മുറിയില് ഉറങ്ങുകയായിരുന്ന അനുജനെ വിളിച്ചുണർത്തി കഴുത്തിൽ വെട്ടി; മലപ്പുറം പൂക്കോട്ടൂരില് സഹോദരനെ കൊന്ന പ്രതി പോലീസ് കസ്റ്റഡിയില്
പൂക്കോട്ടൂര്: മലപ്പുറം പൂക്കോട്ടൂരില് ജ്യേഷ്ഠന് അനുജനെ കുത്തിക്കൊലപ്പെടുത്തി. പൂക്കോട്ടൂര് പള്ളിമുക്ക് സ്വദേശി അമീര് ഹുസൈന് (26) ആണ് മരിച്ചത്. ഇന്ന് പുലര്ച്ചെ അഞ്ച് മണിയോടെ മുറിയില് ഉറങ്ങുകയായിരുന്ന അനുജനെ വിളിച്ചുണര്ത്തി കഴുത്തില് വെട്ടുകയായിരിന്നു. വീട്ടിലെ കത്തി ഉപയോഗിച്ചാണ് കൊലപാതകം നടത്തിയത്. സംഭവവുമായി ബന്ധപ്പെട്ട് സഹോദരന് ജുനൈദിനെ (28) മഞ്ചേരി പോലീസ് കസ്റ്റഡിയിലെടുത്തു. കുത്തിക്കൊന്ന ശേഷം ഇയാള് തന്നെ ബൈക്കില് പോലീസ് സ്റ്റേഷനിലെത്തി വിവരം അറിയിച്ച് കീഴടങ്ങുകയായിരുന്നു.
വീട്ടിലെ സാമ്പത്തിക പ്രശ്നങ്ങളും കടബാധ്യതകളും സംബന്ധിച്ച് സഹോദരങ്ങള് തമ്മിലുണ്ടായ വാക്കുതര്ക്കമാണ് കൊലപാതകത്തില് കലാശിച്ചതെന്നാണ് പ്രാഥമിക നിഗമനം. കടം തീര്ക്കുന്നതുമായി ബന്ധപ്പെട്ട ചര്ച്ചയ്ക്കിടെയാണ് തര്ക്കം മൂര്ച്ഛിച്ചത്. പ്രതിയെ മെഡിക്കല് പരിശോധനയ്ക്ക് വിധേയനാക്കി. സംഭവത്തില് പോലീസ് അന്വേഷണം ആരംഭിച്ചു.
