ഗ്യാസും ദഹനക്കേടും അലട്ടുന്നുണ്ടോ? പരിഹാരം അടുക്കളയിൽ തന്നെയുണ്ട്; പരീക്ഷിച്ചുനോക്കൂ, ഈ 5 ‘നാടൻ പരിഹാരങ്ങൾ’

തിരക്കിട്ട ജീവിതശൈലിയും ഭക്ഷണരീതിയിലെ അശ്രദ്ധയും കാരണം ദഹനക്കേടും (Indigestion) ഗ്യാസ് ട്രബിളും ഇന്ന് ഒട്ടുമിക്ക ആളുകളെയും അലട്ടുന്ന പ്രശ്നമാണ്. അമിതമായി ഭക്ഷണം കഴിക്കുന്നതും, വേഗത്തിൽ കഴിക്കുന്നതും, കൊഴുപ്പ് കൂടിയ ആഹാരങ്ങളുമെല്ലാം വയറ്റിലെ അസ്വസ്ഥതകൾക്ക് കാരണമാകുന്നു. എന്നാൽ മരുന്നുകളെ ആശ്രയിക്കുന്നതിന് മുൻപ് നമ്മുടെ അടുക്കളയിലുള്ള ചില പ്രകൃതിദത്ത ചേരുവകൾ കൊണ്ട് ഈ പ്രശ്നത്തെ എളുപ്പത്തിൽ നേരിടാൻ കഴിയും.

പ്രധാനപ്പെട്ട 5 നാടൻ പരിഹാരങ്ങൾ

ഇഞ്ചി: ദഹനരസങ്ങളുടെ പ്രവർത്തനം മെച്ചപ്പെടുത്താൻ ഇഞ്ചി മികച്ചതാണ്. ഇഞ്ചി ചതച്ചിട്ട വെള്ളം തിളപ്പിച്ച് അതിൽ അല്പം നാരങ്ങാനീരും തേനും ചേർത്ത് കുടിക്കുന്നത് ഉത്തമമാണ്.

അയമോദകം: ഇതിലടങ്ങിയിരിക്കുന്ന ‘തൈമോൾ’ (Thymol) ദഹനം സുഗമമാക്കാൻ സഹായിക്കുന്നു.

കായം: ഗ്യാസ് ട്രബിളിന് ആയുർവേദം നിർദ്ദേശിക്കുന്ന പ്രധാന മരുന്നാണിത്. ചൂടുവെള്ളത്തിൽ ഒരു നുള്ള് കായം ചേർത്ത് കുടിക്കുന്നത് പെട്ടെന്ന് ആശ്വാസം നൽകും.

പെരുംജീരകം: ഭക്ഷണത്തിന് ശേഷം അല്പം പെരുംജീരകം ചവയ്ക്കുന്നത് ഗ്യാസ് കുറയ്ക്കാനും ദഹനപ്രക്രിയ വേഗത്തിലാക്കാനും സഹായിക്കും.

പുതിന ചായ: അന്നനാളത്തിലെ പേശികൾക്ക് അയവ് വരുത്തി ഗ്യാസ് പുറന്തള്ളാൻ പുതിനയില ഇട്ട് തിളപ്പിച്ച ചായ സഹായിക്കും.

കൂടാതെ മല്ലിയിട്ട് തിളപ്പിച്ച വെള്ളം, കറ്റാർവാഴ ജ്യൂസ്, ആപ്പിൾ സിഡെർ വിനെഗർ എന്നിവയും ദഹനപ്രശ്നങ്ങൾക്കുള്ള മികച്ച പ്രതിവിധികളാണ്.

ശീലങ്ങൾ മാറ്റാം, ഗ്യാസ് ഒഴിവാക്കാം

മരുന്നിനേക്കാൾ പ്രധാനം ഭക്ഷണരീതിയിലെ മാറ്റമാണ്. ഗ്യാസ് ഒഴിവാക്കാൻ താഴെ പറയുന്ന കാര്യങ്ങൾ ശ്രദ്ധിക്കുക:

ഭക്ഷണം സാവധാനം ചവച്ചരച്ച് കഴിക്കുക.

സ്ട്രോ ഉപയോഗിച്ച് പാനീയങ്ങൾ കുടിക്കുന്നതും, ച്യൂയിംഗം ചവയ്ക്കുന്നതും ഒഴിവാക്കുക (ഇത് കൂടുതൽ വായു വയറ്റിലെത്താൻ കാരണമാകും).

സോഡയും മറ്റ് കാർബണേറ്റഡ് പാനീയങ്ങളും ഒഴിവാക്കുക.

ഭക്ഷണശേഷം അല്പനേരം നടക്കുന്നത് ദഹനത്തിന് സഹായിക്കും.

എല്ലാം അത്ര നിസ്സാരമല്ല; ജാഗ്രത വേണം

സാധാരണ ദഹനക്കേടിനൊപ്പം അമിതമായ വിയർപ്പ്, ശ്വാസംമുട്ടൽ, താടിയെല്ലിലോ കൈകളിലോ വേദന എന്നിവ അനുഭവപ്പെടുന്നുണ്ടെങ്കിൽ അത് നിസാരമായി കാണരുത്. ഇത് ഹൃദയാഘാതത്തിന്റെ ലക്ഷണമാകാൻ സാധ്യതയുള്ളതിനാൽ ഉടൻ തന്നെ വൈദ്യസഹായം തേടണമെന്ന് വിദഗ്ധർ മുന്നറിയിപ്പ് നൽകുന്നു.