ഇതിഹാസം മടങ്ങിയെത്തുന്നു; ദെഷാംപ്സിന് പകരക്കാരനായി ഫ്രാൻസിനെ നയിക്കാൻ സിദാൻ വരുന്നു
പാരിസ്: ഫ്രഞ്ച് ഫുട്ബോൾ ലോകം ഏറെ നാളായി കാത്തിരുന്ന ആ പ്രഖ്യാപനം അരികിലെത്തിയിരിക്കുകയാണ്. ഫ്രാൻസ് ദേശീയ ഫുട്ബോൾ ടീമിന്റെ പരിശീലകനായി ഇതിഹാസ താരം സിനദിൻ സിദാൻ ചുമതലയേൽക്കുമെന്ന് റിപ്പോർട്ടുകൾ. 2026-ൽ അമേരിക്ക, കാനഡ, മെക്സിക്കോ എന്നിവിടങ്ങളിലായി നടക്കുന്ന ഫിഫ ലോകകപ്പിന് ശേഷം നിലവിലെ പരിശീലകൻ ദിദിയർ ദെഷാംപ്സ് സ്ഥാനം ഒഴിയുമെന്നും പകരം സിദാൻ ആ ചുമതല ഏറ്റെടുക്കുമെന്നും ഫ്രഞ്ച് ഫുട്ബോൾ ഫെഡറേഷനുമായി സിദാൻ വാക്കാൽ ധാരണയിലെത്തിയതായും പ്രമുഖ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. 2012 മുതൽ 14 വർഷമായി ഫ്രഞ്ച് ടീമിനെ നയിക്കുന്ന ഡെസ്ചാംപ്സ്, 2018-ൽ ടീമിനെ ലോകകിരീടത്തിലേക്ക് നയിച്ചിരുന്നു. എന്നാൽ തന്റെ കരാർ അവസാനിക്കുന്ന 2026 ലോകകപ്പോടെ പരിശീലക സ്ഥാനത്ത് നിന്ന് മാറാൻ അദ്ദേഹം തീരുമാനിച്ചതായാണ് സൂചന. ദെഷാംപ്സിന്റെ പിൻഗാമിയായി ആര് വരണമെന്ന ചോദ്യത്തിന് ഫ്രഞ്ച് ഫുട്ബോൾ ഫെഡറേഷന് ഒരൊറ്റ പേരേ ഉണ്ടായിരുന്നുള്ളൂ, അത് സിദാൻ തന്നെയാണ്.
ഫ്രഞ്ച് ഫുട്ബോൾ ഫെഡറേഷൻ പ്രസിഡന്റ് ഫിലിപ്പ് ഡിയല്ലോ, ദെഷാംപ്സിന് ശേഷം വരുന്നത് ആരാണെന്ന് തനിക്ക് അറിയാമെന്ന് അടുത്തിടെ ഒരു അഭിമുഖത്തിൽ സൂചിപ്പിച്ചിരുന്നു. പേര് വെളിപ്പെടുത്തിയില്ലെങ്കിലും അത് സിദാൻ തന്നെയാണെന്ന് ഫ്രഞ്ച് മാധ്യമങ്ങൾ ഉറപ്പിച്ചു പറയുന്നു. 2021-ൽ റയൽ മാഡ്രിഡിന്റെ പരിശീലക സ്ഥാനം ഒഴിഞ്ഞ ശേഷം മറ്റ് ക്ലബ്ബുകളുടെ വാഗ്ദാനങ്ങൾ നിരസിച്ച സിദാൻ, ഫ്രഞ്ച് ദേശീയ ടീമിനെ നയിക്കാനുള്ള അവസരത്തിനായി കാത്തിരിക്കുകയായിരുന്നു. റയൽ മാഡ്രിഡിന് തുടർച്ചയായി മൂന്ന് ചാമ്പ്യൻസ് ലീഗ് കിരീടങ്ങൾ നേടിക്കൊടുത്ത പരിശീലകൻ എന്ന നിലയിൽ സിദാന്റെ വരവ് ഫ്രഞ്ച് ടീമിന് പുതിയ ഊർജ്ജം നൽകുമെന്നാണ് ആരാധകരുടെ പ്രതീക്ഷ. 1998-ൽ ഫ്രാൻസിനെ ലോകകപ്പ് ജേതാക്കളാക്കുന്നതിൽ നിർണ്ണായക പങ്കുവഹിച്ച താരം എന്ന നിലയിൽ സിദാനോട് ഫ്രഞ്ച് ജനതയ്ക്കുള്ള ബഹുമാനവും ഈ തീരുമാനത്തിന് പിന്നിലുണ്ട്. 2026 ലോകകപ്പ് പൂർത്തിയാകുന്നതോടെ ഔദ്യോഗിക പ്രഖ്യാപനം ഉണ്ടാകുമെന്നും സിദാൻ യുഗം ഫ്രഞ്ച് ഫുട്ബോളിൽ ആരംഭിക്കുമെന്നുമാണ് പുറത്തുവരുന്ന വാർത്തകൾ വ്യക്തമാക്കുന്നത്.
