അഫ്ഗാൻ്റെ വൻ തിരിച്ചടി; 55 പാക് സൈനികരെ കൊലപ്പെടുത്തി, 15 സൈനിക ഔട്ട്പോസ്റ്റുകൾ നിയന്ത്രണത്തിലാക്കി, യുദ്ധം പ്രഖ്യാപിച്ച് പാകിസ്താൻ
കാബൂൾ/ഇസ്ലാമാബാദ്: പാകിസ്താനും അഫ്ഗാനിസ്ഥാനും തമ്മിലുള്ള അതിർത്തി തർക്കം രൂക്ഷമായ യുദ്ധത്തിലേക്ക് നീങ്ങുന്നു. അഫ്ഗാൻ സേന നടത്തിയ ശക്തമായ പ്രത്യാക്രമണത്തിൽ 55 പാകിസ്താൻ സൈനികർ കൊല്ലപ്പെട്ടതായാണ് റിപ്പോർട്ടുകൾ. അതിർത്തിയിലെ തന്ത്രപ്രധാനമായ 15 പാക് സൈനിക ഔട്ട്പോസ്റ്റുകൾ അഫ്ഗാൻ സൈന്യം പിടിച്ചെടുക്കുകയും ചെയ്തിട്ടുണ്ട്. ഇതോടെ അഫ്ഗാനിസ്ഥാനെതിരെ പാകിസ്താൻ ഔദ്യോഗികമായി യുദ്ധം പ്രഖ്യാപിച്ചതായാണ് സൂചനകൾ.
കഴിഞ്ഞ കുറച്ചു ദിവസങ്ങളായി അതിർത്തി പങ്കിടുന്ന ഡ്യുറാൻഡ് ലൈനിൽ ഇരുവിഭാഗവും തമ്മിൽ കടുത്ത വെടിവെപ്പ് നടന്നു വരികയായിരുന്നു. പാക് സൈന്യം അഫ്ഗാൻ അതിർത്തിക്കുള്ളിലേക്ക് കടന്നുകയറാൻ ശ്രമിച്ചതാണ് പെട്ടെന്നുള്ള പ്രത്യാക്രമണത്തിന് കാരണമായതെന്ന് അഫ്ഗാൻ വൃത്തങ്ങൾ അവകാശപ്പെടുന്നു. ഔട്ട്പോസ്റ്റുകൾ നഷ്ടപ്പെട്ടതും വൻ സൈനികനാശവും നേരിട്ടതോടെ പാകിസ്താൻ അതിർത്തിയിലേക്ക് കൂടുതൽ ടാങ്കുകളും വ്യോമസേനയും വിന്യസിച്ചിട്ടുണ്ട്.
സംഭവം മേഖലയിൽ കനത്ത ആശങ്കയാണ് സൃഷ്ടിച്ചിരിക്കുന്നത്. അതിർത്തി ഗ്രാമങ്ങളിൽ നിന്ന് നൂറുകണക്കിന് കുടുംബങ്ങളെ മാറ്റിപ്പാർപ്പിച്ചു. അന്താരാഷ്ട്ര തലത്തിൽ വലിയ നയതന്ത്ര സമ്മർദ്ദങ്ങൾ നടക്കുന്നുണ്ടെങ്കിലും അതിർത്തിയിൽ ഇപ്പോഴും കനത്ത ഷെല്ലാക്രമണം തുടരുകയാണ്. പതിറ്റാണ്ടുകളായി നിലനിൽക്കുന്ന അതിർത്തി തർക്കം പൂർണ്ണമായ ഒരു യുദ്ധത്തിലേക്ക് മാറുന്നത് ദക്ഷിണേഷ്യൻ സുരക്ഷയെ തന്നെ പ്രതികൂലമായി ബാധിച്ചേക്കാം.
