മദീനയുടെ ആകാശത്ത് മുഴങ്ങിയ മധുരനാദം നിലച്ചു; മസ്ജിദുന്നബവിയിലെ മുഅദ്ദിന് ശൈഖ് ഫൈസല് നുഅ്മാന് അന്തരിച്ചു
മദീന: ഇസ്ലാംമത വിശ്വാസികളുടെ പുണ്യഗേഹങ്ങളിലൊന്നായ മദീനയിലെ മസ്ജിദുന്നബവിയിലെ (പ്രവാചക പള്ളി) പ്രമുഖ മുഅദ്ദിന് ശൈഖ് ഫൈസല് നുഅ്മാന് അന്തരിച്ചു. മദീനയില് വെച്ചായിരുന്നു അന്ത്യം. ശാരീരിക അസ്വസ്ഥതകളെ തുടര്ന്ന് ചികിത്സയിലായിരുന്നുവെന്നാണ് റിപ്പോര്ട്ടുകള്.
കാല്നൂറ്റാണ്ടു കാലത്തോളം പ്രവാചക പള്ളിയില് ബാങ്ക് വിളിക്കുന്നതിനുള്ള (അദാന്) സൗഭാഗ്യം ലഭിച്ച വ്യക്തിയായിരുന്നു ശൈഖ് ഫൈസല് നുഅ്മാന്. മദീനയിലെത്തുന്ന തീര്ത്ഥാടകര്ക്ക് ഏറെ സുപരിചിതവും ഹൃദ്യവുമായ ശബ്ദത്തിന് ഉടമയായിരുന്നു അദ്ദേഹം. അദ്ദേഹത്തിന്റെ വിയോഗവാര്ത്ത മദീനയിലെ വിശ്വാസി സമൂഹത്തെയും പ്രവാസികളെയും ഒരുപോലെ ദുഃഖത്തിലാഴ്ത്തി.
മസ്ജിദുന്നബവിയില് നടന്ന മയ്യിത്ത് നമസ്കാരത്തില് ആയിരക്കണക്കിന് വിശ്വാസികള് പങ്കെടുത്തു. തുടര്ന്ന് പ്രവാചക പള്ളിയോട് ചേര്ന്നുള്ള ചരിത്രപ്രസിദ്ധമായ ‘ജന്നത്തുല് ബഖീഅ്’ ഖബറിസ്ഥാനില് ഖബറടക്കി.
ശൈഖ് ഫൈസലിന്റെ വിയോഗത്തില് ഹറം കാര്യാലയവും സഹപ്രവര്ത്തകരും അനുശോചനം രേഖപ്പെടുത്തി. മദീനയുടെ മിനാരങ്ങളില് നിന്ന് മുഴങ്ങിക്കേട്ടിരുന്ന ആ ശബ്ദം നിലച്ചതിന്റെ വേദന സമൂഹമാധ്യമങ്ങളിലും വിശ്വാസികള് പങ്കുവെക്കുന്നുണ്ട്. സൗദി അറേബ്യയിലെ പ്രമുഖ പണ്ഡിതന്മാരും അദ്ദേഹത്തിന് വേണ്ടി പ്രാര്ത്ഥനകള് നടത്തി.
