ഫാസ്ടാഗ് പാസ് ഫീ കൂട്ടി കേന്ദ്രം; പുതിയ നിരക്കുകൾ അറിയാം
ന്യൂഡൽഹി: ദേശീയപാതകളിലൂടെ സ്ഥിരമായി യാത്ര ചെയ്യുന്നവർക്കായി നാഷണൽ ഹൈവേ അതോറിറ്റി ഓഫ് ഇന്ത്യ (NHAI) ഏർപ്പെടുത്തിയിട്ടുള്ള ഫാസ്ടാഗ് വാർഷിക പാസ് നിരക്കുകളിൽ മാറ്റം വരുത്തി. 2026-27 സാമ്പത്തിക വർഷത്തേക്കുള്ള പുതുക്കിയ നിരക്കുകൾ പ്രകാരം ഏപ്രിൽ ഒന്ന് മുതൽ വാണിജ്യേതര വാഹനങ്ങളുടെ പാസ് ഫീസിൽ നേരിയ വർദ്ധനവുണ്ടാകും. ഈ മാസം 12-ന് പുറപ്പെടുവിച്ച ഔദ്യോഗിക ഉത്തരവ് അനുസരിച്ച്, സ്വകാര്യ കാറുകൾ, ജീപ്പുകൾ, വാനുകൾ എന്നിവയുടെ വാർഷിക പാസിന് ഇനി മുതൽ 3,075 രൂപയാണ് നൽകേണ്ടി വരുന്നത്. നിലവിൽ ഇത് 3,000 രൂപയായിരുന്നു.
ദേശീയപാതകളിലെ ടോൾ പിരിവ് പൂർണമായും ഡിജിറ്റലൈസ് ചെയ്യുന്നതിന്റെയും ആവർത്തിച്ചുള്ള പേയ്മെന്റുകൾ ലഘൂകരിക്കുന്നതിന്റെയും ഭാഗമായി 2025-ലെ സ്വാതന്ത്ര്യദിനത്തിലാണ് പദ്ധതിക്ക് തുടക്കമിട്ടത്. നിലവിൽ രാജ്യത്തെ സ്വകാര്യ വാഹനങ്ങൾ നടത്തുന്ന ടോൾ ഇടപാടുകളുടെ 28 ശതമാനവും വാർഷിക പാസ് വഴിയാണ് നടക്കുന്നത് എന്നത് ഇതിന്റെ വർധിച്ചുവരുന്ന ജനപ്രീതിയെ സൂചിപ്പിക്കുന്നു. റോഡ് ഗതാഗത മന്ത്രാലയത്തിന്റെ കണക്കുകൾ പ്രകാരം 50 ലക്ഷത്തിലധികം ഉപയോക്താക്കൾ ഇപ്പോൾ സേവനം പ്രയോജനപ്പെടുത്തുന്നുണ്ട്.
ഒരു വർഷത്തെ കാലാവധിയോ അല്ലെങ്കിൽ 200 ടോൾ ക്രോസിംഗുകളോ (ഏതാണോ ആദ്യം വരുന്നത്) ആണ് പാസിന്റെ സാധുത. വിവിധ ടോൾ പ്ലാസകളിലെ നിരക്കുകൾ പരിഗണിക്കാതെ തന്നെ പാസ് ഉടമകൾക്ക് ആനുകൂല്യം ലഭിക്കും. ‘രാജ്മാർഗ് യാത്ര’ ആപ്പ് വഴിയോ എൻഎച്ച്എഐയുടെ ഔദ്യോഗിക വെബ്സൈറ്റുകൾ വഴിയോ യാത്രക്കാർക്ക് പാസിനായി അപേക്ഷിക്കാവുന്നതാണ്. ഫാസ്ടാഗുമായി ബന്ധിപ്പിച്ച മൊബൈൽ നമ്പറും വാഹനത്തിന്റെ വിവരങ്ങളും നൽകി ഓൺലൈനായി തുക അടയ്ക്കുന്നതോടെ 24 മണിക്കൂറിനുള്ളിൽ പാസ് സജീവമാകും. 2016-ൽ ആരംഭിച്ച ഫാസ്ടാഗ് നിലവിൽ രാജ്യത്തെ ടോൾ വരുമാനത്തിന്റെ 98 ശതമാനവും കൈകാര്യം ചെയ്യുന്ന പ്രമുഖ പേയ്മെന്റ് സംവിധാനമായി മാറിയിരിക്കുകയാണ്.
