‘വിമാന ടിക്കറ്റ് നിരക്ക് 40,000 കടന്നത് എങ്ങനെ? സ്ഥിതി വഷളാക്കാന്വിട്ടത് നിങ്ങളാണ്’-ഇൻഡിഗോ പ്രതിസന്ധിയില് കേന്ദ്രത്തിന് ഡല്ഹി ഹൈക്കോടതിയുടെ രൂക്ഷ വിമർശനം
ന്യൂഡൽഹി: ആയിരക്കണക്കിന് വിമാന സർവീസുകൾ റദ്ദാക്കിയതിനെത്തുടർന്നുണ്ടായ പ്രതിസന്ധിയിൽ കേന്ദ്രസർക്കാരിനെയും ഇൻഡിഗോ എയർലൈൻസിനെയും രൂക്ഷമായി വിമർശിച്ച് ഡൽഹി ഹൈക്കോടതി. വിമാനത്താവളങ്ങളിൽ കുടുങ്ങിയ യാത്രക്കാർക്ക് ഉടൻ നഷ്ടപരിഹാരം നൽകണമെന്ന് കോടതി ഇൻഡിഗോയോട് ഉത്തരവിട്ടു.
ചീഫ് ജസ്റ്റിസ് ഡി.കെ ഉപാധ്യായ അധ്യക്ഷനായ ഡിവിഷൻ ബെഞ്ചാണ് കേസ് പരിഗണിച്ചത്. കോടതിയുടെ പ്രധാന നിരീക്ഷണങ്ങളും നിർദ്ദേശങ്ങളും താഴെ പറയുന്നവയാണ്:
വിമാന ടിക്കറ്റ് നിരക്ക് 40,000 രൂപയും കടന്ന് കുതിച്ചുയർന്നപ്പോൾ സർക്കാർ എന്ത് ചെയ്യുകയായിരുന്നുവെന്ന് കോടതി ചോദിച്ചു. പ്രതിസന്ധി രൂക്ഷമാകുന്നത് വരെ കാത്തിരുന്ന സർക്കാർ നടപടിയെ കോടതി ചോദ്യം ചെയ്തു. “സാഹചര്യം വഷളാക്കാൻ നിങ്ങൾ അനുവദിച്ചു. എങ്ങനെയാണ് എയർലൈനുകൾക്ക് ഇത്രയും ഭീമമായ തുക ഈടാക്കാൻ സാധിക്കുന്നത്?”- കോടതി ചോദിച്ചു.
ഇൻഡിഗോയുടെ സർവീസുകൾ മുടങ്ങിയതോടെ ചില റൂട്ടുകളിൽ ടിക്കറ്റ് നിരക്ക് 65,460 രൂപ വരെ വർദ്ധിച്ചതായി കോടതി ചൂണ്ടിക്കാട്ടി. ഇത് യാത്രക്കാർക്ക് മാത്രമല്ല, രാജ്യത്തിന്റെ സാമ്പത്തിക വ്യവസ്ഥയ്ക്ക് തന്നെ ഭീഷണിയാണെന്നും, സ്ഥിതിഗതികൾ ‘അസ്വസ്ഥമാക്കുന്നതാണെന്നും’ കോടതി നിരീക്ഷിച്ചു.
വിമാനത്താവളങ്ങളിൽ കുടുങ്ങിക്കിടക്കുന്ന യാത്രക്കാർക്ക് ഉടൻ നഷ്ടപരിഹാരം നൽകണം. യാത്രക്കാരോട് എയർലൈൻ ജീവനക്കാർ മാന്യമായി പെരുമാറുന്നുണ്ടെന്ന് ഉറപ്പാക്കണം. പ്രതിസന്ധിയുടെ യഥാർത്ഥ കാരണം കണ്ടെത്തി കേന്ദ്രസർക്കാർ റിപ്പോർട്ട് സമർപ്പിക്കണമെന്നും കോടതി നിര്ദേശിച്ചിട്ടുണ്ട്.
അതേസമയം, പ്രതിസന്ധി പരിഹരിക്കുന്നതിനായി ഇന്ഡിഗോ വിമാനങ്ങളുടെ 10% സർവീസുകൾ വെട്ടിക്കുറയ്ക്കാൻ കേന്ദ്രം ഉത്തരവിട്ടിട്ടുണ്ട്.
