‘വിഴിഞ്ഞത്തെ കടൽക്കൊള്ളയെന്ന് വിളിച്ച പിണറായി തുറമുഖം യാഥാർഥ്യമായപ്പോൾ പറഞ്ഞതെല്ലാം വിഴുങ്ങി’; പ്രതിപക്ഷത്തിനെതിരെ ആഞ്ഞടിച്ച് മുഖ്യമന്ത്രി വി.ഡി. സതീശൻ

തിരുവനന്തപുരം: മിഷൻ സമുദ്ര കേരളത്തിന്റെ ഭാവി വികസനത്തിനായുള്ള സ്വപ്നപദ്ധതിയാണെന്നും ഇതിനെതിരെയുള്ള പ്രതിപക്ഷത്തിന്റെ ബഹിഷ്കരണം ഒട്ടും അത്ഭുതപ്പെടുത്തുന്നില്ലെന്നും മുഖ്യമന്ത്രി വി.ഡി. സതീശൻ. നിയമസഭയിൽ മാരിടൈം ബോർഡ് ഭേദഗതി ബിൽ പാസാക്കുന്നതിനിടെ പ്രതിപക്ഷത്തിനെതിരെ രൂക്ഷവിമർശനമാണ് മുഖ്യമന്ത്രി ഉന്നയിച്ചത്. വിഴിഞ്ഞം തുറമുഖ പദ്ധതിയെ കടൽക്കൊള്ളയെന്ന് വിളിച്ച പിണറായി വിജയൻ, പിന്നീട് തുറമുഖം യാഥാർഥ്യമായപ്പോൾ പറഞ്ഞതെല്ലാം വിഴുങ്ങിയെന്നും മുഖ്യമന്ത്രി പരിഹസിച്ചു.

ഭരണത്തിലായിരുന്നപ്പോൾ മത്സ്യത്തൊഴിലാളികളുടെ മണ്ണെണ്ണ സബ്സിഡി പോലും വർദ്ധിപ്പിക്കാൻ തയ്യാറാകാതിരുന്നവരാണ് ഇപ്പോൾ വിരോധാഭാസം കാണിക്കുന്നത്. മിഷൻ സമുദ്ര വഴിയുള്ള തുറമുഖങ്ങളുടെ വികസനം മത്സ്യത്തൊഴിലാളി കുടുംബങ്ങളുടെ ജീവിതത്തിൽ വലിയ മാറ്റങ്ങളുണ്ടാക്കും. അവരുടെ മക്കൾ ഈ വികസിക്കുന്ന തുറമുഖ നഗരത്തിന്റെ ഭാഗമായി മാറും. ഏഷ്യൻ ഡെവലപ്മെന്റ് ബാങ്കിനെതിരെ (ADB) കരിയോയിലൊഴിച്ച് പ്രതിഷേധിച്ച ശേഷം പിന്നീട് അവരുടെ പിന്നാലെ പോയവരാണ് ഇപ്പോൾ കോർപ്പറേറ്റ് വൽക്കരണമെന്ന് ആരോപിച്ച് എല്ലാ മാറ്റങ്ങൾക്കും വഴിമുടക്കി നിൽക്കുന്നതെന്നും അദ്ദേഹം കുറ്റപ്പെടുത്തി.

മിഷൻ സമുദ്ര പദ്ധതിയിലൂടെ സർക്കാരിന് ജനങ്ങൾക്കിടയിൽ കൂടുതൽ സ്വീകാര്യത ലഭിക്കുമോ എന്ന ഭയമാണ് പ്രതിപക്ഷത്തിന്റെ ഈ പുതിയ എതിർപ്പിന് അടിസ്ഥാനം. ഇനിയേതെങ്കിലും കാലത്ത് മറ്റൊരു സർക്കാരിന് സംസ്ഥാനത്തെ തുറമുഖങ്ങളെ ഇത്തരത്തിൽ നവീകരിക്കാൻ സാധിക്കുമോയെന്നും മുഖ്യമന്ത്രി നിയമസഭയിൽ ചോദിച്ചു. ഇതിനിടെ, പ്രതിപക്ഷ ബഹിഷ്കരണത്തിനിടയിലും സുപ്രധാനമായ കേരള മാരിടൈം ബോർഡ് ഭേദഗതി ബിൽ നിയമസഭ പാസാക്കി.