യുദ്ധമില്ലാതെ അമേരിക്കയെ വീഴ്ത്താൻ ചൈനീസ് ‘ബ്ലൂപ്രിന്റ്’; ആഗോള ആയുധവിപണിയിൽ പിടിമുറുക്കാൻ ചൈന
ബെയ്ജിങ്: ആധുനിക യുദ്ധതന്ത്രങ്ങളിൽ അമേരിക്കയെ നിഷ്പ്രഭമാക്കാൻ ലക്ഷ്യമിട്ടുള്ള ബൃഹത്തായ പദ്ധതിയുമായി ചൈന രംഗത്ത്. അടുത്തിടെ പുറത്തിറക്കിയ ചൈനയുടെ 15-ാം പഞ്ചവത്സര പദ്ധതിയിലാണ് വരും ദശകങ്ങളിൽ ലോകശക്തിയാകാനുള്ള കൃത്യമായ റോഡ്മാപ്പ് ഷി ജിൻപിങ് സർക്കാർ വിഭാവനം ചെയ്യുന്നത്. അമേരിക്ക ഇറാൻ ഉൾപ്പെടെയുള്ള രാജ്യങ്ങളുമായുള്ള നേരിട്ടുള്ള സൈനിക സംഘർഷങ്ങളിൽ ശ്രദ്ധ കേന്ദ്രീകരിക്കുമ്പോൾ, ചൈന നിശബ്ദമായി ആഗോള വിതരണ ശൃംഖലയെയും സാങ്കേതിക വിദ്യയെയും വരുതിയിലാക്കുകയാണ്.
നിർണ്ണായകമായ ‘അപൂർവ ഭൗമ മൂലകങ്ങളുടെ’ (Rare Earth Elements) കയറ്റുമതിയിൽ ചൈന ഏർപ്പെടുത്തിയ പുതിയ നിയന്ത്രണങ്ങളാണ് അമേരിക്കയെ പ്രതിസന്ധിയിലാക്കുന്നത്. അത്യാധുനിക യുഎസ് യുദ്ധവിമാനമായ F-35 മുതൽ മിസൈൽ പ്രതിരോധ സംവിധാനങ്ങൾ വരെ നിർമ്മിക്കാൻ ഈ മൂലകങ്ങൾ അനിവാര്യമാണ്. ആയുധങ്ങൾ നിർമ്മിക്കാനുള്ള അസംസ്കൃത വസ്തുക്കളുടെ വിതരണ ശൃംഖല ചൈന കർശനമാക്കുമ്പോൾ, യുദ്ധക്കളത്തിൽ ഒരു വെടിയുണ്ട പോലും ഉതിർക്കാതെ തന്നെ അമേരിക്കയുടെ സൈനിക ശേഷിയെ തളർത്താൻ സാധിക്കുമെന്ന് സാമ്പത്തിക വിദഗ്ധർ വിലയിരുത്തുന്നു.
ആർട്ടിഫിഷ്യൽ ഇന്റലിജൻസ് (AI), ഹ്യൂമനോയിഡ് റോബോട്ടിക്സ്, ക്വാണ്ടം കമ്മ്യൂണിക്കേഷൻ തുടങ്ങിയ മേഖലകളിൽ വൻ നിക്ഷേപമാണ് ചൈന ലക്ഷ്യമിടുന്നത്. അമേരിക്കയുടെ ‘ചിപ്സ് ആക്ട്’ കേവലം സെമികണ്ടക്ടറുകളിൽ മാത്രം ശ്രദ്ധ കേന്ദ്രീകരിക്കുമ്പോൾ, ചൈനയുടെ പ്ലാൻ ഒരു സമ്പൂർണ്ണ ‘ആയുധപ്പുര’ കെട്ടിപ്പടുക്കുന്നതിന് തുല്യമാണെന്ന് നിരീക്ഷകർ ചൂണ്ടിക്കാട്ടുന്നു. വരും വർഷങ്ങളിൽ ലോകത്തിന്റെ സാമ്പത്തിക-സൈനിക സന്തുലിതാവസ്ഥ ഫാക്ടറികളിലും വിതരണ ശൃംഖലകളിലും വെച്ച് തീരുമാനിക്കപ്പെടുമെന്ന സൂചനയാണ് ഈ നീക്കങ്ങൾ നൽകുന്നത്.
