വലിച്ചെറിയുന്നത് വിഷബോംബുകൾ; സിഗരറ്റ് കുറ്റികൾ സൃഷ്ടിക്കുന്നത് വൻ ദുരന്തമെന്ന് പഠനം

ലോകം നേരിടുന്ന പ്ലാസ്റ്റിക് മലിനീകരണത്തിന്റെ ഏറ്റവും വലിയ ഉറവിടമായി സിഗരറ്റ് കുറ്റികൾ മാറുന്നതായി അന്താരാഷ്ട്ര പരിസ്ഥിതി ഏജൻസികളുടെ പുതിയ മുന്നറിയിപ്പ്. ഓരോ സെക്കൻഡിലും ഏകദേശം 10 ദശലക്ഷം സിഗരറ്റ് കുറ്റികളാണ് ഭൂമിയിൽ അശ്രദ്ധമായി വലിച്ചെറിയപ്പെടുന്നത്. പ്രതിവർഷം ഇത് 4.5 ട്രില്യൺ കവിയുന്നു. ലോകത്ത് ശേഖരിക്കപ്പെടുന്ന ആകെ മാലിന്യത്തിന്റെ 40 ശതമാനത്തോളം സിഗരറ്റ് അവശിഷ്ടങ്ങളാണെന്ന ഞെട്ടിക്കുന്ന വിവരമാണ് പുറത്തുവരുന്നത്.

സെല്ലുലോസ് അസറ്റേറ്റ്: മണ്ണിൽ അലിയാത്ത പ്ലാസ്റ്റിക്

പലരും കരുതുന്നത് സിഗരറ്റ് ഫിൽറ്ററുകൾ പഞ്ഞിയോ പേപ്പറോ കൊണ്ടാണെന്നാണ്. എന്നാൽ ഇത് ‘സെല്ലുലോസ് അസറ്റേറ്റ്’ എന്ന സിന്തറ്റിക് പ്ലാസ്റ്റിക് ഉപയോഗിച്ചാണ് നിർമ്മിച്ചിരിക്കുന്നത്. ഒരു ഫിൽറ്ററിൽ മാത്രം 15,000ത്തിലധികം മൈക്രോപ്ലാസ്റ്റിക് നാരുകൾ അടങ്ങിയിട്ടുണ്ട്. 2026ൽ സിഗരറ്റ് മാലിന്യങ്ങൾ നനഞ്ഞ അന്തരീക്ഷത്തിൽ പ്രവേശിച്ചുകഴിഞ്ഞാൽ എങ്ങനെ പ്രവർത്തിക്കുന്നു എന്നതിന്റെ പഠനം ബഫല്ലോയിലെ സർവകലാശാലയിലെ ജോൺ ഡി. ആറ്റ്കിൻസണും സഹപ്രവർത്തകരും നടത്തിയിരുന്നു. ഈ കണ്ടെത്തലുകൾ ജേണൽ ഓഫ് ഹാസാർഡസ് മെറ്റീരിയൽസ്: പ്ലാസ്റ്റിക്സിൽ പ്രസിദ്ധീകരിച്ചിട്ടുണ്ട്‌. ഒരു സിഗരറ്റ് ഫിൽറ്റർ വെള്ളവുമായി സമ്പർക്കത്തിൽ വന്നാൽ ആദ്യ 20 സെക്കൻഡിനുള്ളിൽ തന്നെ 24 മൈക്രോപ്ലാസ്റ്റിക് നാരുകൾ പുറന്തള്ളും. 10 ദിവസത്തിനുള്ളിൽ ഇത് നൂറിലധികം നാരുകളായി വർദ്ധിക്കും. എന്ന് കാണിക്കുന്നു.

ആഗോളതലത്തിലെ പുതിയ കണക്കുകൾ

വിഷാംശം: ഒരു ചെറിയ സിഗരറ്റ് കുറ്റി 1,000 ലിറ്റർ വെള്ളത്തെ വരെ വിഷലിപ്തമാക്കാം. ഇതിൽ നിക്കോട്ടിൻ, ആർസെനിക്, ലെഡ്, കാഡ്മിയം തുടങ്ങി 7,000 രാസ സംയുക്തങ്ങൾ അടങ്ങിയിരിക്കുന്നു.

ആരോഗ്യ ഭീഷണി: 2025ലെ പഠനങ്ങൾ പ്രകാരം ഈ മൈക്രോപ്ലാസ്റ്റിക് കണികകൾ മനുഷ്യന്റെ രോഗപ്രതിരോധ കോശങ്ങളിൽ (Immune Cells) കോശജ്വലനത്തിന് (Inflammatory reactions) കാരണമാകുന്നു. ഇവ ശ്വാസകോശത്തിലും രക്തത്തിലും കലരുന്നതായും കണ്ടെത്തിയിട്ടുണ്ട്.

സാമ്പത്തിക ആഘാതം: സാൻ ഫ്രാൻസിസ്‌കോ പോലുള്ള നഗരങ്ങൾ സിഗരറ്റ് കുറ്റികൾ നീക്കം ചെയ്യാൻ മാത്രം പ്രതിവർഷം 7.5 ദശലക്ഷം ഡോളറാണ് ചിലവാക്കുന്നത്.

നൂതനമായ പ്രതിരോധ മാർഗ്ഗങ്ങൾ

ലളിതമായ ശിക്ഷാനടപടികളേക്കാൾ പ്രായോഗികമായ പരിഹാരങ്ങളാണ് ഫലപ്രദമെന്ന് ജപ്പാൻ, ഇറ്റലി തുടങ്ങിയ രാജ്യങ്ങൾ തെളിയിച്ചിട്ടുണ്ട്.

പോർട്ടബിൾ ആഷ്ട്രേകൾ: കൈ കൊണ്ടുനടക്കാവുന്ന ആഷ്ട്രേകൾ നൽകുന്നത് വഴി മലിനീകരണം 12% വരെ കുറയ്ക്കാനായിട്ടുണ്ട്.

പുനരുപയോഗം: ശേഖരിക്കുന്ന സിഗരറ്റ് കുറ്റികൾ സംസ്‌കരിച്ച് വാട്ടർ ഫിൽറ്ററുകൾക്കാവശ്യമായ ഹൈക്വാളിറ്റി കാർബണായും, റോഡ് നിർമ്മാണത്തിനുള്ള മിശ്രിതമായും മാറ്റുന്ന സാങ്കേതികവിദ്യകൾ വികസിച്ചുവരുന്നു.

സാമൂഹിക മാറ്റം: പുകവലിക്കാരിൽ 79 ശതമാനം പേരും ഇതൊരു മാലിന്യമാണെന്ന് കരുതുന്നുണ്ടെങ്കിലും 72 ശതമാനം പേരും ഇത് നിലത്ത് എറിയുന്നു. ഈ ശീലം മാറ്റാൻ നഗരങ്ങളിൽ ‘ബട്ട് ബിന്നുകൾ’ വ്യാപകമാക്കണം.

വിഷവസ്തുക്കളുടെ ഇടം

ആർസെനിക്, ലെഡ്, നിക്കോട്ടിൻ തുടങ്ങി ഏഴായിരത്തിലധികം മാരക രാസവസ്തുക്കളാണ് സിഗരറ്റ് കുറ്റികളിലൂടെ പ്രകൃതിയിൽ കലരുന്നത്. 2025ൽ നടത്തിയ പഠനങ്ങൾ പ്രകാരം, മൈക്രോപ്ലാസ്റ്റിക് നാരുകൾ മനുഷ്യന്റെ പ്രതിരോധ കോശങ്ങളിൽ ഗുരുതരമായ പ്രത്യാഘാതങ്ങൾ ഉണ്ടാക്കും. ബീച്ചുകളിൽ നിന്ന് ശേഖരിക്കുന്ന മാലിന്യങ്ങളിൽ 40 ശതമാനവും സിഗരറ്റ് കുറ്റികളാണെന്നത് ഭയാനകമായ കണക്കാണ് എന്ന് ഡബ്ലു എച്ച് ഒ പറയുന്നു.  ഭൂമിയിലെ ജൈവവൈവിധ്യത്തെയും കുടിവെള്ള സ്രോതസ്സുകളെയും സംരക്ഷിക്കാൻ സിഗരറ്റ് കുറ്റികളെ ‘അപകടകരമായ പ്ലാസ്റ്റിക് മാലിന്യമായി’ കണ്ട് ഉടനടി നടപടി സ്വീകരിക്കണമെന്നാണ് പരിസ്ഥിതി ശാസ്ത്രജ്ഞർ ആവശ്യപ്പെടുന്നത്.