അന്റാർട്ടിക്കയിലെ മഞ്ഞുപാളികൾക്കിടയിൽ സ്വിറ്റ്സർലൻഡിന്റെ വലിപ്പത്തിൽ ഒരു ദ്വാരം! പതിറ്റാണ്ടുകൾ നീണ്ട നിഗൂഢതയ്ക്ക് ഉത്തരം
അന്റാർട്ടിക്കയിലെ കട്ടികൂടിയ മഞ്ഞുപാളികൾക്കിടയിൽ രൂപപ്പെട്ട കൂറ്റൻ ദ്വാരത്തിന് പിന്നിലെ രഹസ്യം ഒടുവിൽ ചുരുളഴിയുന്നു. 2016-ലും 2017-ലും വെഡൽ കടലിൽ (Weddell Sea) പ്രത്യക്ഷപ്പെട്ട, സ്വിറ്റ്സർലൻഡിന്റെ അത്രയും വലിപ്പമുള്ള ഈ ഭീമൻ വിള്ളൽ ശാസ്ത്രലോകത്തെ ഏറെ കുഴക്കിയിരുന്നു. ‘മൗഡ് റൈസ് പോളിന്യ’ (Maud Rise Polynya) എന്നറിയപ്പെടുന്ന ഈ പ്രതിഭാസത്തിന് പിന്നിലെ കാരണം കണ്ടെത്തിയിരിക്കുകയാണ് ഗോഥെൻബർഗ് സർവകലാശാലയിലെ ഗവേഷകനായ ആദിത്യ നാരായണന്റെ നേതൃത്വത്തിലുള്ള സംഘം.
എന്താണ് സംഭവിച്ചത്? സാധാരണയായി കിലോമീറ്ററുകളോളം കട്ടിയിൽ മഞ്ഞുപാളികൾ കാണപ്പെടുന്ന സ്ഥലത്താണ് 2016-ൽ ഏകദേശം 80,000 ചതുരശ്ര കിലോമീറ്റർ വിസ്തൃതിയിൽ വലിയൊരു ദ്വാരം രൂപപ്പെട്ടത്. 1970-കൾക്ക് ശേഷം ഇത്രയും വലിയൊരു പ്രതിഭാസം ഇവിടെ റിപ്പോർട്ട് ചെയ്യുന്നത് ആദ്യമായാണ്. സയൻസ് അഡ്വാൻസസ് മാസികയിലാണ് ഇതുസംബന്ധിച്ച പഠനം പ്രസിദ്ധീകരിച്ചത്.
വില്ലനായത് ‘മറഞ്ഞിരിക്കുന്ന എഞ്ചിൻ’ കാറ്റ്, സമുദ്ര പ്രവാഹങ്ങൾ, ഉപ്പിന്റെ അംശം എന്നിവ ചേർന്നുള്ള സങ്കീർണ്ണമായ ഒരു പ്രക്രിയയാണ് മഞ്ഞുരുക്കത്തിന് കാരണമായതെന്ന് പഠനം വ്യക്തമാക്കുന്നു.
എക്മാൻ ട്രാൻസ്പോർട്ട്: ‘എക്മാൻ ട്രാൻസ്പോർട്ട്’ (Ekman transport) എന്ന പ്രതിഭാസത്തിലൂടെ ശക്തമായ കാറ്റ് സമുദ്രജലത്തിന്റെ ഗതി മാറ്റി.
ഉപ്പുവെള്ളത്തിന്റെ ഒഴുക്ക്: ഇത് സമുദ്രത്തിന്റെ അടിത്തട്ടിലുള്ള, ഉപ്പുരസമേറിയതും ചൂടുള്ളതുമായ വെള്ളത്തെ മുകളിലേക്ക് എത്തിച്ചു.
മഞ്ഞുരുക്കം: ഈ ചൂടുവെള്ളം മഞ്ഞുപാളികളെ അടിയിൽ നിന്ന് ഉരുക്കിയതോടെയാണ് ഉപരിതലത്തിൽ ഭീമൻ ദ്വാരം രൂപപ്പെട്ടത്.
ആഗോള ഭീഷണി ഇത് വെറുമൊരു പ്രാദേശിക മാറ്റമല്ലെന്നും ആഗോള കാലാവസ്ഥയെ തന്നെ ബാധിക്കുന്ന ഒന്നാണെന്നും ഗവേഷകർ മുന്നറിയിപ്പ് നൽകുന്നു. സമുദ്രത്തിന്റെ ആഴങ്ങളിൽ കിടക്കുന്ന കാർബൺ ഡൈ ഓക്സൈഡും താപവും അന്തരീക്ഷത്തിലേക്ക് വന്തോതിൽ പുറന്തള്ളാൻ ഇത്തരം വിള്ളലുകൾ കാരണമാകും. കാലാവസ്ഥാ വ്യതിയാനം മൂലം ഭാവിയിൽ ഇത്തരം കൂറ്റൻ ദ്വാരങ്ങൾ അടിക്കടി രൂപപ്പെടാനുള്ള സാധ്യതയുണ്ടെന്നും ഇത് സമുദ്രനിരപ്പ് ഉയരുന്നതിലേക്ക് നയിച്ചേക്കാമെന്നും പഠനം ചൂണ്ടിക്കാട്ടുന്നു.
