വാട്സ്ആപ്പിൽ കെണിയൊരുക്കി ‘ഗോസ്റ്റ് പെയറിംഗ്’; ഈ സൈബര് തട്ടിപ്പ് സൂക്ഷിക്കുക!
ന്യൂഡൽഹി: വാട്സ്ആപ്പിന്റെ ‘ലിങ്ക്ഡ് ഡിവൈസസ്’ (Linked Devices) ഫീച്ചറിലെ പഴുതുകൾ മുതലെടുത്ത് പുതിയ സൈബർ തട്ടിപ്പ് രീതി വ്യാപകമാകുന്നു. ‘ഗോസ്റ്റ് പെയറിംഗ്’ എന്നറിയപ്പെടുന്ന ഈ തട്ടിപ്പിലൂടെ ഉപയോക്താവ് അറിയാതെ തന്നെ അവരുടെ വാട്സ്ആപ്പ് അക്കൗണ്ട് ഹാക്കറുടെ ഉപകരണവുമായി ബന്ധിപ്പിക്കപ്പെടുന്നു.
തട്ടിപ്പ് രീതി ഇങ്ങനെ
നമ്മുടെ കോൺടാക്റ്റ് ലിസ്റ്റിലുള്ള സുഹൃത്തുക്കളുടെയോ ബന്ധുക്കളുടെയോ നമ്പറുകളിൽ നിന്നാകും പലപ്പോഴും സന്ദേശം വരുന്നത് എന്നതാണ് ഇതിനെ കൂടുതൽ അപകടകാരിയാക്കുന്നത്.
വ്യാജ സന്ദേശം: “നിങ്ങളുടെ ഒരു ഫോട്ടോ കണ്ടു”, “ഇതൊന്നു നോക്കൂ” തുടങ്ങിയ ആകർഷകമായ സന്ദേശങ്ങൾക്കൊപ്പം ഒരു വെബ് ലിങ്കും ലഭിക്കുന്നു.
കെണി: ഈ ലിങ്കിൽ ക്ലിക്ക് ചെയ്യുമ്പോൾ ഫേസ്ബുക്കിനോട് സാമ്യമുള്ള ഒരു വ്യാജ പേജ് തുറന്നുവരും. ഫോട്ടോ കാണുന്നതിനായി ഫോൺ നമ്പർ നൽകാനും തുടർന്ന് വാട്സ്ആപ്പിൽ ലഭിക്കുന്ന ഒരു കോഡ് രേഖപ്പെടുത്താനും ആവശ്യപ്പെടും.
ഹാക്കിംഗ്: യഥാർത്ഥത്തിൽ, നിങ്ങൾ നൽകുന്ന കോഡ് വാട്സ്ആപ്പ് വെബ് വഴി അക്കൗണ്ട് മറ്റൊരു ഉപകരണവുമായി ബന്ധിപ്പിക്കാനുള്ളതാണ്. കോഡ് നൽകുന്ന നിമിഷം തന്നെ ഹാക്കറുടെ കമ്പ്യൂട്ടറിലോ ഫോണിലോ നിങ്ങളുടെ വാട്സ്ആപ്പ് ലോഗിൻ ചെയ്യപ്പെടുന്നു.
ഇതോടെ സന്ദേശങ്ങൾ വായിക്കാനും, അയയ്ക്കാനും, മീഡിയ ഫയലുകൾ ഡൗൺലോഡ് ചെയ്യാനും ഹാക്കർക്ക് സാധിക്കും. അക്കൗണ്ട് ഹാക്ക് ചെയ്യപ്പെട്ട വിവരം പലപ്പോഴും യഥാർത്ഥ ഉടമ അറിയാറില്ല.
സുരക്ഷയ്ക്കായി ശ്രദ്ധിക്കേണ്ട കാര്യങ്ങൾ
സാങ്കേതിക വിദ്യയേക്കാളുപരി ഉപയോക്താക്കളുടെ അശ്രദ്ധയാണ് ഹാക്കർമാർ മുതലെടുക്കുന്നത്. താഴെ പറയുന്ന മുൻകരുതലുകൾ സ്വീകരിക്കണമെന്ന് സൈബർ വിദഗ്ധർ നിർദ്ദേശിക്കുന്നു:
ലിങ്ക്ഡ് ഡിവൈസുകൾ പരിശോധിക്കുക: വാട്സ്ആപ്പിലെ Settings > Linked Devices എന്ന ഓപ്ഷൻ ഇടയ്ക്കിടെ പരിശോധിക്കുക. ഇവിടെ നിങ്ങൾക്ക് പരിചിതമല്ലാത്ത ബ്രൗസറുകളോ ഉപകരണങ്ങളോ കണ്ടാൽ ഉടൻ ‘Log Out’ ചെയ്യുക.
ലിങ്കുകളിൽ ജാഗ്രത: അപരിചിതമായ ലിങ്കുകളിൽ ക്ലിക്ക് ചെയ്ത് വാട്സ്ആപ്പ് പെയർ (Pair) ചെയ്യാൻ ശ്രമിക്കരുത്.
ടു-സ്റ്റെപ്പ് വെരിഫിക്കേഷൻ: വാട്സ്ആപ്പിൽ Two-Step Verification നിർബന്ധമായും ഓൺ ചെയ്യുക. ഇത് അക്കൗണ്ടിന് അധിക സുരക്ഷ നൽകും.
ഉറപ്പുവരുത്തുക: സുഹൃത്തുക്കളുടെ നമ്പറിൽ നിന്നാണ് വരുന്നതെങ്കിൽ പോലും, സംശയാസ്പദമായ ലിങ്കുകൾ കണ്ടാൽ അവരെ വിളിച്ച് സത്യാവസ്ഥ ഉറപ്പുവരുത്തുക.
യൂറോപ്യൻ രാജ്യങ്ങളിൽ വ്യാപകമായി റിപ്പോർട്ട് ചെയ്യപ്പെട്ട ഈ തട്ടിപ്പ് രീതി കേരളത്തിലും ഏത് നിമിഷവും പടരാൻ സാധ്യതയുള്ളതിനാൽ ഉപയോക്താക്കൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകുന്നു.
