കോഴിക്കോട് ബേബി മെമ്മോറിയൽ ആശുപത്രിയിൽ തീപിടിത്തം: രോഗികളെ ഒഴിപ്പിച്ചു

കോഴിക്കോട്: ബേബി മെമ്മോറിയൽ ആശുപത്രിയുടെ (ബി.എം.എച്ച്) പുതിയ ബ്ലോക്കിലുണ്ടായ തീപിടിത്തം പരിഭ്രാന്തി പരത്തി. കെട്ടിടത്തിന്റെ ഒമ്പതാം നിലയിലുള്ള എ.സി. ചില്ലർ പ്ലാന്റിലാണ് തീപ്പിടുത്തമുണ്ടായത്. വൻതോതിൽ പുക ഉയർന്നെങ്കിലും, അഗ്‌നിരക്ഷാ സേനയും ജീവനക്കാരും ചേർന്ന് തീ ഉടൻ നിയന്ത്രണ വിധേയമാക്കിയതിനാൽ വൻ അപകടം ഒഴിവായി.

രാവിലെ ഏകദേശം 9.30ഓടെയാണ് സംഭവം. തീപിടിത്തം ശ്രദ്ധയിൽപ്പെട്ടതിനെത്തുടർന്ന് കനത്ത പുക ആശുപത്രി പരിസരമാകെ വ്യാപിച്ചു. സുരക്ഷാ മുൻകരുതലിന്റെ ഭാഗമായി താഴത്തെ നിലകളിലെ രോഗികളെയും കൂട്ടിരിപ്പുകാരെയും ജീവനക്കാരെയും വേഗത്തിൽ സുരക്ഷിത സ്ഥാനങ്ങളിലേക്ക് മാറ്റി. തീപിടിത്തമുണ്ടായ ഭാഗത്ത് രോഗികളോ ഓപ്പറേഷൻ തിയേറ്ററുകളോ ഉണ്ടായിരുന്നില്ലെങ്കിലും, തിരക്കേറിയ ഒ.പി. സമയമായതിനാൽ ആശങ്ക വർധിപ്പിച്ചിരിന്നു.

നടക്കാവ് പോലീസും അസിസ്റ്റന്റ് കമ്മീഷണറുടെ നേതൃത്വത്തിലുള്ള സംഘവും സ്ഥലത്തെത്തി സ്ഥിതിഗതികൾ വിലയിരുത്തി. എ.സി. പ്ലാന്റിൽ നിന്ന് പുക ഉയരുന്നത് പുറത്തുനിന്നുള്ളവരാണ് ആദ്യം കണ്ടതെന്നാണ് വിവരം. സംഭവത്തിൽ ആർക്കും പരിക്കേറ്റിട്ടില്ലെന്നും, തീപിടിത്തത്തിന്റെ യഥാർത്ഥ കാരണം കണ്ടെത്താൻ അന്വേഷണം ആരംഭിച്ചതായും ആശുപത്രി അധികൃതർ അറിയിച്ചു.