പൂജ്യത്തിൽനിന്ന് തുടങ്ങി, പടുത്തുയർത്തിയത് കോടികളുടെ റിയൽ എസ്റ്റേറ്റ് സാമ്രാജ്യം’ഐടി വേട്ട’യിൽ സ്വയം പൊലിഞ്ഞ ‘കോൺഫിഡന്റ് റോയ്’

ബംഗളൂരു/കൊച്ചി: ദക്ഷിണേന്ത്യയിലെ റിയൽ എസ്റ്റേറ്റ് ഭൂപടത്തിൽ ‘കോൺഫിഡന്റ്’ എന്ന പേര് എഴുതിച്ചേർത്ത ഡോ. സി.ജെ. റോയിയുടെ വിയോഗം ഒരു വലിയ സാമ്രാജ്യത്തിന്റെ അധിപന്റെ വീഴ്ച കൂടിയാണ്. വെറും സാധാരണക്കാരനായി തുടങ്ങി, പിന്നീട് കോടികളുടെ ആസ്തിയുള്ള വ്യവസായിയായി വളർന്ന റോയിയുടെ ജീവിതം സിനിമകളെ വെല്ലുന്ന ട്വിസ്റ്റുകൾ നിറഞ്ഞതായിരുന്നു.

തുടക്കം പൂജ്യത്തിൽനിന്ന്

കേരളത്തിലെ ഒരു സാധാരണ കുടുംബത്തിൽ ജനിച്ച സി.ജെ റോയ്, സ്വന്തം കഠിനാധ്വാനം ഒന്ന് കൊണ്ട് മാത്രമാണ് ഉയരങ്ങൾ കീഴടക്കിയത്. ബിസിനസ് പാരമ്പര്യങ്ങളില്ലാത്ത കുടുംബത്തിൽനിന്ന് വന്ന്, തന്റേതായ ഇടം കണ്ടെത്താൻ അദ്ദേഹത്തിന് ഏറെ വിയർപ്പൊഴുക്കേണ്ടി വന്നു. എഞ്ചിനീയറിങ് ബിരുദത്തിന് ശേഷം വിദേശത്ത് ജോലി നോക്കിയ അദ്ദേഹം, പിന്നീട് സംരംഭകനാകണമെന്ന ആഗ്രഹത്തോടെയാണ് തിരിച്ചെത്തുന്നത്.

‘കോൺഫിഡന്റ്’ ഗ്രൂപ്പിന്റെ ഉദയം

2006ൽ ബംഗളൂരു ആസ്ഥാനമായാണ് കോൺഫിഡന്റ് ഗ്രൂപ്പ് ആരംഭിക്കുന്നത്. ചുരുങ്ങിയ കാലം കൊണ്ട് ബംഗളൂരുവിലെയും കേരളത്തിലെയും റിയൽ എസ്റ്റേറ്റ് മേഖലയിൽ വിശ്വസ്ത നാമമായി മാറാൻ ഈ ഗ്രൂപ്പിന് സാധിച്ചു. ‘സീറോ ഡെബ്റ്റ്’ (കടങ്ങളില്ലാത്ത) കമ്പനി എന്ന ഖ്യാതി നിലനിർത്താൻ അദ്ദേഹം എപ്പോഴും ശ്രദ്ധിച്ചിരുന്നു. 150-ലധികം പ്രോജക്റ്റുകൾ പൂർത്തിയാക്കിയ ഗ്രൂപ്പ്, പാർപ്പിട സമുച്ചയങ്ങൾക്ക് പുറമെ ഹോസ്പിറ്റാലിറ്റി, എന്റർടൈൻമെന്റ്, വിദ്യാഭ്യാസം തുടങ്ങിയ മേഖലകളിലേക്കും ചിറകുവിരിച്ചു.

സിനിമയും ആഡംബര കാറുകളും

ബിസിനസിനപ്പുറം റോയിക്ക് വലിയ പാഷനായിരുന്നു സിനിമയും വാഹനങ്ങളും. മലയാളത്തിലും കന്നഡയിലുമായി നിരവധി സിനിമകൾ കോൺഫിഡന്റ് ഗ്രൂപ്പ് നിർമിച്ചു. മോഹൻലാൽ നായകനായ ‘കാസനോവ’, സുരേഷ് ഗോപിയുടെ ‘മേ ഹൂം മൂസ’ തുടങ്ങിയവ ഇതിൽ ചിലതാണ്. ആഡംബര കാറുകളോടുള്ള അദ്ദേഹത്തിന്റെ പ്രിയം പ്രശസ്തമാണ്. റോൾസ് റോയ്‌സ് അടക്കമുള്ള വമ്പൻ കാറുകളുടെ നീണ്ട നിര തന്നെ അദ്ദേഹത്തിന്റെ ഗാരേജിലുണ്ടായിരുന്നു. പലപ്പോഴും കാറുകളുടെ നമ്പറുകൾ പോലും കോൺഫിഡന്റ് ഗ്രൂപ്പിന്റെ ലോഗോയുമായി ബന്ധപ്പെട്ടതായിരുന്നു.

ജീവകാരുണ്യ പ്രവർത്തനങ്ങൾ

ബിസിനസ് തിരക്കുകൾക്കിടയിലും സാമൂഹിക സേവനത്തിന് അദ്ദേഹം സമയം കണ്ടെത്തിയിരുന്നു. കാൻസർ രോഗികൾക്കും നിർധനർക്കും വീട് വെച്ച് നൽകുന്നതുൾപ്പെടെയുള്ള പദ്ധതികൾക്ക് അദ്ദേഹം നേതൃത്വം നൽകി.

അപ്രതീക്ഷിത അന്ത്യം

വിജയത്തിന്റെ നെറുകയിൽ നിൽക്കുമ്പോഴും, അവസാന കാലത്ത് നേരിട്ട നിയമനടപടികളും റെയ്ഡുകളും അദ്ദേഹത്തെ മാനസികമായി തളർത്തിയിരുന്നുവെന്നാണ് സൂചന. സ്വന്തം കൈപ്പടയിൽ എഴുതിത്തുടങ്ങിയ വിജയഗാഥ, ഒടുവിൽ അതേ കൈകൊണ്ട് തന്നെ അവസാനിപ്പിക്കേണ്ടി വന്നത് വിധിയുടെ ക്രൂരമായ വിരോധാഭാസമായി അവശേഷിക്കുന്നു.