‘പരിശോധനയില്ലാതെ മെഡിക്കൽ സർട്ടിഫിക്കറ്റ് നൽകിയാൽ പിടിവീഴും’; സൗദിയില് പ്രവാസികളുടെ മെഡിക്കൽ പരിശോധനാ കേന്ദ്രങ്ങളിൽ മിന്നൽ പരിശോധന
റിയാദ്: സൗദിയിലെ പ്രവാസി തൊഴിലാളികൾക്കായുള്ള മെഡിക്കൽ സ്ക്രീനിംഗ് സെന്ററുകളിലും ഫുഡ് വർക്കർ ക്ലിനിക്കുകളിലും (Food worker clinics) ആരോഗ്യ മന്ത്രാലയം പരിശോധന കർശനമാക്കി. പൊതുജനാരോഗ്യം സംരക്ഷിക്കുന്നതിനും സേവനങ്ങളുടെ നിലവാരം ഉറപ്പാക്കുന്നതിനുമായി രാജ്യവ്യാപകമായി വിപുലമായ ക്യാമ്പയിനാണ് മന്ത്രാലയം ആരംഭിച്ചിരിക്കുന്നത്.
ലക്ഷ്യം വ്യാജന്മാരെ തടയൽ
യഥാർത്ഥത്തിൽ പരിശോധനകൾ നടത്താതെ മെഡിക്കൽ സർട്ടിഫിക്കറ്റുകൾ നൽകുന്ന പ്രവണത ചിലയിടങ്ങളിൽ ശ്രദ്ധയിൽപ്പെട്ടതാണ് കർശന നടപടിക്ക് കാരണം. ഇത്തരം നിയമലംഘനങ്ങൾക്കെതിരെ മന്ത്രാലയം കടുത്ത മുന്നറിയിപ്പ് നൽകി. പകർച്ചവ്യാധികൾ കണ്ടെത്തിയാൽ അത് മറച്ചുവെക്കാതെ, ഉടൻ തന്നെ ഔദ്യോഗിക ഡിജിറ്റൽ പ്ലാറ്റ്ഫോമുകൾ വഴി റിപ്പോർട്ട് ചെയ്യണമെന്നും നിർദ്ദേശമുണ്ട്.
ക്ലിനിക്കുകൾ പാലിക്കേണ്ട നിബന്ധനകൾ:
യോഗ്യതയുള്ള ജീവനക്കാർ: ലൈസൻസുള്ള മെഡിക്കൽ ഉദ്യോഗസ്ഥർ മാത്രമേ പരിശോധനകൾ നടത്താൻ പാടുള്ളൂ.
ആധുനിക ഉപകരണങ്ങൾ: പരിശോധനയ്ക്ക് ഉപയോഗിക്കുന്ന ഉപകരണങ്ങൾ മന്ത്രാലയത്തിന്റെ അംഗീകാരമുള്ളതും പ്രവർത്തനക്ഷമവുമായവ ആയിരിക്കണം.
സ്റ്റാഫിങ്: ക്ലിനിക്കുകളിൽ തിരക്ക് നിയന്ത്രിക്കാനും പരിശോധന നടത്താനും ആവശ്യത്തിന് ജീവനക്കാരുണ്ടെന്ന് ഉറപ്പാക്കണം.
ലൈസൻസ്: സ്ഥാപനങ്ങൾക്ക് പ്രവർത്തിക്കാൻ ആവശ്യമായ എല്ലാ സർക്കാർ അനുമതികളും നിർബന്ധമാണ്.
നിയമലംഘനങ്ങൾ കണ്ടെത്തുന്ന സ്ഥാപനങ്ങൾക്കെതിരെ പിഴയുൾപ്പെടെയുള്ള നിയമനടപടികൾ സ്വീകരിക്കും. മെഡിക്കൽ രംഗത്തെ തട്ടിപ്പുകൾ ശ്രദ്ധയിൽപ്പെട്ടാൽ 937 എന്ന നമ്പറിൽ വിളിച്ച് അറിയിക്കണമെന്ന് പൊതുജനങ്ങളോട് മന്ത്രാലയം അഭ്യർത്ഥിച്ചു.
