹൃത്ത് ഹർദീപ് സിങ് ജഡേജയെ വിദഗ്ധ ചികിത്സയ്ക്കായി എയർ ആംബുലൻസ് വഴി അഹമ്മദാബാദിലെ ആശുപത്രിയിലേക്ക് മാറ്റിയിരിക്കുകയാണ്.

ഹൈവേയിലൂടെ സഞ്ചരിക്കുകയായിരുന്ന വാഹനത്തിന് മുന്നിലേക്ക് ഇരുട്ടിൽ പെട്ടെന്ന് ഒരു തെരുവുകാള കയറിവന്നതാണ് അപകടത്തിന് കാരണമായത്. കാളയെ ഇടിക്കാതിരിക്കാൻ ഡ്രൈവർ വാഹനം വെട്ടിച്ചെങ്കിലും കാളയെ ഇടിച്ച ശേഷം നിയന്ത്രണം നഷ്ടപ്പെട്ട വാഹനം അതിശക്തമായി ഡിവൈഡറിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ കോടികൾ വിലമതിക്കുന്ന റേഞ്ച് റോവർ കാർ പൂർണ്ണമായും തകർന്ന് തരിപ്പണമായി.

വാഹനത്തിന്റെ ഭാഗങ്ങൾ റോഡിലാകെ ചിതറിത്തെറിച്ച നിലയിലായിരുന്നു. അപകടം നടന്നയുടൻ തന്നെ പ്രദേശവാസികൾ ഓടിക്കൂടി 108 ആംബുലൻസ് വിളിച്ചുവരുത്തി രക്ഷാപ്രവർത്തനം നടത്തിയെങ്കിലും രണ്ട് പേരുടെ ജീവൻ രക്ഷിക്കാനായില്ല. അപകടത്തിൽപ്പെട്ട വാഹനം രാജ്കോട്ട് രജിസ്ട്രേഷനിലുള്ളതാണ്. ദേശീയപാതകളിൽ അലഞ്ഞുതിരിയുന്ന കന്നുകാലികൾ സൃഷ്ടിക്കുന്ന ഭീഷണി എത്രത്തോളം വലുതാണെന്ന് ഓർമ്മിപ്പിക്കുന്നതാണ് ഈ ദാരുണ സംഭവം. പോലീസ് സ്ഥലത്തെത്തി മേൽനടപടികൾ സ്വീകരിക്കുകയും അപകടത്തെക്കുറിച്ച് വിശദമായ അന്വേഷണം ആരംഭിക്കുകയും ചെയ്തു.