“ഇന്ത്യ മെഹ്മാൻ ഹേ”: ഇന്ത്യൻ സഞ്ചാരിയിൽ നിന്ന് പണം വാങ്ങാൻ വിസമ്മതിച്ച് അഫ്ഗാൻ ജ്യൂസ് വിൽപ്പനക്കാരൻ; വീഡിയോ വൈറൽ
കാബൂൾ: ഒരു ഇന്ത്യൻ സഞ്ചാരിയിൽ നിന്ന് പണം സ്വീകരിക്കാൻ വിസമ്മതിച്ച അഫ്ഗാനിസ്ഥാനിലെ ജ്യൂസ് വിൽപ്പനക്കാരന്റെ മനുഷ്യസ്നേഹപരമായ സമീപനം സോഷ്യൽ മീഡിയയിൽ തരംഗമാകുന്നു. “ഇന്ത്യ മെഹ്മാൻ ഹേ”(ഇന്ത്യ അതിഥിയാണ്) എന്ന വാക്കുകളോടെയാണ് അദ്ദേഹം ഇന്ത്യൻ സന്ദർശകരോട് രാജ്യത്തിന്റെ ഊഷ്മളമായ അതിഥി സത്കാരം പ്രകടിപ്പിച്ചത്.
ട്രാവൽ വ്ലോഗറായ കൈലാഷ് മീന ഇൻസ്റ്റാഗ്രാമിൽ പങ്കുവെച്ച വീഡിയോ ക്ലിപ്പിലാണ് ഹൃദയസ്പർശിയായ ഈ നിമിഷം പകർത്തിയത്. അഫ്ഗാനിസ്ഥാനിലെ ഒരു തെരുവ് വണ്ടിയിൽ നിന്ന് മാതളനാരങ്ങ ജ്യൂസ് കുടിച്ച ശേഷം മീന വിൽപ്പനക്കാരന് പണം നൽകാനൊരുങ്ങുന്നതാണ് ദൃശ്യങ്ങൾ. എന്നാൽ, വിൽപ്പനക്കാരൻ ചിരിച്ചുകൊണ്ട് പണം നിരസിക്കുകയും “മെഹ്മാൻ… മെഹ്മാൻ” (അതിഥി) എന്ന് ആവർത്തിക്കുകയും ചെയ്തു. അതിഥികളെ ബഹുമാനിക്കുകയും സ്നേഹിക്കുകയും ചെയ്യുന്ന അഫ്ഗാനികളുടെ സാംസ്കാരിക മൂല്യങ്ങളാണ് ഈ പ്രവർത്തിയിലൂടെ പ്രകടമായത്.
സമീപത്തുണ്ടായിരുന്ന ഒരു തദ്ദേശവാസി കൂടി ‘ഇന്ത്യ മെഹ്മാൻ ഹേ’ എന്ന് ആവേശത്തോടെ പറയുന്നത് വീഡിയോയ്ക്ക് കൂടുതൽ ഊഷ്മളത നൽകുന്നു. ഇന്ത്യക്കാരെ തങ്ങളുടെ നാട്ടിൽ ഏറ്റവും ആദരവോടെയാണ് സ്വീകരിക്കുന്നതെന്ന സ്നേഹസന്ദേശമാണ് ഇതിലൂടെ അവർ നൽകിയത്.
വിൽപ്പനക്കാരന്റെ ഈ സ്നേഹപ്രകടനത്തിൽ മീന അഭിമാനത്തോടും നന്ദിയോടും കൂടിയാണ് പ്രതികരിച്ചത്. “യേ ഹേ അഫ്ഗാനിസ്ഥാൻ കി മെഹ്മന്നവാസി”(ഇതാണ് അഫ്ഗാനിസ്ഥാന്റെ ആതിഥ്യ മര്യാദ) എന്ന് അദ്ദേഹം കുറിച്ചു.
ലളിതമായ ഒരു ജ്യൂസിന്റെ വിലയേക്കാൾ വലുതായ മനുഷ്യസ്പർശവും സാംസ്കാരിക സൗഹൃദവുമാണ് ഈ വീഡിയോ വെളിപ്പെടുത്തുന്നത്. അതിഥിയെ ദൈവമായി കാണുന്ന ഒരു സമൂഹത്തിന്റെ മനസ്സടുപ്പിക്കുന്ന കഥയായാണ് ഈ ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
